ଆସୁଛି ‘କରୋନା ଭାଇରସ୍ ପାସପୋର୍ଟ’, କ୍ୱାରେଣ୍ଟାଇନ୍ ନରହି ବୁଲିପାରିବେ ବିଦେଶ
ନୂଆଦିଲ୍ଲୀ: ଦୁନିଆର ପ୍ରଥମ ‘କରୋନା ଭାଇରସ୍ ପାସପୋର୍ଟ’ ବୁଧବାର ବ୍ରିଟେନ୍ ଲଞ୍ଚ କରିବାକୁ ଯାଉଛି । କରୋନା ଭାଇରସ୍ ପାସପୋର୍ଟ ରଖିଥିବା ଲୋକଙ୍କୁ ଗୋଟିଏ ଦେଶରୁ ଅନ୍ୟ ଦେଶ ଯିବାପାଇଁ ସ୍ୱାଧୀନତା ମିଳିବ । ଗୋଟିଏ ଦେଶରୁ ଅନ୍ୟ ଦେଶକୁ ଗଲେ ସେଠାରେ ତାଙ୍କୁ କ୍ୱାରେଣ୍ଟାଇନ୍ କରାଯିବ ନାହିଁ । ବ୍ରିଟେନ୍ ଏଭଳି ଏକ ପାସପୋର୍ଟ ଆରମ୍ଭ କରିବାକୁ ଯାଉଛି । ଆମେରିକା ବ୍ରିଟେନର ଏହି ନିଷ୍ପତ୍ତିକୁ ସମର୍ଥନ କରିଛି ।
ପ୍ରଥମେ ୟୁନାଇଟେଡ୍ ଏୟାରଲାଇନ୍ସ ଓ କ୍ୟାଥେ ଫେସିଫିକ୍ ଯାତ୍ରା କରୁଥିବା ଯାତ୍ରୀଙ୍କୁ ନୂଆ ପାସପୋର୍ଟ ଟ୍ରାଏଲ ବେସିସରେ ଦିଆଯିବ । ଟ୍ରାଏଲ୍ ବେଳେ ଲଣ୍ଡନର ହିଥ୍ରୋ ଏୟାରପୋର୍ଟ ଓ ନ୍ୟୁୟର୍କ ନେୱାର୍କ ଲିବର୍ଟି ଅନ୍ତର୍ଜାତୀୟ ବିମାନବନ୍ଦର ଦେଇ ଯାଉଥିବା ଯାତ୍ରୀଙ୍କୁ ଏହାର ଲାଭ ମିଳିବ ।
ଭଲ୍ୟୁଣ୍ଟର ଯାତ୍ରୀଙ୍କୁ ନିଜର କରୋନା ଭାଇରସ୍ ଟେଷ୍ଟ ଫଳାଫଳ ଏକ ୱେବସାଇଟରେ ଯାତ୍ରାର ୭୨ ଘଣ୍ଟା ପୂର୍ବରୁ ଅପଲୋଡ୍ କରିବାକୁ ପଡ଼ିବ । ଯଦି, ଏହି ‘କରୋନା ଭାଇରସ୍ ପାସପୋର୍ଟ’ ସ୍କିମ୍ ସଫଳ ହେଲେ ଏହାଦ୍ୱାରା ଅନ୍ୟ ଦେଶର ଯାତ୍ରୀଙ୍କୁ ମଧ୍ୟ ଲାଭ ମିଳିବ ।
ନୂଆ ଯୋଜନା ପ୍ରକାରେ ସରକାର ଓ ଏୟାରଲାଇନ୍ସ ଲୋକଙ୍କ କରୋନା ଭାଇରସ୍ ଟେଷ୍ଟ ରେଜଲ୍ଟ ଉପରେ ଭରସା କରି ପାରିବେ । ବୁଧବାର ଆରମ୍ଭ ହେବାକୁ ଯାଉଥିବା ‘କରୋନା ଭାଇରସ୍ ପାସପୋର୍ଟ’ ଟ୍ରାଏଲ୍ ଉପରେ ଆମେରିକାର ପ୍ରମୁଖ ସ୍ୱାସ୍ଥ୍ୟ ସଂଗଠନ ସିଡିସି ନଜର ରଖିଛି ।
ନୂଆ ଡିଜିଟାଲ ପାସପୋର୍ଟରେ ଲୋକଙ୍କ କରୋନା ଭାଇରସ୍ ଟେଷ୍ଟ ସହିତ ଜଡ଼ିତ ସମସ୍ତ ତଥ୍ୟ ମହଯୁଦ୍ ରହିବ । ଯୋଜନାକୁ ବିସ୍ତାର କରିବା ପାଇଁ ଫାମନ୍ସ ପ୍ରୋଜେକ୍ଟ ନାମକ ସଂସ୍ଥା ଅନ୍ୟ କେତେକ ଦେଶ ସହିତ ଆଲୋଚନା ଆରମ୍ଭ କରିଛି । ଆସନ୍ତା ୩ ମାସ ମଧ୍ୟରେ ଅନ୍ୟ ଦେଶକୁ ମଧ୍ୟ ଏଥିରେ ଯୋଡ଼ା ଯାଇପାରେ ।
