ଓଡ଼ିଆ ଯୁବକଙ୍କ ଦେହରେ କରୋନା ଭ୍ୟାକ୍ସିନ୍ ପରୀକ୍ଷା… ସ୍କ୍ରିନିଂ ଓ ରକ୍ତ ପରୀକ୍ଷା ପରେ ଦିଆଗଲା ଟିକା
ସମ୍ବଲପୁର: ଓଡ଼ିଆ ଯୁବକଙ୍କ ଦେହରେ କରୋନା ଭ୍ୟାକ୍ସିନ୍ ପରୀକ୍ଷା କରାଯାଇଛି। ଅକ୍ସଫୋର୍ଡ ବିଶ୍ୱବିଦ୍ୟାଳୟର ଜେନର ଇନ୍ଷ୍ଟିଚ୍ୟୁଟ୍ ପକ୍ଷରୁ ପ୍ରସ୍ତୁତ କରୋନା ଭାକ୍ସିନ୍ ପରୀକ୍ଷା କରାଯାଇଛି। ସମ୍ବଲପୁରର ଓଡିଆ ଯୁବକ ଅଙ୍କନ ନାୟକଙ୍କ ଦେହରେ କୋଭିଡ୍ ଭାକ୍ସିନ୍ ଟ୍ରାଏଲ କରାଯାଇଛି। ସେ ଏନେଇ ସାମାଜିକ ଗଣମାଧ୍ୟମରେ ସୂଚନା ଦେଇଛନ୍ତି।
ସ୍କ୍ରିନିଂ ଓ ରକ୍ତ ପରୀକ୍ଷା ପରେ ଗତ ଶନିବାର ତାଙ୍କ ଦେହରେ ଭାକ୍ସିନ୍ ପରୀକ୍ଷା କରାଯାଇଛି। ଅଙ୍କନ ପେସାରେ ଜଣେ ସଫ୍ଟୱେର ଇଞ୍ଜିନିୟର। ହେଲେ ସେ କରୋନା ମୁକାବିଲା ପାଇଁ ପ୍ରସ୍ତୁତ ହେଉଥିବା ଭାକ୍ସିନର ମଣିଷ ଦେହରେ ଟ୍ରାଏଲ ପାଇଁ ସ୍ୱେଚ୍ଛାକୃତ ଭାବେ ସାମିଲ ହୋଇଛନ୍ତି।
ଜଣେ ସୁସ୍ଥ ଲୋକ ଦେହରେ ଏହା କିପରି କାମ ଦେଉଛି ତାହା ଜଣାପଡ଼ିବ। ଦ୍ୱିତୀୟ ଓ ତୃତୀୟ ପର୍ଯ୍ୟାୟରେ ୧୦ ହଜାରରୁ ଅଧିକ ଲୋକଙ୍କଠାରେ ଭ୍ୟାକ୍ସିନ୍ ପରୀକ୍ଷା କରାଯାଇଛି। ଯଦି ଏହା ସଫଳ ହୁଏ ତେବେ ଚଳିତ ବର୍ଷ ଅକ୍ଟୋବର ବେଳକୁ ବଜାରକୁ କରୋନା ଭ୍ୟାକ୍ସିନ୍ ଆସିପାରେ।
ଭ୍ୟାକ୍ସିନ୍ ପାଇଁ ଭାରତୀୟ ବୈଜ୍ଞାନିକଙ୍କ ଦ୍ୱାରା ଅନେକ ଅନୁସନ୍ଧାନ କରାଯାଉଛି । ପୂର୍ବରୁ ଭ୍ୟାକ୍ସିନ୍ ପରୀକ୍ଷଣ ପଶୁଙ୍କ ମଧ୍ୟରେ କରାଯାଇଥିଲା । ଏଥିରେ ସଫଳ ହେବା ପରେ ଏହା ମଣିଷଙ୍କ ଉପରେ ପରୀକ୍ଷା କରାଯାଇଛି । ଭାରତୀୟ ବୈଜ୍ଞାନିକଙ୍କୁ ସମ୍ପୂର୍ଣ୍ଣ ସଫଳତା ପାଇଁ ଅନେକ ସମୟ ଲାଗିପାରେ । ବିଶ୍ୱବ୍ୟାପୀ ୭୫ ଜଣ ବୈଜ୍ଞାନିକ ଦଳ ଏହି ଟୀକା ପରୀକ୍ଷଣରେ ଲାଗିପଡିଛନ୍ତି । ତେବେ ଏହି ଭ୍ୟାକ୍ସିନ ପରୀକ୍ଷଣ କେତେ ସଫଳ ହେଉଛି ତାହା ଫଳାଫଳ ଆସିବା ପରେ ହିଁ ସ୍ପଷ୍ଟ ହେବ ।
