ଟିକଟ କନ୍ଫର୍ମ ଥିଲେ କର୍ଫ୍ୟୁ ପାସ୍ ଲୋଡ଼ା ନାହିଁ
ନୂଆଦିଲ୍ଲୀ: କରୋନା ଭାଇରସ୍ ଏବଂ ଲକ୍ଡାଉନ୍ କାରଣରୁ ଦୀର୍ଘ ୪୮ ଦିନ ଧରି ବନ୍ଦ ରହିବା ପରେ ମଙ୍ଗଳବାରଠାରୁ ରେଳ ସେବା ଆରମ୍ଭ ହେବାକୁ ଯାଉଛି । ଏନେଇ ସୋମବାର ସନ୍ଧ୍ୟା ୬ଟାରୁ ଟିକଟ ବୁକିଂ ମଧ୍ୟ ଆରମ୍ଭ ହୋଇଛି । ତେବେ ଟିକଟ ବୁକିଂ ପରେ ବିନା ପାସ୍ରେ ଲୋକମାନେ ଘରୁ ବାହାରି କିଭଳି ଯାଆସ କରିବେ ସେନେଇ ଦ୍ୱନ୍ଦ୍ୱରେ ରହିଥିଲେ । ଏହି ଦ୍ୱନ୍ଦ୍ୱକୁ ଗୃହମନ୍ତ୍ରାଳୟ ପକ୍ଷରୁ ଦୂର କରାଯାଇଛି । ସୋମବାର କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, ଯେଉଁମାନଙ୍କ ପାଖରେ ରେଳବାଇର କନ୍ଫର୍ମ ଟିକଟ ରହିଥିବ ସେମାନଙ୍କୁ କର୍ଫ୍ୟୁ ପାସ୍ର ଆବଶ୍ୟକତା ନାହିଁ ।
ମଙ୍ଗଳବାର ଠାରୁ ପୁଣିଥରେ ଟ୍ରେନ୍ ସେବା ଆରମ୍ଭକୁ ନେଇ ଗୃହମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ମଙ୍ଗଳବାରଠାରୁ ନୂଆଦିଲ୍ଲୀରୁ ୧୫ଟି ଟ୍ରେନ୍ ଚଳାଚଳ କରିବ । କନ୍ଫର୍ମ ଟିକେଟ୍ ଥିବା ଯାତ୍ରୀମାନେ ବିନା କର୍ଫ୍ୟୁ ପାସ୍ରେ ବି ଯାତ୍ରା କରିପାରିବେ ।
ଗୃହମନ୍ତ୍ରାଳୟ ପକ୍ଷରୁ ରେଳ ଯାତ୍ରୀଙ୍କ ପାଇଁ ଗାଇଡ୍ଲାଇନ୍ ମଧ୍ୟ ଜାରି କରାଯାଇଛି । ଯେଉଁମାନଙ୍କ ପାଖରେ କନ୍ଫର୍ମ ଟିକଟ ଥିବ ସେମାନେ ହିଁ ଷ୍ଟେସନ୍ ମଧ୍ୟରେ ପ୍ରବେଶ କରିପାରିବେ । ସେଠାରେ ସାମନଙ୍କର ସ୍କ୍ରିନିଂ କରାଯିବ । ଯଦି ଯାତ୍ରୀଙ୍କଠାରେ କୌଣସି ଲକ୍ଷଣ ନଦେଖାଯାଏ ତେବେ ତାଙ୍କୁ ଟ୍ରେନ୍ ଯାତ୍ରା କରିବାକୁ ଅନୁମତି ଦିଆଯିବ । ଏହାସହ ଟ୍ରେନ୍ରେ ସାମାଜିକ ଦୂରତା ଓ ମାସ୍କ ବ୍ୟବହା କରିବା ବାଧ୍ୟତାମୂଳକ ବୋଲି କୁହାଯାଇଛି ।
