କ୍ଷମତା ପାଇଁ ସମସ୍ତେ ବାଇ: ଝାଡ଼ଖଣ୍ଡରେ ପତିଙ୍କ ବିରୋଧରେ ନିର୍ବାଚନ ଲଢ଼ୁଛନ୍ତି ପତ୍ନୀ

ଝାଡ଼ଖଣ୍ଡ: ବିଧାନସଭା ନିର୍ବାଚନ ପାଇଁ ପ୍ରଚାର ଜୋରଦାର ହୋଇଛି । ନଭେମ୍ବର ୩୦ରେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ହେବ ମତଦାନ । ପ୍ରଥମ ପର୍ଯ୍ୟାୟରେ ୧୩ ଆସନରେ ହେବ ଭୋଟ । ୧୩ ଆସନ ମଧ୍ୟରୁ ଭବନାଥପୁର ଆସନ ଏବେ ଚର୍ଚ୍ଚାରେ ରହିଛି । ଏହି ଆସନରେ ଦଳୀୟ ପ୍ରାର୍ଥୀଙ୍କ ସହ ମଇଦାନରେ ଅଛନ୍ତି ୧୨ ସ୍ୱାଧୀନ ପ୍ରାର୍ଥୀ । ଏହି ସ୍ୱାଧୀନ ପ୍ରାର୍ଥୀଙ୍କ ମଧ୍ୟରେ ଅଛନ୍ତି ମନିଷ ଓ ପ୍ରିୟଙ୍କା । ସେମାନେ ସମ୍ପର୍କରେ ହେଉଛନ୍ତି ପତି-ପତ୍ନୀ । ସେମାନଙ୍କ ମଧ୍ୟରେ ଚାଲିଛି ବନ୍ଧୁତ୍ୱପୂର୍ଣ୍ଣ ଲଢ଼େଇ । ଉଭୟେ ସମାନ ସମସ୍ୟା ନେଇ ଭୋଟରଙ୍କୁ ଭେଟୁଛନ୍ତି ।

ସ୍ୱାଧୀନ ପ୍ରାର୍ଥୀ ଭାବେ ଭବନାଥପୁର ଆସନରୁ ନିର୍ବାଚନ ଲଢ଼ିବାକୁ ମନିଷ ପତ୍ନୀ ପ୍ରିୟଙ୍କାଙ୍କ ନିକଟରେ ଇଛା ପ୍ରକାଶ କରିଥିଲେ । ପତିଙ୍କ ଇଛାକୁ ତ ସମ୍ମାନ ଦେଲେ ପତ୍ନୀ ପ୍ରିୟଙ୍କା । ନିଜେ ଲଢ଼ିବାକୁ ଚାହୁଁଥିବା କଥା ବି ପତିଙ୍କୁ କହିଦେଲେ । ପତ୍ନୀଙ୍କ ଇଛାକୁ ସମ୍ମାନ ଦେଲେ ପତି । ଉଭୟେ ଏକାସମୟରେ ଯାଇ ପ୍ରାର୍ଥିପତ୍ର ବି ଦାଖଲ କଲେ । ୨୦୧୩ରେ ସେମାନେ ବିବାହ କରିଥିବା ବେଳେ ସେମାନଙ୍କର ୪ ବର୍ଷର ଏକ ଝିଅ ଅଛି ।

ଛୋଟ ଝିଅକୁ ସମ୍ପର୍କୀୟଙ୍କ ପାଖରେ ଛାଡ଼ି ସେମାନେ ପ୍ରତିଦିନ ପ୍ରଚାରକୁ ଚାଲିଯାଉଛନ୍ତି । ଘରୁ ବାହାରିଲା ପରେ ଉଭୟଙ୍କର ରାସ୍ତା ଅଲଗା ହୋଇଯାଉଛି । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା ଉଭୟେ ଶିକ୍ଷା ଓ ରୋଜଗାର ନେଇ ଭୋଟରଙ୍କୁ ଭେଟୁଛନ୍ତି । ସେମାନଙ୍କୁ ଭୋଟ୍‌ ଦେବାକୁ ଅନୁରୋଧ କରୁଛନ୍ତି ।  ଗୋଟିଏ ନିର୍ବାଚନ ମଣ୍ଡଳୀରେ ପରସ୍ପର ବିରୋଧରେ ଲଢ଼ୁଥିଲେ ବି ଘରକୁ ଆସିଲେ ସେମାନେ ସ୍ୱାମୀ-ସ୍ତ୍ରୀର ଅଭିନ୍ନ ସମ୍ପର୍କରେ ବାନ୍ଧି ହୋଇଯାଉଛନ୍ତି । ମନିଷ ଓ ପ୍ରିୟଙ୍କାଙ୍କ ଲଢ଼େଇକୁ ନେଇ ଭବନାଥପୁର ନିର୍ବାଚନ ମଣ୍ଡଳୀରେ ଚର୍ଚ୍ଚା ଚାଲିଛି । ')}