ଏକାଠି ହେବେ କି ଡିମ୍ପଲ୍-ସୁମିତ୍ ? ଆଜି ଆସିବ ରାୟ

ବ୍ରହ୍ମପୁର: ୪୪ ଦିନ ପରେ ଧାରଣାରୁ ଉଠିବେ କି ଡିମ୍ପଲ୍ ? ଏକାଠି ହେବେ କି ଡିମ୍ପଲ୍-ସୁମିତ୍ ? ନୂଆ ବର୍ଷରେ ନିର୍ଣ୍ଣାୟକ ହେବ କି ଡିମ୍ପଲ ସୁମିତ୍ ଦାମ୍ପତ୍ୟ ମାନ ଅଭିମାନ ? କେଉଁଠି ରହିବେ ଡିମ୍ପଲ ? ଏନେଇ ଆଜି ଆସିବ ଗୁରୁତ୍ୱପୂର୍ଣ୍ଣ ରାୟ । ମାମଲାର ଚୂଡ଼ାନ୍ତ ରାୟ ପ୍ରକାଶ କରିବେ ଜିଲ୍ଲା ଓ ଦୌରା ଜଜ୍ । ମାମଲାର ଶୁଣାଣି ସରିଥିବା ବେଳେ ରାୟ ସଂରକ୍ଷିତ ରହିଛି । ଆଜି ସୁମିତ ଓ ଡିମ୍ପଲଙ୍କ ଜୀବନର ଭାଗ୍ୟ ନିର୍ଦ୍ଧାରଣ କରିବେ କୋର୍ଟ । ରାୟ କାହା ସପକ୍ଷରେ ଯିବ ତାହା ଉପରେ ଏବେ ସଭିଙ୍କ ନଜର ରହିଛି ।

ଶ୍ୱଶୁର ଘରକୁ ଯିବା ଦାବିରେ ଦେଢ ମାସରୁ ଅଧିକ ଦିନ ହେଲା ଶ୍ବଶୁର ଘର ଆଗରେ ଧାରଣାରେ ବସିଛନ୍ତି ବ୍ରହ୍ମପୁର ବ୍ରହ୍ମାନଗରର ବୋହୂ ଡିମ୍ପଲ୍ । ଶ୍ୱଶୁର ଘରକୁ ଯିବା ଜିଦରେ ଡିମ୍ପଲ୍ ଅଟଳ ଥିବା ବେଳେ ସ୍ତ୍ରୀକୁ ଗ୍ରହଣ କରିବାକୁ ରାଜି ନାହାନ୍ତି ସୁମିତ୍ ଓ ପରିବାର ଲୋକ । ତପସ୍ବିନୀଙ୍କୁ ଭଡ଼ା ଘରେ ରଖି ସମସ୍ତ ଦାୟିତ୍ୱ ବହନ କରିବା ନିମନ୍ତେ ଏସଡିଜେଏମ୍ କୋର୍ଟ ଦେଇଥିବା ଆଦେଶକୁ ଚାଲେଞ୍ଜ କରିଛନ୍ତି ସୁମିତଙ୍କ ଓକିଲ । ସେପଟେ ତପସ୍ୱିନୀଙ୍କୁ ଚଳିବା ଏବଂ ଭରଣପୋଷଣ ପାଇଁ ୫୦ ହଜାର ଟଙ୍କା ପ୍ରଦାନ ଆବେଦନ ଖାରଜ ପରେ ଜିଲ୍ଲା କୋର୍ଟରେ ଅପିଲ୍ କରିଥିଲେ ତପସ୍ୱିନୀଙ୍କ ଓକିଲ ।

ଏହା ଭିତରେ ଆଜି କୋର୍ଟଙ୍କ ନିଷ୍ପତ୍ତି ଉପରେ ସମସ୍ତଙ୍କର ନଜର ରହିଛି । ସେପଟେ ପୁଣି ଏକ ଭିଡିଓ ଛାଡ଼ିଛନ୍ତି ଡିମ୍ପଲ । ଏଥିରେ ତାଙ୍କ ଶ୍ୱଶୁର ଗେଟ୍ ପାଖରେ ଠିଆ ହୋଇ ଗ୍ୟାସ ସିଲିଣ୍ଡର ନେଉଛନ୍ତି । ପୁଣି ଗ୍ରୀଲରେ ଚାବି ଦେଇ ଭିତରକୁ ଚାଲି ଯାଉଛନ୍ତି । ଏହି ଭିଡିଓ ଛାଡ଼ି ଡିମ୍ପଲ୍ କହିଛନ୍ତି, ତାଙ୍କ ଶ୍ୱଶୁର ଏବଂ ପରିବାର ଲୋକ ଗୃହବନ୍ଦୀ ହୋଇନାହାନ୍ତି । ଅନ୍ୟ ଲୋକ ମାନେ ମଧ୍ୟ ଘର ଭିତରକୁ ଯିବା ଆସିବା କରୁଛନ୍ତି ।