ଟୋଲପ୍ଲାଜାକୁ ଧକ୍କା ଦେଲା କଣ୍ଟେନର, ଡ୍ରାଇଭର ଜୀବନ୍ତ ଦଗ୍ଧ

ଜଳେଶ୍ବର: ବାଲେଶ୍ବର ଜିଲ୍ଲା ଲକ୍ଷ୍ମଣନାଥ ଟୋଲପ୍ଲାଜାରେ ମର୍ମନ୍ତୁଦ ଦୁର୍ଘଟଣା । ଟୋଲପ୍ଲାଜାକୁ ଧକ୍କା ଦେଲା କଣ୍ଟେନର । ଘଟଣା ସ୍ଥଳରେ ଡ୍ରାଇଭର ଜୀବନ୍ତ ଦଗ୍ଧ ହୋଇଯାଇଥିବା ବେଳେ କଣ୍ଟେନରଟି ସମ୍ପୂର୍ଣ୍ଣ ଜଳିଯାଇଛି ।

ଦୁର୍ଘଟଣା ପରେ କଣ୍ଟେନରରେ ଥିବା ହେଲପରର ପତ୍ତା ମିଳୁନାହିଁ । ଦୁର୍ଘଟଣାରୁ ଟୋଲପ୍ଲାଜାର କର୍ମଚାରୀମାନେ ଅଳ୍ପକେ ବର୍ତ୍ତି ଯାଇଛନ୍ତି । ତେବେ ୫ ଓ ୬ ନମ୍ବର କ୍ୟାବିନ ସମ୍ପୂର୍ଣ୍ଣ ନଷ୍ଟ ହୋଇଯାଇଛି ।

କଣ୍ଟେନରଟି ପଶ୍ଚିମବଙ୍ଗରୁ ଓଡ଼ିଶା ଆସୁଥିବା ବେଳେ ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଛି । ଖବର ପାଇ ଜଳେଶ୍ଵର ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ଜଳେଶ୍ଵର ପୋଲିସ ଘଟଣାସ୍ଥଳରେ ପହଞ୍ଚି କ୍ରେନ ସାହାଯ୍ୟରେ କଣ୍ଟେନରକୁ ରାସ୍ତାରୁ ହଟାଇବା ସହ ଘଟଣାର ତଦନ୍ତ କରୁଛି । ଦୁର୍ଘଟଣା ଯୋଗୁଁ ଟୋଲପ୍ଲାଜାର ସମସ୍ତ କାର୍ଯ୍ୟ ବାଧାପ୍ରାପ୍ତ ହୋଇଛି ।