ଭୁବନେଶ୍ବରରେ କଂଗ୍ରେସର ଭାରତ ଯୋଡୋ ଯାତ୍ରା, ଭଣ୍ଡୁର କରିବାକୁ ବିଜେପିର ଚକ୍ରାନ୍ତ
ଭୁବନେଶ୍ବର: କଂଗ୍ରେସର ଭାରତ ଯୋଡ଼ୋ ଯାତ୍ରାକୁ ଭଣ୍ଡୁର କରିବାକୁ ବିଜେପିର ଚକ୍ରାନ୍ତ । ଆଜି ସମାନ୍ତରାଳ ଭାବେ ବିଜେପି ରାଲି ଓ ବିକ୍ଷୋଭ ପ୍ରଦର୍ଶନ କରୁଛି । ରାହୁଲ ଗାନ୍ଧୀଙ୍କ ଭାରତ ଯୋଡ଼ୋ ଅଭିଯାନକୁ ସାରା ଦେଶରେ ବିପୁଳ ଜନସମର୍ଥନ ମିଳୁଛି । ଏହି କ୍ରମରେ ଆଜି ଓଡ଼ିଶାରେ କେନ୍ଦ୍ରର ବରିଷ୍ଠ ନେତାଙ୍କୁ ନେଇ ରାଜ୍ୟ କଂଗ୍ରେସ ଭାରତ ଯୋଡ଼ୋ ପଦଯାତ୍ରା ଆରମ୍ଭ କରିଛି ।
କାଳେ କଂଗ୍ରେସ ଏଥିରୁ ମାଇଲେଜ୍ ନେଇଯିବ ସେହି ଭୟରେ ଆଜି କଂଗ୍ରେସ ଭୁବନେଶ୍ବରରେ ଚକା ଜାମ୍ କରିବାକୁ ଚକ୍ରାନ୍ତ କରିଛି । ଦୁଇ ରାଜନୈତିକ ଦଳ ମୁହାଁମୁହିଁ ହେଲେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହୋଇପାରେ । ଫଳରେ ପାଣିକୁ ଗୋଳିଆ କରି କଂଗ୍ରେସର ପଦଯାତ୍ରାକୁ ଚେକ୍ ଦେବାକୁ ବିଜେପି ଭିତିରିଆ ରଣନୀତି ପ୍ରସ୍ତୁତ କରିଥିବା କୁହାଯାଉଛି । କେନ୍ଦ୍ରର ଜନମାରଣ ନୀତିକୁ ବିରୋଧ କରି କଂଗ୍ରେସ ରଣହୁଙ୍କାର ଦେଉଛି, ଯାହାକୁ ନେଇ ବିଜେପି ବ୍ୟାକଫୁଟରେ ରହିଛି ।
ଆଜି ଠାରୁ ଓଡ଼ିଶାରେ କଂଗ୍ରେସ ଆରମ୍ଭ କରିଛି ଭାରତ ଯୋଡୋ ଯାତ୍ରା । ଭୁବନେଶ୍ୱର ଇନ୍ଦିରା ଗାନ୍ଧୀ ପାର୍କରେ ସକାଳ ସାଢେ ୮ଟା ବେଳେ ଯାତ୍ରା ଆରମ୍ଭ ହୋଇଛି । କଂଗ୍ରେସ ପ୍ରଭାରୀ ଚେଲ୍ଲା କୁମାର ଓ ଏଆଇସିସି ସମ୍ପାଦକ ରୁଦ୍ର ରାଜୁଙ୍କ ସହ ଅନ୍ୟ ନେତାମାନେ ମଧ୍ୟ ସାମିଲ ହୋଇଛନ୍ତି । କେନ୍ଦ୍ର ସରକାର ଦରଦାମ ବୃଦ୍ଧି କରି କିପରି ଲୋକଙ୍କୁ ହନ୍ତସନ୍ତ କରୁଛନ୍ତି ସେନେଇ ଘରକୁ ଘର ଯାଇ କଂଗ୍ରେସ ଲୋକଙ୍କୁ ଅବଗତ କରାଇଛି । ଗତକାଲି ସାମ୍ବାଦିକ ସମ୍ମିଳନୀ କରି ଏନେଇ ପିସିସି ସଭାପତି ଶରତ ପଟ୍ଟନାୟକ ସୂଚନା ଦେଇଥିଲେ ।
