ଭାରତ ପାଇଁ ଭଲ ଖବର : ଖୁବଶୀଘ୍ର ସଂକ୍ରମିତଙ୍କ ତୁଳନାରେ ସୁସ୍ଥଙ୍କ ସଂଖ୍ୟା ବଢିବ

ନୂଆଦିଲ୍ଲୀ: କରୋନା ବିରୋଧରେ ଦେଶ ଯୁଦ୍ଧ ଘୋଷଣା କରିଛି ।  କରୋନା ବିରୋଧରେ ସବୁ ରାଜ୍ୟ ବଡଧରଣର ପ୍ରସ୍ତୁତି କରିଛନ୍ତି । ଅତ୍ୟଧିକ ସଂକ୍ରାମକ ହୋଇଥିବାରୁ ପ୍ରତିଦିନ ଅଧିକ ସଂଖ୍ୟାରେ ଲୋକ ଏହାଦ୍ୱାର ସଂକ୍ରମିତ ହେଉଛନ୍ତି । ତେବେ ଭଲ ଖବର ହେଉଛି ଦେଶରେ ମୃତ୍ୟୁ ପ୍ରତିଶତ ହ୍ରାସ ପାଇବା ସହ ସୁସ୍ଥ ହେଉଥିବା ବ୍ୟକ୍ତିଙ୍କ ସଂଖ୍ୟା ବଢିବାରେ ଲାଗିଛି ।

ମୃତ୍ୟୁସଂଖ୍ୟା କମୁଛି

୪୫ ଦିନ ତଳେ କୋଭିଡ୍-୧୯ରେ ସଂକ୍ରମିତଙ୍କ ମଧ୍ୟରେ ମୃତ୍ୟୁହାର ୩.୩ ପ୍ରତିଶତ ଥିଲା  । ବର୍ତ୍ତମାନ ଏହି ସଂଖ୍ୟା ହ୍ରାସ ପାଇଁ ୨.୮୩ ପ୍ରତିଶତ ହୋଇଛି । ୧୮ ମେ’ରେ ମୃତ୍ୟୁହାର ୩.୧୫ ପ୍ରତିଶତ ଥିଲା ଯେତେବେଳେକି ମେ ୩ ତାରିଖରେ ଏହା ୩.୨୫ ପ୍ରତିଶତ ଥିଲା । ଭାରତରେ ଗୋଟିଏ ଦିନରେ ସର୍ବାଧିକ ମୃତ୍ୟୁସଂଖ୍ୟା ଥିଲା ୨୩୦ । ଦେଶରେ ମୋଟ ୫୫୯୮ ଜଣ କରୋନା କାରଣରୁ ପ୍ରାଣ ହରାଇଛନ୍ତି ।

ଡିସଚାର୍ଜ୍ ସଂଖ୍ୟା ବଢିବାରେ ଲାଗିଛି

ଦେଶରେ ଏବେ ୯୩ ହଜାର ୩୨୨ ଆକ୍ଟିଭ୍ କେସ୍ ରହିଛି । ୯୧ ହଜାର ୮୧୮ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ଗତ ୨୪ ଘଣ୍ଟା ଭିତରେ ୪ ହଜାର ୮୩୫ ଜଣ ହସ୍ପିଟାଲରୁ ସୁସ୍ଥ ହୋଇ ଘରକୁ ଫେରିଛନ୍ତି । କେନ୍ଦ୍ର ସରକାରଙ୍କ ୮ ମେ’ ଗାଇଡଲାଇନ୍ ଅନୁସାରେ ସାମାନ୍ୟ ଓ ମଧ୍ୟମ କରୋନା ପୀଡିତଙ୍କଠାରେ ଯଦି ଲକ୍ଷଣ ବଢେ ନାହିଁ ତେବେ ସେମାନଙ୍କୁ ୧୦ ଦିନରେ ଘରକୁ ଛାଡି ଦିଆଯାଉଛି ।

ରିକଭରି ରେଟରେ ମଧ୍ୟ ସୁଧାର

କୋଭିଡ୍-୧୯ ରିକଭରି ରେଟରେ ମଧ୍ୟ ସୁଧାର ଦେଖିବାକୁ ମିଳିଛି । ଏବେ ଏହା ୪୮.୧୯ ପ୍ରତିଶତ ପର୍ଯ୍ୟନ୍ତ ପହଂଚିଛି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଡାଟା ଅନୁସାରେ ୧୮ ମେ’ରେ ରିକଭରି ରେଟ୍ ୩୮.୨୯ ପ୍ରତିଶତ ଥିଲା । ଯେତେବେଳେ କି ମେ’ ୩ରେ ଏହା ୨୫.୫୯ ପ୍ରତିଶତ ଥିଲା । ଏପ୍ରିଲ ୧୫ରେ ରିକଭରି ରେଟ୍ ୧୧.୪୨ ପ୍ରତିଶତ ଥିଲା ।

ଏଇଥିପାଇଁ କମିଛି ମୃତ୍ୟୁ ସଂଖ୍ୟା

ସ୍ୱାସ୍ଥ୍ୟମନ୍ତ୍ରଣାଳୟ ଅନୁସାରେ ଦେଶରେ ମୃତ୍ୟୁ ସଂଖ୍ୟା କମିବାର ମୁଖ୍ୟ କାରଣ ହେଉଛି ରୋଗର ସଠିକ ସମୟରେ ନିରୁପଣ ଓ ତୁରନ୍ତ ଚିକିତ୍ସା ।

ଆଗକୁ ବଢିବ ସଂକ୍ରମିତଙ୍କ ସଂଖ୍ୟା କିନ୍ତୁ..

ଆଗକୁ ଦେଶରେ ସଂକ୍ରମିତଙ୍କ ସଂଖ୍ୟା ବଢିବ । ଏହାର କାରଣ ହେଉଛି ପ୍ରବାସୀ ଶ୍ରମିକଙ୍କ ନିଜ ରାଜ୍ୟକୁ ପଳାୟନ  ଓ ଲକଡାଉନରେ ରିହାତି । ସରକାରଙ୍କ ଲକ୍ଷ୍ୟ ହେଉଛି ଅଧିକର ଅଧିକ ଟେଷ୍ଟିଂ ଓ ରୋଗୀଙ୍କ ଶୀଘ୍ର ଚିକିତ୍ସା ।

ଅନ୍ୟ ଦେଶଙ୍କ ତୁଳନରା ଭାରତର ସ୍ଥିତି ଭଲ

ମୃତ୍ୟୁହାରକୁ ଦେଖିଲେ ଭାରତର ସ୍ଥିତି ଅନ୍ୟ ଦେଶ ତୁଳନାରେ ଭଲ ରହିଛି । ବିଶ୍ୱସ୍ତରରେ କୋଭିଡ୍-୧୯ କାରଣରୁ ମୃତ୍ୟୁ ପ୍ରତିଶତ ୬.୧୯ ଥିବାବେଳେ ଭାରତରେ ଏହା ୨.୮୩ ପ୍ରତିଶତ । ଫ୍ରାନ୍ସରେ ଏହା ୧୯.୩୫ ପ୍ରତିଶତ । ଫ୍ରାନ୍ସ ପରେ ମୃତ୍ୟୁ ସଂଖ୍ୟା ଦୃଷ୍ଟିରୁ ବେଲଜିୟମ ଦ୍ୱିତୀୟ ସ୍ଥାନରେ ଅଛି । ବେଲଜିୟମରେ ଏହା ୧୬.୨୫ ପ୍ରତିଶତ ।