ମୋବାଇଲ ବନ୍ଧକକୁ ନେଇ ଦମ୍ପତିଙ୍କ ଆତ୍ମହତ୍ୟା ଅଭିଯୋଗ

କନ୍ଧମାଳ: ଏକ ମୋବାଇଲ ପାଇଁ ଦମ୍ପତିଙ୍କ ଆତ୍ମହତ୍ୟା ଅଭିଯୋଗ । ମଦ୍ୟପ ସ୍ବାମୀ ପତ୍ନୀର ମୋବାଇଲକୁ ବନ୍ଧକ ରଖି ଟଙ୍କା ଖର୍ଚ୍ଚ କରିଦେକାକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହେବା ଓ ପରେ ଉଭୟ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଏମିତି ଘଟଣା ଘଟିଛି କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ବୁଡ୍ରୁକିଆ ଗାଁରେ ।

ଅଭିଯୋଗ ଅନୁସାରେ, ବୁଡ୍ରୁକିଆ ଗାଁର ମଝିସାହିରେ ପ୍ରମୋଦ ମଲ୍ଲିକ ଏବଂ ତାଙ୍କ ପତ୍ନୀ ପୁଆରି ମଲ୍ଲିକ ରୁହନ୍ତି । ପ୍ରମୋଦ କୌଣସି କାମଧନ୍ଦା ନକରି ଏଣେ ତେଣେ ବୁଲିବା, ମଦ୍ୟପାନ କରିବା ଆଦି ଘଟଣାକୁ ନେଇ ଉଭୟଙ୍କ ମଧ୍ୟରେ ପ୍ରାୟ ସବୁଦିନ କଳହ ଲାଗି ରହୁଥିଲା । ଏହାରି ଭିତରେ ପ୍ରମୋଦ, ପୁଆରିର ମୋବାଇଲଟିକୁ ବନ୍ଧକ ରଖି କିଛି ଟଙ୍କା ଆଣି ଖର୍ଚ୍ଚ କରିଦେଇଥିଲେ । ଯାହାକୁ ନେଇ ଗତକାଲି ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା । ଏହାପରେ ଦୁଇଟି ଘରୁ ଦୁଇ ଜଣଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଛି ।

ତେବେ ଆତ୍ମହତ୍ୟାର ପ୍ରକୃତ କାରଣ ଜଣାପଡି ନଥିବା ବେଳେ ପାରିବାରିକ କଳହରୁ ଏପରି ଘଟିଥିବା କୁହାଯାଉଛି । ଖବର ପାଇବା ପରେ ବାଲିଗୁଡ଼ା ପୋଲିସ୍ ଓ ତହସିଲଦାର ପହଁଚି ଶବ ଜବତ କରି ବ୍ୟବଛେଦ ପେଇଁ ପଠାଇଛନ୍ତି । ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।