ପରୀ ମୃତ୍ୟୁ ମାମଲାରେ ବିଜେପିକୁ କଂଗ୍ରେସର ଟାର୍ଗେଟ, ଟଙ୍କା କିଏ ଖାଇଛି ୧୫ ଦିନ ଭିତରେ ପ୍ରମାଣ ଦିଅ : ସୁର ରାଉତରାୟ

ଭୁବନେଶ୍ୱର: ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ରଙ୍କୁ କଂଗ୍ରେସର ୧୫ ଦିନିଆ ମହଲତ । କିଏ ଟଙ୍କା ଖାଇଛି ୧୫ ଦିନ ଭିତରେ ସେନେଇ ପ୍ରମାଣ ଦିଅନ୍ତୁ ବୋଲି କହିଛନ୍ତି କଂଗ୍ରେସ ବିଧାୟକ ସୁର ରାଉତରାୟ । ନହେଲେ ପରିସ୍ଥିତି ଭୟାନକ ହେବ ବୋଲି ସୁର ଚେତାବନୀ ଦେଇଛନ୍ତି । ପରୀ ମୃତ୍ୟୁ ମାମଲାରେ ସେମାନେ ଏସଆଇଟି ତଦନ୍ତ ଦାବି କରିଥିଲେ । ସରକାର ମଧ୍ୟ ଏସଆଇଟିକୁ ତଦନ୍ତ ଦାୟିତ୍ୱ ଦେଇଛନ୍ତି । ଭାରତୀୟ ଜନତା ପାର୍ଟି ଡ୍ରାମା କରୁଛି । ବିଧାନସଭା ଭିତରେ ଡ୍ରାମା କଲେ, ବାହାରେ ବି କରୁଛନ୍ତି । ସମ୍ବିତଙ୍କର ଏଭଳି ମନ୍ତବ୍ୟ କଷ୍ଟ ଦେଇଛି ବୋଲି ସୁର କହିଛନ୍ତି ।

ପଇସା ନେଇ ହିସାବ ନଦେଲେ ବିଚ୍ ରାସ୍ତାରେ ଜବାବ ଦେବେ ବୋଲି ସୁର କହିଛନ୍ତି । ସେପଟେ ଗଣମାଧ୍ୟମରେ କ୍ଷମା ନମାଗିଲେ ସମ୍ବିତଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେଇ ଚେତାବନୀ ଦେଇଛନ୍ତି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର । ବିଜେପି ଏକ ବହୁରୂପୀ ଦଳ । ବେଳେବେଳେ ସେମାନେ ବିଳିବିଳେଇ ହୁଅନ୍ତି ବୋଲି ନରସିଂହ କହିଛନ୍ତି । କଂଗ୍ରେସର ୯ଜଣ ବିଧାୟକ ପରୀ ମୃତ୍ୟୁ ମାମଲାରେ ପଇସା ଖାଇଥିବା ସମ୍ବିତ ପାତ୍ର ଅଭିଯୋଗ ଆଣିଥିଲେ।