କମ୍ପୁଛି ହିମାଚଳ ପ୍ରଦେଶ ମଇଦାନ, ଆଜିଠୁ ପ୍ରଚାର ମଙ୍ଗ ଧରିବେ AICC ସଭାପତି
ସିମଲା: କମ୍ପୁଛି ହିମାଚଳ ପ୍ରଦେଶ ନିର୍ବାଚନ ମଇଦାନ । ଆଜିଠାରୁ ଦୁଇ ଦିନିଆ ଗସ୍ତରେ ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ । ରାଜ୍ୟରେ କେତେକ ପ୍ରମୁଖ ସ୍ଥାନରେ ନିର୍ବାଚନୀ ରାଲିରେ ଉଦବୋଧନ ଦେବା ସହ କରିବେ କ୍ୟାମ୍ପେନ । ବିଜେପି ସରକାରକୁ ହଟାଇବା ଲାଗି ଖଡଗେ ଦେବେ ବଜ୍ର ଆହ୍ୱାନ । ସେପଟେ ରାଜ୍ୟରେ ପ୍ରଚାର ଅଭିଯାନ ଜାରି ରଖିଛନ୍ତି କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ । ପୂର୍ବରୁ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲ, କଂଗ୍ରେସ ନେତା ସଚିନ ପାଇଲଟ ପ୍ରମୁଖ କରିଥିଲେ ପ୍ରଚାର । ରାଜ୍ୟରେ ଆସନ୍ତା ନଭେମ୍ବର ୧୨ରେ ଭୋଟଗ୍ରହଣ ହେବ ଏବଂ ୮ ଡିସେମ୍ବରରେ ଫଳ ପ୍ରକାଶ ପାଇବ ।
ସରକାରୀ କର୍ମଚାରୀଙ୍କ ଲାଗି ପୁରୁଣା ପେନସନ ସ୍କିମ ବା ଓପିଏସ କାର୍ଯ୍ୟକାରୀ କରିବା, ୩୦୦ ୟୁନିଟ ଯାଏ ମାଗଣା ବିଦ୍ୟୁତ, ୧୮ରୁ ୬୦ ବର୍ଷ ବୟସ୍କା ମହିଳାଙ୍କୁ ମାସିକ ୧୫ ଶହ ଟଙ୍କାର ପେନସନ ଦେବା ଲାଗି ଘୋଷଣା କରିଛି ଦଳ । ଏହାସହ ପ୍ରତିଗ୍ରାମରେ ମୋବାଇଲ କ୍ଳିନିକ, ୧ ଲକ୍ଷ ସରକାରୀ ଚାକିରି, ୧୦ କୋଟି ଟଙ୍କାରେ ଯୁବକଙ୍କ ଲାଗି ଷ୍ଟାର୍ଟଅପ ଫଣ୍ଡ ପ୍ରତିଷ୍ଠା ଲାଗି ଘୋଷଣା କରିସାରିଛି କଂଗ୍ରେସ ।
