କିଏ କାହିଁକି ଆମକୁ ହରାଇବ, ଆମରି ଦୋଷ ଯୋଗୁ ଆମେ ହାରିଲୁ : ସୁର ରାଉତରାୟ

ଭୁବନେଶ୍ୱର: କିଏ କାହିଁକି ଆମକୁ ହରାଇବ । ଆମରି ଦୋଷ ଯୋଗୁ ଆମେ ହାରିଲୁ । ତିର୍ତ୍ତୋଲରେ ହାରିକି ବି ଗତଥର ଅପେକ୍ଷା ଅଧିକ ଭୋଟ୍ ପାଇଲୁ । ହେଲେ କଂଗ୍ରେସର ଗଡ଼ ବୋଲାଉଥିବା ବାଲେଶ୍ୱରରେ ଅମାନତ ହରାଇଲୁ । ତେଣୁ କଂଗ୍ରେସ ହାରିବା ପଛରେ କଂଗ୍ରେସିଆ ନେତା ଦାୟୀ । ଆଉ କେହି ନୁହେଁ । ରାଜ୍ୟରେ ତିର୍ତ୍ତୋଲ ଏବଂ ବାଲେଶ୍ୱର ଉପନିର୍ବାଚନ ଫଳାଫଳ ଘୋଷଣା ହେବା ପରେ ପ୍ରତିକ୍ରିୟା ରଖି ଏପରି କହିଛନ୍ତି କଂଗ୍ରେସ ନେତା ସୁର ରାଉତରାୟ ।

ବାଲେଶ୍ୱର ଯାଇଥିବା ଅତି ଟାଣୁଆ କଂଗ୍ରେସ ନେତା ଓ ତାଙ୍କର ସମର୍ଥକ ଉପରଠାଉରିଆ ଭାବେ ପ୍ରଚାର କଲେ । କ୍ୟାମେରାରେ ମୁହଁ ଦେଖାଇଲେ । ହୋଟେଲରେ ଶୋଇ ରହିଲେ । ଭୋଟ ହୋଇ ଥାଆନ୍ତା କେମିତି ବୋଲି ସୁର କହିଛନ୍ତି । ହେଲେ ସୁର ପୂର୍ବଭଳି ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କୁ ସମାଲୋଚନା କରିବାକୁ ସାହାସ ଜୁଟାଇ ପାରିନାହାନ୍ତି । ଭିନ୍ନ ବକ୍ତବ୍ୟ ରଖି ପିସିସି ସଭାପତିଙ୍କୁ ବଞ୍ଚାଇବାକୁ ଚାହିଁଛନ୍ତି । ହେଲେ ତୃଣମୂଳ କଂଗ୍ରେସ ସମର୍ଥକ ଏବଂ ଏକାଧିକ ବିଧାୟକ ନାମ ଗୋପନ ରଖି ନିରଞ୍ଜନଙ୍କୁ ସମାଲୋଚନା କରିଛନ୍ତି ।

ଜଣେ ବର୍ଷିୟାନ କଂଗ୍ରେସ ନେତାଙ୍କ କହିବାନୁଯାୟୀ, ତିର୍ତ୍ତୋଲରେ କଂଗ୍ରେସ ଭଲ ଭୋଟ ପାଇବା ଆଶ୍ଚର୍ଯ୍ୟଜନକ କଥା ନୁହେଁ । ତାହା ଏକଦା କଂଗ୍ରେସ ଗଡ଼ ଥିଲା । ତିର୍ତ୍ତୋଲଠାରୁ କଂଗ୍ରେସର ବାଲେଶ୍ୱର ସ୍ଥିତି ବହୁତ ଭଲ ରହିଥିଲା । ସେଠାରୁ ୨୦୦୯ରେ ଏକାଧିକ ବିଧାୟକ ଜିତିବା ସହ ବାଲେଶ୍ୱର ଲୋକସଭା ମଧ୍ୟ କଂଗ୍ରେସ ହାତକୁ ଯାଇଥିଲା । ହେଲେ ୨୦୧୮ ପରଠାରୁ କଂଗ୍ରେସ ନେତୃତ୍ୱ ସେଠାରେ ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନାକୁ ବାଦ୍ ଦେଇ ସଙ୍ଗଠନ କରିବାକୁ ଲାଗିଲେ । ୨୦୧୯ରେ ନିରଞ୍ଜନ ପଟ୍ଟନାୟକ ନିଜ ପୁତ୍ର ନବଜ୍ୟୋତି ପଟ୍ଟନାୟକଙ୍କୁ ଲୋକ ସଭା ପ୍ରାର୍ଥୀ କଲେ । ପୂର୍ବତନ କଂଗ୍ରେସ ବିଧାୟକ ଏବଂ ସଙ୍ଗଠନ ଥିବା ନେତାଙ୍କୁ ବାଦ୍ ଦେଇ କେତେଜଣ ଟିଭିରେ ମୁହଁ ଦେଖାଉଥିବା ଏବଂ ତୋଷାମଦକାରୀଙ୍କୁ ଟିକେଟ୍ ଦେଲେ । ଫଳସ୍ୱରୂପ କଂଗ୍ରେସ ଭଲ ପ୍ରଦର୍ଶନ କରିବା ଦୂରରେ କଥା ଲୋକସଭା ଆସନରେ ଅମାନତ ହରାଇଲା । ହେଲେ ଏହାର ସମୀକ୍ଷା ହେଲା ନାହିଁ । କଂଗ୍ରେସକୁ ନଷ୍ଟ କରିଥିବା ଲୋକମାନେ ହିଁ ବାଲେଶ୍ୱର କଥା ପୁଣି ବୁଝିଲେ ।

ଆଉ ତା ପରର ଫଳ ସମସ୍ତଙ୍କୁ ଜଣା ବୋଲି ସେହି କଂଗ୍ରେସ ନେତା ଜଣଙ୍କ କହିଛନ୍ତି । ସେହିପରି ତାରାପ୍ରସାଦ ବାହିନୀପତି କହିଛନ୍ତି ଯେ, ପାର୍ଟି ଟଙ୍କା ଖର୍ଚ୍ଚ କଲାନାହିଁ । ଲୋକେ ଭାବିଲେ କଂଗ୍ରେସ ହାରିବ, କାହିଁକି ଭୋଟ୍ ଦେବା । ଆମ ନେତା ବି ହୋଟେଲରେ ଶୋଇଲେ ବୋଲି ତାରା କହିଛନ୍ତି ।