ଆସନ୍ତାକାଲି ଭଙ୍ଗା ହେବ ବିବାଦୀୟ ବୈକୁଣ୍ଠ ଧାମ ଆଶ୍ରମ

ଭୁବନେଶ୍ବର: ଆସନ୍ତକାଲି ଭଙ୍ଗାଯିବ ବୈକୁଣ୍ଠଧାମ ଆଶ୍ରମ । ମାଟିରେ ମିଶିବ ଖଣ୍ଡଗିରି ସ୍ଥିତ କୁନି ସାରଥୀଙ୍କ ବୈକୁଣ୍ଠଧାମ ଆଶ୍ରମ । ବିଡିଏର ପକ୍ଷରୁ କରାଗଲା ଘୋଷଣା । ଆସନ୍ତାକାଲି ସକାଳ ୮ରୁ ଭଙ୍ଗାଯିବା ପ୍ରକ୍ରିୟା ଆରମ୍ଭ ହେବ । ଡାକବାଜି ଯନ୍ତ୍ରରେ ଆଶ୍ରମ ଖାଲି କରିବାକୁ ବିଡିଏ ପକ୍ଷରୁ ପ୍ରଚାର କରାଯାଇଛି । ବିବାଦ ସୃଷ୍ଟି ପରେ ସରକାରୀ ଜମିରେ ଆଶ୍ରମ ରହିଛି କି ନାହିଁ ତାହା ମାପଚୁପ କରିଥିଲା ବିଡିଏ ।

ସୂଚନାଯୋଗ୍ୟ, ଜଣେ ପିଲାକୁ କୁନି ସାରଥୀ ଭାବେ ବସାଇ ଆଶ୍ରମରେ ତାଙ୍କୁ କଳକୀ ଅବତାର ବୋଲି ଦର୍ଶାଯାଇଥିଲା । ପିଲାର ଗୋଡ଼ରେ ତୁଳସୀ ଦିଆଯିବା ଫଟୋ ଭାଇରାଲ ହେବା ପରେ ଘଟଣା ପଦାକୁ ଆସିଥିଲା । ଯାହାକୁ ନେଇ ବିବାଦୀୟ ସ୍ଥିତି ସୃଷ୍ଟି ହୋଇଥିଲା । ବିଭିନ୍ନ ମହିଳା ସଙ୍ଗଠନ ସହ ସ୍ଥାନୀୟ ଲୋକେ ଏହାକୁ ନେଇ ପ୍ରତିବାଦ କରିବା ସହ ଟ୍ରଷ୍ଟି ଓ କୁନି ସାରଥୀଙ୍କୁ ଗିରଫ କରିବାକୁ ଦାବି କରିଥିଲେ । ଏହାପରେ କୁନି ସାରଥୀ ସମେତ ତାଙ୍କ ପରିବାର ଓ ଟ୍ରଷ୍ଟି ଫେରାର ହୋଇଯାଇଛନ୍ତି ।

ବିବାଦ ଆରମ୍ଭ ପରେ କୁନି ସାରଥୀ ଓ ଆଶ୍ରମକୁ ନେଇ ନୂଆ ନୂଆ ବିବାଦ ପଦାକୁ ଆସିବାରେ ଲାଗିଛି । କୁନି ସାରଥୀ କେଟିଏମ ବାଇକରେ ବୁଲିବା, ଝିଅଙ୍କୁ ବୁଲାଇବାର ଫଟୋ ବି ଭାଇରାଲ ହୋଇଥିଲା ।

ଏପରିକି ଆଶ୍ରମରୁ ମିଳିଥିବା ଏକ ଡାଏରୀରେ ଭଣ୍ଡ ବାବାର ସକାଳରୁ ରାତି ପର୍ଯ୍ୟନ୍ତ କାର୍ଯ୍ୟକ୍ରମ ସମ୍ପର୍କରେ ଉଲ୍ଲେଖ ରହିଛି । ଏଥିରେ ଭଜନ ଲେଖାଯିବା ସହ ସନ୍ତାନ ପ୍ରାପ୍ତି ପାଇଁ ଯଜ୍ଞ କରାଯିବା ନେଇ ମଧ୍ୟ ଉଲ୍ଲେଖ ରହିଛି । ସବୁଠାରୁ ବଡ଼କଥା ହେଲା ଭକ୍ତ ଭାବେ ଆସୁଥିବା ଲୋକଙ୍କୁ କେମିତି ଠକା ଯାଉଥିଲା ତାହାର ଗୁମର ରହିଛି ଏହି ଡାଏରୀରେ । ଭଣ୍ଡ ବାବାଙ୍କ ପୂଜା କରିବା ପାଇଁ କେବଳ ୩୫ ହଜାର ଟଙ୍କାର ଫୁଲ ଲାଗୁଥିଲା । କେଉଁ ଫୁଲ, କେତେ ପରିମାଣର ତାହାର ଚିଠା ଡାଏରୀରେ ରହିଛି । ଯାହାର ଲିଷ୍ଟ ପୂଜା ପାଇଁ ଆସୁଥିବା ଭକ୍ତଙ୍କୁ ଦିଆଯାଇ ଲୁଟାଯାଉଥିଲା ।

ବିବାଦ ଦେଖାଯିବା ପରେ ଆଶ୍ରମଟି ସରକାରୀ ଜାଗାରେ ଅଛି କି ନାହିଁ ଜାଣିବାକୁ ମାପଚୁପ କରାଯାଇଥିଏେ । ବିଡିଏ. ଜିଏ ଓ ତହସିଲ ବିଭାଗର ୮ ଜଣିଆ ଷ୍ଟାଫ ଆଶ୍ରମର ସରଜମିନ ଯାଞ୍ଚ କରିଥିଲେ । ଶେଷରେ ଆଶ୍ରମଟି ସରକାରୀ ଜମିରେ ଥିବା ଜଣାପଡିଥିଲା ।