ମକାର ଅଭାବି ବିକ୍ରି, ଚିନ୍ତାରେ ଚାଷୀ
1 min read
ଧର୍ମଗଡ଼: ମକାର ଅଭାବି ବିକ୍ରି ବଢାଉଛି ଚିନ୍ତା। କଳାହାଣ୍ଡି ଧର୍ମଗଡରେ ମଣ୍ଡି ସମସ୍ୟା ନେଇ ହୋଇପାରୁନି ମକା ବିକ୍ରି। କଳାହାଣ୍ଡି ଧର୍ମଗଡର ବିଭିନ୍ନ ଅଞ୍ଚଳରେ ମକା ଚାଷର ଚାହିଦା ଥିବା ବେଳେ ବିକ୍ରି ନହୋଇପାରିବରୁ ଅସନ୍ତୋଷ ଚାଷୀ । ଫଳରେ ଶାଗ ମାଛ ଦରରେ ମକା ବିକ୍ରି ହେଉଛି।
ଚିନ୍ତା ବଢାଉଛି, ମକାର ଅଭାବି ବିକ୍ରି। ପାହାଡି ଇଲାକାରେ ବଢୁଛି ମକା ଚାଷର ଚାହିଦା। କିନ୍ତୁ ଅମଳ ପରେ ଚାଷୀଙ୍କୁ ମିଳୁନି ଉପଯୁକ୍ତ ମୂଲ୍ୟ। କଳାହାଣ୍ଡି ଧର୍ମଗଡର କୋକସରା, ଗୋଲାମୁଣ୍ଡା ବ୍ଲକର ବିଭିନ୍ନ ଅଞ୍ଚଳରେ ଦେଖାଦେଇଛି ମଣ୍ଡି ସମସ୍ୟା। ଫଳରେ ନା ହୋଇପାରୁଛି ବିକ୍ରି ନା ହେଉଛି ଭଲ ରୋଜଗାର । ଏହି ଅଞ୍ଚଳରେ ପ୍ରାୟ ୧୦ ହଜାରରୁ ଅଧିକ ଏକର ଜମିରେ କେବଳ ମକା ଚାଷ ହୋଇଥାଏ । ମକା ଚାଷ ଏଠାକାର ଚାଷୀଙ୍କ ରୋଜଗାରର ଅନ୍ୟତମ ଉତ୍ସ ।
ପ୍ରତିବର୍ଷ ଏଠାକାର ଚାଷୀ ମକା ଚାଷ କରୁଥିବା ବେଳେ ନଭେମ୍ବରରୁ ଅମଳ ହୋଇଥାଏ । ଫସଲ ବିକ୍ରି କରି ଭଲ ଦୁଇ ପଇସା ରୋଜଗାରର ଆଶା ରହିଥାନ୍ତି ଚାଷୀ । ହେଲେ ବିକ୍ରି ବ୍ୟବସ୍ଥା ପାଇଁ ସଠିକ ମଣ୍ଡି ବ୍ୟବସ୍ଥା ନଥିବାରୁ ଦଲାଲ ହାତରେ ଶାଗ ମାଛ ଦରରେ କୁଇଣ୍ଟାଲ କୁଇଣ୍ଟାଲ ଫଲସ ଟେକି ଦିଅନ୍ତି ଚାଷୀ। ଧାର କରଜ କରି ଚାଷ ହୋଇଥାଏ l ବିହନ, ସାର, କୀଟ ନାଶକ ଔଷଧର ଦରଦାମ ସାଙ୍ଗକୁ ଆନୁଷଙ୍ଗିକ ଖର୍ଚ୍ଚ ଓ ପରିଶ୍ରମକୁ ଦେଖିଲେ ମକାର ବିକ୍ରି ଚାଷୀଙ୍କ ମେରୁଦଣ୍ଡକୁ ଦୋହଲାଇ ଦେଇଛି ।
