ସୋସିଆଲ ମିଡିଆରେ କରୋନା କୋକୁଆ ଭୟ,କେତେ ସତ କେତେ ମିଛ !
କରୋନା ଡରାଉଛି । ଦୁନିଆ କରୋନା ଡରରେ ଥରହର କହଲେ ଭୁଲ ହେବନି । କରୋନାର କୋକୁଆ ଭୟକୁ ଇନ୍ଧନ ଯୋଗାଉଛି ସୋସିଆଲ ମିଡିଆରେ ଭାଇରାଲ ହେଉଥିବା ଗୁଜବ ସବୁ । ଚୀନରୁ ବାହାରିଥିବା ଏହି ମହାମାରିରେ ଏପର୍ଯ୍ୟନ୍ତ 3,283 ଜଣ ପ୍ରାଣ ହରାଇଲେଣି । ଭାରତରେ ରିପୋର୍ଟ ଲେଖା ହେବା ପର୍ଯ୍ୟନ୍ତ ୨୯ ଜଣ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇଛି । ଏମିତିରେ ସୋସିଆଲ ମିଡିଆରେ ଭାଇରାଲ ହେଉଥିବା ଖବର କେତେ ମିଛ କେତେ ସତ ତାହା ଜାଣିବା ଜରୁରୀ । ଆସନ୍ତୁ ଜାଣିବା ଏମିତି ୧୦ ଗୁଜବ ବିଶୟରେ ଯାହା ସଂପୂର୍ଣ୍ଣ ମିଛ..
- ଭାଇରାଲ ପୋଷ୍ଟ: ଆପଣଙ୍କ ରଙ୍ଗ ଯଦି କଳା,ତେବେ କରୋନା ଆପଣଙ୍କର କିଛି ବିଗାଡି ପାରିବ ନାହିଁ । ସୋସିଆଲ ମିଡିଆରେ ଜୋରରେ ଭାଇରାଲ ହେଉଥିବା ଏକ ପୋଷ୍ଟ ଅନୁସାରେ ଜଣେ ବ୍ୟକ୍ତି କରୋନା କବଳରୁ ଏଥିପାଇଁ ବଂଚିଗଲେ ଯେ, ତାଙ୍କ ରଙ୍ଗ କଳା ଥିଲା । କଳା ରଙ୍ଗ ବାଲାଙ୍କ କରୋନା ପ୍ରତିରୋଧକ ଶକ୍ତି ଅଧିକ ବୋଲି ଏହି ଭାଇରାଲ ପୋଷ୍ଟ ଦାବି କରୁଛି ।
ସତ: ବିଶେଷଜ୍ଞଙ୍କ ଅନୁସାରେ କରୋନା କଳା ଗୋର ଦେଖି ଆକ୍ରମଣ କରେନା । କଳା ରଙ୍ଗ ଲୋକଙ୍କ କରୋନା ପ୍ରତିରୋଧକ ଶକ୍ତି ଅଧିକ ବୋଲି ହେଉଥିବା ଦାବି ମିଛ । ସେମିତି ହୋଇଥିଲେ ଆଫ୍ରିକୀୟ ଲୋକ କରୋନା ଦ୍ୱାରା ସଂକ୍ରମିତ ହୋଇ ନଥାନ୍ତେ । - ଭାଇରାଲ ପୋଷ୍ଟ:ମଦ ପିଇଲେ କରୋନା କିଛି କରି ପାରିବ ନାହିଁ
ସତ: ବିଶ୍ୱସ୍ସସ୍ଥ୍ୟ ସଂଗଠନ ତରଫରୁ କରୋନାକୁ ନେଇ ଜାରି କରା ଯାଇଥିବା ଗାଇଡ୍ ଲାଇନରେ ମଦ ସମ୍ବନ୍ଧରେ ଉଲ୍ଲେଖ ତ’ ଅଛି । କିନ୍ତୁ କେଉଁଠି ମଧ୍ୟ ଏହା ଦାବି କରିନି ଯେ, ମଦ ପିଇବା ଦ୍ୱାରା କରୋନା ସଂକ୍ରମଣରୁ ବଂଚା ଯାଇ ପାରିବ । ଡବ୍ଲ୍ୟୁଏଚଓ କହିଛି ଯେ, ହାତ ଧୋଇବା କରୋରନାରୁ ବଂଚିବାର ଏକ ଉପାୟ । ହାତ ଅଧିକ ମଇଳା ହୋଇଥିଲେ ମଦ ଆଧାରିତ ହ୍ୟାଣ୍ଡ୍ ୱାସ୍ ବ୍ୟବହାର କରିବାକୁ ବିଶ୍ୱସ୍ୱସ୍ଥ୍ୟ ସଂଗଠନ ପରାମର୍ଶ ଦେଇଛି । କିନ୍ତୁ ମଦ ପିଇବା ଦ୍ୱାରା କରୋନାରୁ ବର୍ତ୍ତି ହେବ ଏକଥା କହିନାହିଁ ।
- ଭାଇରାଲ ପୋଷ୍ଟ: ଇସଲାମ୍ ଧର୍ମ ଗ୍ରହଣ କଲେ କରୋନା କିଛି କରିବ ନାହିଁ । ଚୀନରେ ଲୋକ ଇସଲାମ ଧର୍ମ ଗ୍ରହଣ କରୁଛନ୍ତି,କୋରାନରେ ଅଛି କରୋନାରୁ ବଂଚିବା ଉପାୟ
ସତ: ଡାହା ମିଛ । ରୋଗ ଧର୍ମ ଦେଖେ ନାହିଁ । ଏତିକି ବୁଝିବା ନିଶ୍ଚୟ ରକେଟ୍ ସାଇନ୍ସ ନୁହେଁ ।
- ଭାଇରାଲ ପୋଷ୍ଟ: ଥାଇଲାଣ୍ଡରେ ଆଣ୍ଟି ଏଚଆଇଭି ଡ୍ରଗ୍ ଦ୍ୱାରା କରୋନା ରୋଗୀ ୪୮ ଘଣ୍ଟାରେ ଠିକ୍ ହେଲେ ।
ସତ: କରୋନା ଭାଇରସ ସଂକ୍ରମିତଙ୍କୁ ୪୮ ଘଣ୍ଟାରେ ଠିକ୍ କରାଯିବା ଦାବି ସଂପୂର୍ଣ୍ଣ ରୂପେ ଭୁଲ । ଥାଇଲାଣ୍ଡ୍ ସ୍ୱାସ୍ଥ୍ୟ ବିଭାଗ ଅନୁସାରେ ରୋଗୀଙ୍କୁ ଆଣ୍ଟି ଏଚଆଇଭି ଡ୍ରଗ୍ ଦିଆଯାଇଥିଲା । ୪୮ ଘଣ୍ଟାରେ ତାଙ୍କ ସ୍ୱାସ୍ଥ୍ୟରେ ଉନ୍ନତି ହୋଇଥିଲା କିନ୍ତୁ ସେ ପୁରାପୁରି ଠିକ୍ ହୋଇନଥିଲେ ।
- ଭାଇରାଲ ପୋଷ୍ଟ: ଚୀନରେ କରୋନା ସଂକ୍ରମିତଙ୍କୁ ସରକାର ହତ୍ୟା କରୁଛନ୍ତି ।
ସତ: ଏଭଳି ଦାବି ମିଛ ପ୍ରମାଣିତ ହୋଇଛି । ଚାଇନା ଗ୍ଲୋବାଲ ଟେଲିଭିଜନ୍ ନେଟୱର୍କ ଏଭଳି ଦାବିକୁ ଖଣ୍ଡନ କରିଥିଲା । -
ଭାଇରାଲ ପୋଷ୍ଟ : ରସୁଣ କରୋନା ଭାଇରସ ବିରୋଧରେ ବ୍ରହ୍ମାସ୍ତ୍ର
ସତ: ବିଶ୍ୱସ୍ୱାସ୍ଥ୍ୟ ସଂଗଠନ ଏଭଳି ଦାବିକୁ ଖଣ୍ଡନ କରିଛି । -
ଭାଇରାଲ ପୋଷ୍ଟ : ହୋଲିରେ ଚୀନ ସାମଗ୍ରୀ ନକିଣିବାକୁ ଭାରତ ସରକାରଙ୍କ ଅପିଲ।
ସତ: ନା ଭାରତ ସରକାର ନା ବିଶ୍ୱସ୍ୱାସ୍ଥ୍ୟ ସଂଗଠନ କେହି ମଧ୍ୟ ଏଭଳି ଗାଇଡ୍ ଲାଇନ୍ ଜାରି କରି ନାହାନ୍ତି । - ଭାଇରାଲ ପୋଷ୍ଟ:ଗୋଟିଏ ଭାଇରାଲ ଭିଡିଓରେ ଚୀନ ଭାଇରସ ବ୍ୟାପିବାକୁ ରୋକିବା ପାଇଁ ଦେଶ ଭିତରେ କିଛି ଅଂଚଳ ମଧ୍ୟକୁ ସଡକ ବନ୍ଦ କରିଦେଇଛି ।
ସତ: ଏଭଳି ଦାବି ମିଥ୍ୟା ବୋଲି ଚୀନ ଦାବି କରିଛି ।
- ଭାଇରାଲ ପୋଷ୍ଟ: ଭାରତ କରୋନା ଭାଇରସର ଟିକା ଉଦ୍ଭାବନ କରିଛି ।
ସତ: ସୋସିଆଲ ମିଡିଆରେ ଉଡିଥିବା ମିଛ । ଭାରତ ଏପର୍ଯ୍ୟନ୍ତ କୌଣସି ଟିକା ବିକଶିତ କରିନାହିଁ ।
- ଭାଇରାଲ ପୋଷ୍ଟ:ସୋସିଆଲ ମିଡିଆରେ କାର୍ଟୁନ ପ୍ରୋଗ୍ରାମ ’ଦ ସିମ୍ପସନ୍ସ’ର ଫଟୋ ଭାଇରାଲ ହୋଇଥିଲା । ୧୯୯୩ ମସିହାରେ ପ୍ରସାରିତ ଗୋଟିଏ ଏପିସୋଡରେ କରୋନା ଭାଇରସ ସମ୍ପର୍କରେ ଭବିଷ୍ୟବାଣୀ କରା ଯାଇଥିଲା ବୋଲି ଦାବି କରା ଯାଉଛି ।
ସତ: ‘‘ଦ ସିମ୍ପସନ୍ସ’’ର ଏଭଳି କୌଣସି ଦାବି କରା ଯାଇନଥିଲା । ୧୯୯୩ର ସିଜନ ୪ର ଗୋଟିଏ ଏପିସୋଡରେ ଓସାକା ଫ୍ଲୁ ବାବଦରେ କୁହା ଯାଇଥିଲା । କରୋନା ସଂପର୍କରେ ନୁହେଁ ।
