ଗ୍ୱାଲିୟର: ମଧ୍ୟପ୍ରଦେଶର ଗ୍ୱାଲିୟର ଜିଲ୍ଲାରେ ୫୦ ଡାକ୍ତର ଏକାସାଙ୍ଗରେ ଇସ୍ତଫା ଦେଇଛନ୍ତି। ସୂଚନା ରହିଛି ଯେ କରୋନା କାରଣରୁ ଏହି ସମସ୍ତ ଡାକ୍ତର ଇସ୍ତଫା ଦେଇଛନ୍ତି । ଡାକ୍ତରଙ୍କ ଏହି ଇସ୍ତଫା ପରେ ସ୍ୱାସ୍ଥ୍ୟ ବିଭାଗରେ ଆଲୋଡନ ସୃଷ୍ଟି ହୋଇଛି । ଯଦିଓ ରାଜ୍ୟରେ ESMA ଲାଗୁ ଅଛି, ଏହା ଲାଗୁ ହେବା ପରେ ଜରୁରୀ କାଳୀନ ସେବାରେ ଥିବା କର୍ମଚାରୀ ମାନେ ତାଙ୍କ ଡ୍ୟୁଟୀରୁ ହଟି ପାରିବେ ନାହିଁ । ଅନ୍ୟପଟେ ଡାକ୍ତର ମାନଙ୍କ କହିବା ଅନୁସାରେ ESMA ଲାଗୁ ହେବା ପୂର୍ବରୁ ସେମାନେ ଇସ୍ତଫା ଦେଇଛନ୍ତି ।
କରୋନା କାରଣରୁ ଗ୍ୱାଲିୟରର ଗଜରାଜ ମେଡିକାଲ କଲେଜରେ ୩ ମାସ ପାଇଁ ୯୨ ଜଣ ଡାକ୍ତରଙ୍କ ନିଯୁକ୍ତି କରାଯାଇଥିଲା । ଏହି ସମସ୍ତ ଡାକ୍ତର ଜିଆର ମେଡିକାଲ କଲେଜରୁ ପାସଆଉଟ ହୋଇଥିବା ସୂଚନା ରହିଛି । ସେମାନଙ୍କ ନିଯୁକ୍ତି ଭିନ୍ନ ଭିନ୍ନ ବିଭାଗରେ ଅସ୍ଥାୟୀ ରୂପରେ ହୋଇଥିଲା । ରାଜ୍ୟକୁ କରୋନା ସଂକ୍ରମଣରୁ ରକ୍ଷା କରିବା ପାଇଁ ମେଡିକାଲ ଶିକ୍ଷା ବିଭାଗ ଗଜରାଜ ମେଡିକାଲ କଲେଜ ସମେତ ରାଜ୍ୟର ଅନ୍ୟ ମେଡିକାଲ କଲେଜରେ ଏମବିବିଏସରେ ଇଣ୍ଟର୍ନସିପ କରୁଥିବା ଡାକ୍ତରୀ ଛାତ୍ରଛାତ୍ରୀଙ୍କୁ ଅସ୍ଥାୟୀ ନିଯୁକ୍ତି ପାଇଁ ନିର୍ଦ୍ଦେଶ ଦେଇଥିଲେ ।
ଡାକ୍ତରଙ୍କ ହଠାତ ଏଭଳି ଇସ୍ତଫା ଦେବାରୁ ଡାକ୍ତରଖାନାରେ ଥିବା ରୋଗୀଙ୍କ ସମସ୍ୟା ବୃଦ୍ଧି ପାଇଛି ।
ଇସ୍ତଫା ଦେଇଥିବା ଡାକ୍ତରମାନେ କହିଛନ୍ତି ଯେ, ପ୍ରଥମେ ସେମାନେ କରୋନା ଡ୍ୟୁଟି ପାଇଁ ରାଜି ହୋଇଥିଲେ। ପରେ ଆଦେଶ ଆସିଲା ଯେ ଯେଉଁମାନେ କରୋନା ଡ୍ୟୁଟି କରିବାକୁ ଇଚ୍ଛା ପ୍ରକାଶ କରୁଛନ୍ତି ସେମାନେ ଡ୍ୟୁଟି କରିବେ ଅନ୍ୟଥା ଯେଉଁମାନେ ରାଜି ନାହାନ୍ତି ସେମାନେ ଅଥିରୁ ଓହରି ପାରିବେ । ଏହି ସୂଚନା ପରେ ଡାକ୍ତର ମାନେ ଇସ୍ତଫା ଦେଇଥିବା ସୂଚନା ମିଳିଛି ।
