ଆଉ ଦିନକ ପରେ ଜଣା ପଡ଼ିବ ଆଗ ଆସିବ କାହା ଭ୍ୟାକ୍ସିନ…

ନୂଆଦିଲ୍ଲୀ: ସାରା ବିଶ୍ୱ ଏକ ଅଜଣା ଭୂତାଣୁ ସହ ଅହରହ ଲଢ଼ୁଛି । ଏ ଯୁଦ୍ଧ ମଣିଷ ମଣିଷ ମଧ୍ୟରେ ନୁହେଁ  । ଏ ଯୁଦ୍ଧ ହେଉଛି ମଣିଷ ସହ ଏକ ଅଜଣା ଭୂତାଣୁର । ଏହି ଭୂତାଣୁ ହେଉଛି କରୋନା । ଏବଂ ଏହାକୁ ହରାଇବାର ଏକ ମାତ୍ର ଅସ୍ତ୍ର ହେଉଛି ଏହାର ପ୍ରତିଷେଧକ ଟିକା । କିନ୍ତୁ ଏପର୍ଯ୍ୟନ୍ତ ବୖଜ୍ଞାନିକ ମାନେ ଶତ ଚେଷ୍ଟା ପରେ ମଧ୍ୟ ସଠିକ ଟିକା ତିଆରି କରିପାରି ନାହାନ୍ତି । ତେବେ ୨୨ ଅକ୍ଟୋବର ହେଉଛି ସେହି ତାରିଖ ଯେଉଁଦିନ ବିଶ୍ୱର ବୃହତ୍ତମ ଫାର୍ମା କମ୍ପାନୀଗୁଡ଼ିକ ସେମାନଙ୍କର କରୋନା ଟିକାର ତଥ୍ୟ ପ୍ରକାଶ କରିବେ ।

ପ୍ରଭାବଶାଳୀ ଟିକା ପ୍ରସ୍ତୁତିରେ ଅକ୍ଟୋବର ୨୨ ତାରିଖ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଯେତେବେଳେ ଏହି ଟିକାକୁ ନେଇ ତଥ୍ୟ ସମସ୍ତଙ୍କ ସାମ୍ନାକୁ ଆସିବ ସେବେ ଜାଣିବା କେଉଁ କମ୍ପାନୀର ଟିକା କରୋନା ଭୂତାଣୁ ବିରୁଦ୍ଧରେ କେତେ ପ୍ରଭାବଶାଳୀ ରହିବ । ଗୁରୁବାର ଦିନ ଆମେରିକାର ମାଡର୍ନା ଏବଂ ଫାଇଜର ସହିତ ଅକ୍ସଫୋର୍ଡ-ଆଷ୍ଟ୍ରାଜେନେକାର ଟିକା ସମ୍ବନ୍ଧୀୟ ତଥ୍ୟ ଆସିପାରେ । ଏଥିମଧ୍ୟରୁ ଅକ୍ସଫୋର୍ଡ-ଆଷ୍ଟ୍ରାଜେନେକାର ତଥ୍ୟ ଭାରତ ପାଇଁ ଅଧିକ ଗୁରୁତ୍ୱପୂର୍ଣ୍ଣ । କାରଣ ଏହାର ପରୀକ୍ଷା ଭାରତରେ ଚାଲିଛି । ଆଇସିଏମ୍ଆର ତତ୍ତ୍ୱାବଧାନରେ ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ବିଭିନ୍ନ ସ୍ଥାନରେ ‘କୋଭିସିଲ୍ଡ’ ଟିକାର ପରୀକ୍ଷଣ ଚାଲିଛି ।

ନିକଟରେ ସେରମ୍ ଇନଷ୍ଟିଚ୍ୟୁଟ୍ ଭାରତ ବାୟୋଟେକ୍ ସହିତ ସେମାନଙ୍କର ଟିକା ପରୀକ୍ଷଣ ଏବଂ ବିତରଣର ସ୍ୱାକ୍ଷର କରିଛି । କମ୍ପାନୀ ଏହା ବ୍ୟତିତ ନୋଭାଭାକ୍ସ ଏବଂ ଅକ୍ସଫୋର୍ଡ-ଆଷ୍ଟ୍ରାଜେନେକା ସହିତ ମଧ୍ୟ ଡିଲ ସ୍ୱାକ୍ଷର କରିଛି । ଭରତ ବାୟୋଟେକ୍ ସହିତ ହୋଇଥିବା ଚୁକ୍ତି ହେଉଛି ନାସାଲ୍ ଟିକା ପାଇଁ । ମିଳିତ ଭାବରେ, ସେମାନେ ୩ୟ ପର୍ଯ୍ୟାୟ ପରୀକ୍ଷା କରିବେ । ଅନ୍ୟପକ୍ଷରେ, ଭରତ ବାୟୋଟେକ ଏକ ଆମେରିକୀୟ କମ୍ପାନୀ ସହିତ ଯଡ଼ିତ ହୋଇଛି । ଯାହା ଦ୍ୱାରା ଆମେରିକାରେ ମଧ୍ୟ ଏହି ଟିକା ପରୀକ୍ଷା କରାଯାଇପାରିବ । ଖବର ଅନୁଯାୟୀ ଆସନ୍ତା ବର୍ଷ ଦ୍ୱିତୀୟ ତ୍ରୟ ମାସିକରେ ଏହି ଟିକା ବାହାରିବ ବୋଲି ଆଶା କରାଯାଉଛି ।

ଆମେରିକୀୟ କମ୍ପାନୀ ଫାଇଜର ଜର୍ମାନର ବାୟୋଏନ୍‌ଟେକ୍ ସହଯୋଗରେ ଏହି ଟିକା ପ୍ରସ୍ତୁତ କରିଛି । ନଭେମ୍ବର ସୁଦ୍ଧା ଜରୁରୀକାଳୀନ ବ୍ୟବହାର ପାଇଁ ଟିକା ଅନୁମୋଦନ କରିବାକୁ କମ୍ପାନୀ ଚେଷ୍ଟା କରୁଛି । କମ୍ପାନୀ ଅକ୍ଟୋବର ୨୨ ରେ ୪୪,୦୦ ଲୋକଙ୍କ ଉପରେ ହୋଇଥିବା ପରୀକ୍ଷାର ସୁରକ୍ଷା ତଥ୍ୟ ପ୍ରକାଶ କରିବ । ତେବେ ଟିକା କେବେ ଉପଲବ୍ଧ ହେବ ତାହା ଏପର୍ଯ୍ୟନ୍ତ ସ୍ଥିର କରାଯାଇ ନାହିଁ । କମ୍ପାନୀର ମୂଲ୍ୟ ନୀତି ଯୋଗୁଁ ଏହି ଟିକା ବହୁତ ମହଙ୍ଗା ହେବ । ତେବେ ଗତ ସପ୍ତାହରେ ଜନସନ ଆଣ୍ଡ ଜନସନର ଟିକା ପରୀକ୍ଷା ବନ୍ଦ ହୋଇଯାଇଥିଲା କାରଣ କିଛି ସ୍ୱାଚ୍ଛାସେବୀଙ୍କଠାରେ କିଛି ‘ରୋଗ’ ଦେଖାଯାଇଥିଲା ।