ନନ୍ଦିଘୋଷ ବ୍ୟୁରୋ : ଆମେରିକା ବିରୋଧରେ ଷଡ଼ଯନ୍ତ୍ର ! ରୁଷ ଓ ଉତ୍ତରକୋରିଆ ସହ ମିଶି ଆମେରିକା ବିରୋଧରେ ଚୀନ ରାଷ୍ଟ୍ରପତି ସି ଜିନପିଙ୍ଗ ଷଡ଼ଯନ୍ତ୍ର କରୁଛନ୍ତି ବୋଲି କହିଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ। ଦ୍ବିତୀୟ ବିଶ୍ବଯୁଦ୍ଧ ଅନ୍ତ ଘଟିବାର ୮୦ତମ ବାର୍ଷିକୀ ଅବସରରେ ଚୀନର ମେଗାପ୍ରଦର୍ଶନକୁ ନେଇ ଟ୍ରମ୍ପ ବିକ୍ଷୁବ୍ଧ ଥିବା ସୂଚନା ମିଳିଛି। ଚୀନ ପୁଣି ଏକ ଯୁଦ୍ଧକାଳୀନ ଇତିହାସର ଅୟମାରମ୍ଭ କରିବାକୁ ଯୋଜନା କରୁଛି ବୋଲି କହିଛନ୍ତି ଟ୍ରମ୍ପ। ଗତକାଲି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଆଲୋଚନା ବେଳେ ଜିନପିଙ୍ଗ ଚୀନ ଓ ରୁଷକୁ ଦ୍ବିତୀୟ ବିଶ୍ବଯୁଦ୍ଧର ହିରୋ ବୋଲି ପ୍ରତିପାଦନ କରିଥିଲେ। ତେବେ ଦ୍ବିତୀୟ ବିଶ୍ବଯୁଦ୍ଧରେ ଆମେରିକାର ଭୂମିକାକୁ ଜିନପିଙ୍ଗ ଗୌଣ କରିଥିଲେ ବୋଲି ସୂଚନା ମିଳିଛି। ଦ୍ବିତୀୟ ବିଶ୍ବଯୁଦ୍ଧର ଅନ୍ତ କ୍ଷେତ୍ରରେ ଆମେରିକୀୟ ସୈନିକଙ୍କ ବିପୁଳ ଅବଦାନ ଥିଲା। ସେମାନଙ୍କୁ ଉଚିତ ସମ୍ମାନ ମିଳିବା ଉଚିତ ବୋଲି କହିଛନ୍ତି ଟ୍ରମ୍ପ।
