ସୁପ୍ରିମକୋର୍ଟଙ୍କ କେନ୍ଦ୍ର ସରକାରଙ୍କୁ ପ୍ରଶ୍ନ : ଘରୋଇ ହସ୍ପିଟାଲରେ କରୋନା ଚିକିତ୍ସା ଖର୍ଚ୍ଚ ସୀମା ନିର୍ଦ୍ଧାରଣ ହେବା ଉଚିତ୍ କି ?
ନୂଆଦିଲ୍ଲୀ: ଘରୋଇ ହସ୍ପିଟାଲ ଗୁଡିକରେ କରୋନା ଚିକିତ୍ସା ଖର୍ଚ୍ଚ ସୀମା ନିର୍ଦ୍ଧାରଣ କରିବା ପାଇଁ ଦାଏର ଆବେଦନକୁ ସୁପ୍ରିମକୋର୍ଟ ଶୁଣାଣି ପାଇଁ ଗ୍ରହଣ କରିଛନ୍ତି । ଏହି ପ୍ରସଙ୍ଗରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କ ପକ୍ଷ ଜାଣିବାକୁ ଚାହିଁଛନ୍ତି । ସଲିସିଟର ଜେନରାଲ ତୁଷାର ମେହଟାଙ୍କୁ ଏକ ସପ୍ତାହ ମଧ୍ୟରେ ଯବାବ ରଖିବାକୁ କହିଛନ୍ତି ସୁପ୍ରିମକୋର୍ଟ । ଆବେଦନ ଉପରେ ଶୁଣାଣି ଏକ ସପ୍ତାହ ପରେ ହେବ ।
ଏହା ପୂର୍ବରୁ ସୁପ୍ରିମକୋର୍ଟ ଘରୋଇ ଓ ଦାତବ୍ୟ ଚିକିତ୍ସାଳୟରେ କରୋନା ସଂକ୍ରମିତଙ୍କ ମାଗଣା କିମ୍ବ କମ ଖର୍ଚ୍ଚରେ ଚିକିତ୍ସା କରାଯାଇ ପାରିବ କି ବୋଲି କେନ୍ଦ୍ର ସରକାରଙ୍କୁ ପ୍ରଶ୍ନ ପଚାରି ଥିଲେ । କେନ୍ଦ୍ର ଏନେଇ ଗୁରୁବାର ଦିନ ସତ୍ୟପାଠ ଦାଖଲ କରିଥିଲା । କେନ୍ଦ୍ର ତରଫରୁ ଉତ୍ତରରେ କୁହାଯାଇଥିଲା ଯେ, ଏଭଳି ନିର୍ଦ୍ଦେଶ ଦେବା ପାଇଁ ଆମ ପାଖରେ କୌଣସି ଆଇନଗତ ଶକ୍ତି ନାହିଁ ।
କ୍ଲିନିକାଲ ଏଷ୍ଟାବ୍ଲିସମେଣ୍ଟ୍ ଆଇନ୍ ୨୦୧୦ ଅନ୍ତର୍ଗତରେ ହସ୍ପିଟାଲଙ୍କୁ ନିର୍ଦ୍ଦେଶ ଦେବା ପାଇଁ କୌଣସି ବ୍ୟବସ୍ଥା ନାହିଁ ବୋଲି କେନ୍ଦ୍ର ନିଜ ସତ୍ୟପାଠରେ କହିଛି । ସାର୍ବଜନୀକ ଭୂମି ଉପରେ ପ୍ରତିଷ୍ଠା ହୋଇଥିବା ଘରୋଇ ହସ୍ପିଟାଲରେ କରୋନା ରୋଗୀଙ୍କ ମାଗଣା ଚିକିତ୍ସା କରାଯିବା ପାଇଁ ଆଦେଶ କେବଳ ସମ୍ବନ୍ଧିତ ରାଜ୍ୟ ଦେଇ ପାରିବେ ବୋଲି ସତ୍ୟପାଠରେ କୁହାଯାଇଛି ।
କେନ୍ଦ୍ର ସରକାର କହିଛନ୍ତି ଯେ ମାଗଣା ଚିକିତ୍ସା ଭଳି ଦାବି ଦ୍ୱାରା ଚ୍ୟାରିଟେବଲ ହସ୍ପିଟାଲଙ୍କ ଆର୍ଥିକ ସ୍ୱାସ୍ଥ୍ୟା ଉପରେ ପ୍ରଭାବ ପଡିବ । କୌଣସି ପ୍ରକାରର ଶୁଣାଣି ପୂର୍ବରୁ ଚ୍ୟାରିଟେବଲ ସଂସ୍ଥାଙ୍କୁ ଶୁଣାଣିର ଅବସର ଦିଆଯିବା ଉଚିତ ବୋଲି କେନ୍ଦ୍ର କହିଛି ।
