ଚୀନ କରୋନା: ଜାନୁଆରୀରେ ମରିବେ ୬ ଲକ୍ଷ ଲୋକ !

ବେଞ୍ଜିଙ୍ଗ: ଚୀନରେ କରୋନା ବିସ୍ଫୋଟ । ଦୈନିକ କୋଟିଏରୁ ଊର୍ଦ୍ଧ୍ବ ସଂକ୍ରମିତ ଚିହ୍ନଟ ହେଉଥିବା ବେଳେ ଦିନକରେ ମୃତ୍ୟୁ ସଂଖ୍ୟା ୯ ହଜାର ଛୁଇଁଛି । ବ୍ରିଟେନର ଏକ ସଂସ୍ଥା ପକ୍ଷରୁ ଜାରି ରିପୋର୍ଟରେ ଏ ସଂକ୍ରାନ୍ତ ତଥ୍ୟ ପ୍ରକାଶ ପାଇଛି। ଜାନୁଆରୀ ପ୍ରଥମ ସପ୍ତାହ ସୁଦ୍ଧା ମୃତ୍ୟୁସଂଖ୍ୟା ୧ ଲକ୍ଷ ପାର କରିପାରେ ବୋଲି ଆଶଙ୍କା ବ୍ୟକ୍ତ କରିଛନ୍ତି ବିଶେଷଜ୍ଞ । ଜାନୁଆରୀ ଶେଷ ସପ୍ତାହ ସୁଦ୍ଧା ମୃତ୍ୟୁସଂଖ୍ୟା ପ୍ରାୟ ୬ ଲକ୍ଷ ହୋଇପାରେ ବୋଲି ଆଶଙ୍କା କରାଯାଉଛି । ଚୀନ ସରକାର କରୋନା ମୃତ୍ୟୁସଂଖ୍ୟା ଲୁଚାଉଥିବା ବିଶ୍ବ ସ୍ବାସ୍ଥ୍ୟ ସଂଗଠନ ସନ୍ଦେହ କରୁଥିବା ବେଳେ ଖୁବଶୀଘ୍ର ଏ ନେଇ ଚୀନ ସ୍ବାସ୍ଥ୍ୟ ଅଧିକାରୀ ଓ WHO ବିଶଷଜ୍ଞଙ୍କ ମଧ୍ୟରେ ଆଲୋଚନା ହୋଇଛି । କେବଳ ନ୍ୟୁକ୍ଲିକ ଏସିଡ ଟେଷ୍ଟ କରାଇଥିବା ଆକ୍ରାନ୍ତଙ୍କ ମୃତ୍ୟୁ ହେଲେ କରୋନା ମୃତ୍ୟୁ ବୋଲି ଚୀନ ସରକାର ଘୋଷଣା କରୁଥିବାରୁ ମୃତ୍ୟୁସଂଖ୍ୟା ଅତ୍ୟଧିକ କମ୍ ଦର୍ଶାଯାଉଛି ବୋଲି WHO କହିଛି ।

ଚୀନ ସରକାର ଜେନେଟିକ୍ ସିକ୍ବେନ୍ସିଂ, ହସ୍ପିଟାଲରେ ଭର୍ତ୍ତି ରୋଗୀଙ୍କ ସଂଖ୍ୟା ଓ ଟିକାକରଣ ଓ ମୃତ୍ୟୁସଂଖ୍ୟାର ସଠିକ୍ ଡାଟା ପ୍ରଦାନ କରିବାକୁ WHO ପକ୍ଷରୁ ଅପିଲ କରାଯାଇଛି । ଚୀନରେ କରୋନା ସ୍ଥିତିକୁ ଦେଖି ପୂର୍ବରୁ ବହୁ ଦେଶ ସେଠାକାର ଯାତ୍ରୀଙ୍କ ପାଇଁ ସ୍ବତନ୍ତ୍ର ଆଡଭାଇଜରୀ ଜାରି କରିଥିବା ବେଳେ ଏବେ କାନାଡା, ମରକୋ ମଧ୍ୟ କଟକଣା ଲାଗୁ କରିଛନ୍ତି । ଚୀନରେ କରୋନା ପରିସ୍ଥିତି ଅନିୟନ୍ତ୍ରିତ ଥିବା ଯୋଗୁଁ ଭାରତ ସରକାର ଆଗୁଆ ସଜାଗ ହୋଇଛନ୍ତି । ସେପଟେ ଚୀନରେ ବୃଦ୍ଧି ପାଉଥିବା କରୋନା ସଂକ୍ରମଣକୁ ନେଇ ବ୍ରିଟେନ ଚୀନ ଯାତ୍ରୀଙ୍କ ଉପରେ ପ୍ରତିବନ୍ଧକ ଲଗାଇଛି ।