ଦେଶଠୁ ରାଜ୍ୟରେ ମୃତ୍ୟୁହାର କମ୍, ପରୀକ୍ଷା ହାର ଅଧିକ

ଭୁବନେଶ୍ୱର: ଦେଶ ସହ ରାଜ୍ୟରେ ଆଜିଠୁ ଚତୁର୍ଥ ପର୍ଯ୍ୟାୟ ଲକଡାଉନ୍ ଲାଗୁ ହୋଇଛି । ଏହା ମେ ୩୧ ପର୍ଯ୍ୟନ୍ତ ବଳବତ୍ତର ରହିବ ବୋଲି ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ । ତେବେ, ସଂକ୍ରମଣ କ୍ଷେତ୍ରରେ ଦେଶ ଓ ଅନ୍ୟ ରାଜ୍ୟ ଅପେକ୍ଷା ଓଡ଼ିଶାର ସ୍ଥିତି ଭଲ ରହିଛି । ଲକ୍ଷେ ଲୋକରେ ୨୦୮ ଜଣଙ୍କ ଟେଷ୍ଟିଂ ହେଉଛି । ଦେଶରେ ସଂକ୍ରମିତଙ୍କ ମୃତ୍ୟୁହାର ୩.୧୫ ପ୍ରତିଶତ ରହିଥିବା ବେଳେ ରାଜ୍ୟର ଏହା ୦.୪୬ ପ୍ରତିଶତ । ଏହି ମୃତ୍ୟୁହାର ଦେଶରେ ସର୍ବନିମ୍ନ ।

ଦେଶରେ ୨୩.୯୩ ନମୁନା ପରୀକ୍ଷଣରେ ଗୋଟିଏ ପଜିଟିଭ୍ କେସ୍ ଆସୁଛି । ରାଜ୍ୟରେ ୧୦୯ଟି ନମୁନା ପରୀକ୍ଷା ପରେ ଗୋଟିଏ ପଜିଟିଭ୍ କେସ୍ ମିଳୁଛି । ଆଜି ରାତିରେ ଓଡ଼ିଶା ଲକ୍ଷେ ଟେଷ୍ଟ ସମ୍ପୂର୍ଣ୍ଣରେ ସକ୍ଷମ ହେବ । ଦେଶରେ ଏଯାଏଁ ୨୩ ଲକ୍ଷ ଟେଷ୍ଟ ହୋଇଛି । ଖୁସିର କଥା ହେଉଛି- ଭୁବନେଶ୍ୱର ମହାନଗର ନିଗମରେ ଏବେ କେହି କରୋନା ପଜିଟିଭ୍ କେସ୍ ନାହିଁ ।

ଦିନ ୧୨ଟା ସୁଦ୍ଧା ରାଜ୍ୟରେ ୮୭୬ଟି ସଂକ୍ରମଣ ମାମଲା ଆସିଥିବା ବେଳେ ୨୭୭ ଜଣ ସୁସ୍ଥ ହୋଇ ଫେରିଛନ୍ତି । ଭାରତ ସରକାରଙ୍କ ମାନଦଣ୍ଡ ଠାରୁ କଠିନ ମାନଦଣ୍ଡ ରାଜ୍ୟରେ ଆପଣାଯାଉଛି । ରାଜ୍ୟରେ ଫେରନ୍ତାଙ୍କ ଲାଗି କ୍ୱାରେଣ୍ଟାଇନ୍ ବାଧ୍ୟତାମୂଳକ ହୋଇଛି । ୮୭୬ଟି ସଂକ୍ରମଣ ମାମଲାରୁ କ୍ୱାରେଣ୍ଟାଇନ୍ ସେଣ୍ଟରରୁ ୭୫୪ଟି କେସ୍ ଆସିଛି । ୧୨୨ଟି ସଂକ୍ରମଣ ସମ୍ପର୍କରେ ଆସି ହୋଇଛି ।