ଲକଡାଉନ୍ ୫.୦ର ଉପରେ ମାନସ ମନ୍ଥନ ଆରମ୍ଭ, ଆଜି ରାଜ୍ୟମାନଙ୍କ ସହ କଥା ହେବେ କ୍ୟାବିନେଟ ସଚିବ

ନୂଆଦିଲ୍ଲୀ: କରୋନା ସଙ୍କଟ ପରେ, ସମ୍ଭାବ୍ୟ ପଞ୍ଚମ ପର୍ଯ୍ୟାୟ ଲକଡାଉନ୍ ବିଷୟରେ ଚର୍ଚ୍ଚା ଆରମ୍ଭ ହୋଇଛି । କ୍ୟାବିନେଟ ସଚିବ ରାଜୀବ ଗୌବା ଆଜି ସମସ୍ତ ରାଜ୍ୟର ମୁଖ୍ୟ ଶାସନ ସଚିବ ଏବଂ ସ୍ୱାସ୍ଥ୍ୟ ସଚିବଙ୍କ ସହ ଏକ ବୈଠକ କରିବେ। ପ୍ରଥମ ଥର ପାଇଁ ପ୍ରଭାବିତ ମହାନଗରଗୁଡିକର ମ୍ୟୁନିସିପାଲିଟି କର୍ପୋରେସନ୍ କମିଶନରମାନେ ମଧ୍ୟ ଏହି ବୈଠକରେ ଯୋଗଦେବେ ।

ଆପଣଙ୍କୁ କହି ରଖୁଛୁ ଯେ, ଲକଡାଉନର ୪ର୍ଥ ପର୍ଯ୍ୟାୟ ଶେଷ ହେବା ପୂର୍ବରୁ ପୁଣି ଥରେ ଲକଡାଉନ୍ -୫ର ସ୍ୱର ଶୁଣିବାକୁ ମିଳୁଛି । ମେ ୩୧ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ‘ମନ କି ବାତ’ରେ ଆଲୋଚନା କରିବେ । ସୂତ୍ରରୁ ପ୍ରକାଶ ଯେ, ‘ମନ କି ବାତ’ରେ ପିଏମ ମୋଦୀ ଅନେକ କିଛି ସ୍ପଷ୍ଟ କରିପାରନ୍ତି । ସୂତ୍ରରୁ ଏହା ସ୍ପଷ୍ଟ ହେଉଛି ଯେ, ଦୁଇ ସପ୍ତାହ ପର୍ଯ୍ୟନ୍ତ ଲକଡାଉନ୍ ବୃଦ୍ଧି କରାଯାଇପାରେ ।

ସରକାର ଲୋକମାନଙ୍କୁ ଅଧିକ ରିହାତି ଦେଇ ସେମାନଙ୍କ ଜୀବନ ଏବଂ ଅର୍ଥବ୍ୟବସ୍ଥାକୁ ଟ୍ରାକକୁ ଫେରାଇ ଆଣିବାକୁ ଚେଷ୍ଟା କରୁଛନ୍ତି, କିନ୍ତୁ ଖବର ହେଉଛି ଯେ କରୋନାରେ ଅଧିକ ପ୍ରଭାବିତ ହୋଇଥିବା ଅଞ୍ଚଳରେ କିଛି କୋହଳ କରାଯିବ ନାହିଁ । ସୂଚନାନୁସାରେ, ଲକଡାଉନ୍ ୫.୦ରେ  ୧୧ଟି ସହରରେ ସମ୍ପୂର୍ଣ୍ଣ ଲକଡାଉନ ଜାରି ରହିବ । ଏହି ସହରଗୁଡିକ ଯେଉଁଠାରେ କରୋନା ସଂକ୍ରମଣ କ୍ରମାଗତ ଭାବରେ ବୃଦ୍ଧି ପାଉଛି ।

ଯେଉଁ ସହରଗୁଡ଼ିକରେ ଏହି ପ୍ରତିବନ୍ଧକ ଜାରି ରହିପାରେ ସେଗୁଡ଼ିକ ହେଉଛି ଦିଲ୍ଲୀ, ମୁମ୍ବାଇ, ବାଙ୍ଗାଲୋର, ପୁଣେ, ଠାଣେ, ଇନ୍ଦୋର, ଚେନ୍ନାଇ, ଅହମ୍ମଦାବାଦ, ଜୟପୁର, ସୁରଟ ଏବଂ କୋଲକାତା । ଏହି ୧୧ ଟି ସହରରେ ସମୁଦାୟ କରୋନା ସଂକ୍ରମିତ ସଂକ୍ରମିତଙ୍କ ସଂଖ୍ୟା ଦେଶର ୭୦ ପ୍ରତିଶତ ହୋଇଥିବାବେଳେ ଅହମ୍ମଦାବାଦ, ଦିଲ୍ଲୀ, ପୁଣେ, କୋଲକାତା ଏବଂ ମୁମ୍ବାଇରେ ଏହା ଅଧିକ ବିପଜ୍ଜନକ ହୋଇଛି । ଦେଶର ମୋଟ ସଂକ୍ରମିତଙ୍କ ମଧ୍ୟରୁ ୬୦ ପ୍ରତିଶତ ଏଠାରେ ହିଁ ଦେଖିବାକୁ ମିଳିଛି।

ଏହି କାରଣରୁ ସରକାର ଲକଡାଉନ୍-୫.୦ ବିଷୟରେ ଚିନ୍ତା କରୁଛନ୍ତି । ଲକଡାଉନ୍ -୫.୦ ରେ ସରକାର ଏହି ଅଞ୍ଚଳରେ କଠୋରତା ବଜାୟ ରଖିବେ । ଏକାସାଙ୍ଗରେ, କଣ୍ଟେନମେଣ୍ଟ ଜୋନ୍ ବ୍ୟତୀତ,  ଅନ୍ୟ ଜୋନର ଲୋକମାନଙ୍କୁ କିଛି ସର୍ତ୍ତ ରଖି ଛାଡ଼ କରାଯିବ, କିନ୍ତୁ ଏହି କୋହଳକୁ ଦୃଢ କାର୍ଯ୍ୟନୁଷ୍ଠାନ ସହିତ ପୂର୍ଣ୍ଣ କରାଯିବ ।