ପରାଜୟ ସ୍ବୀକାର କଲା କଂଗ୍ରେସ

ନୂଆଦିଲ୍ଲୀ: ୫ଟି ରାଜ୍ୟର ଫଳାଫଳ ଧିରେ ଧିରେ ସ୍ପଷ୍ଟ ହେବାରେ ଲାଗିଛି । ପଞ୍ଜାବ ଜନତା କଂଗ୍ରେସକୁ ପ୍ରତ୍ୟାଖାନ କରି ଆମ ଆଦମୀ ପାର୍ଟିକୁ ୫ ବର୍ଷ ପାଇଁ କ୍ଷମତା ପ୍ରଦାନ କରିଛନ୍ତି । ଅନ୍ୟ ୪ଟି ରାଜ୍ୟ ଉତ୍ତର ପ୍ରଦେଶ, ଗୋଆ, ଉତ୍ତରାଖଣ୍ଡ ଓ ମଣିପୁରରେ କଂଗ୍ରେସର ଶୋଚନୀୟ ପରାଜୟ । ଭୋଟ ଗଣତି ଆରମ୍ଭରୁ ଉତ୍ତରାଖଣ୍ଡରେ ବିଜେପିକୁ କଂଗ୍ରେସ କଡା ଟକ୍କର ଦେବା ଭଳି ମନେ ହେଉଥିବା । ହେଲେ ଦିନ ବଢିବା ସହ କଂଗ୍ରେସର ସରକାର ଗଠନର ଆଶା ଅସ୍ତ ହୋଇଯାଇଥିଲା । ୫ଟି ରାଜ୍ୟରେ ଜନମତ ଦଳ ବିରୋଧରେ ଯିବା ପରେ ପରାଜୟ ସ୍ବୀକାର କରିଛି ଏହି ସର୍ବ ପୁରାତନ ଜାତୀୟ ଦଳ ।

ବରିଷ୍ଠ କଂଗ୍ରେସ ନେତା ରଣଦୀପ ସୁରଜଓ୍ବାଲା ସାମ୍ବାଦିକ ସମ୍ମିଳନୀ କରି ଦଳର ପରାଜୟ ସ୍ବୀକାର କରିଛନ୍ତି । ସେ କହିଛନ୍ତି, ‘ଆମେ ଲୋକଙ୍କ ସମସ୍ୟା, ଦରଦାମ ବୃଦ୍ଧି, ବେକାରୀ, ଅର୍ଥବ୍ୟବସ୍ଥା, ଶିକ୍ଷା, ସ୍ବାସ୍ଥ୍ୟ ଓ ବିକାଶ ପ୍ରସଙ୍ଗକୁ ଆଗକୁ ଉଠାଇବା ଜାରି ରଖିବୁ । ପରାଜୟକୁ ନେଇ ଆମେ ସମୀକ୍ଷା କରିବୁ । ଭବିଷ୍ୟତରେ କଂଗ୍ରେସକୁ ହୃଢ କରିବା ପାଇଁ କାମ କରିବୁ ।’

ସେ ଆହୁରି କହିଛନ୍ତି, ‘କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି ନିଷ୍ପତ୍ତି ନେଇଛନ୍ତି ଯେ, ଶୀଘ୍ର କାର୍ଯ୍ୟକାରୀ ସମିତିର ବୖଠକ ଡାକି ୫ଟି ରାଜ୍ୟରେ କଂଗ୍ରେସ ପରାଜୟର ସମୀକ୍ଷା କରିବେ ।’

ସେ ଆଗକୁ ଆହୁରି କହିଛନ୍ତି, ‘ଆମେ ନିର୍ବାଚନ ଫଳାଫଳକୁ ନେଇ ନିରାଶ ହୋଇଛୁ ସତ, ହେଲେ ହତାଶ ହୋଇନାହୁଁ । ଆମେ ନିର୍ବାଚନରେ ପରାଜିତ ହୋଇଛୁ, ହେଲେ ଦମ୍ବ ହରାଇ ନାହୁଁ । ନଜିତିବା ପର୍ଯ୍ୟନ୍ତ ଆମେ ଲଢେଇ ଜାରି ରଖିବୁ । ଆମେ ପରିବର୍ତ୍ତନ ସହ ଫେରିବୁ । ଏହା ଜନତାଙ୍କ ବିଜୟ ହେବ । ୫ଟି ରାଜ୍ୟର ଜନତାଙ୍କୁ ଉଜ୍ବଳ ଭବିଷ୍ୟତ ପାଇଁ ଶୁଭକାମନା ।’