ବୀରମିତ୍ରପୁରରେ ପହଞ୍ଚିଲା କଂଗ୍ରେସର ଭାରତ ଯୋଡ଼ ନ୍ୟାୟ ଯାତ୍ରା
ବୀରମିତ୍ରପୁର: ସୁନ୍ଦରଗଡ଼ ଜିଲ୍ଲା ବୀରମିତ୍ରପୁରରେ ପହଞ୍ଚିଲା ଭାରତ ଯୋଡ଼ ନ୍ୟାୟ ଯାତ୍ରା । ରାହୁଲ ଗାନ୍ଧୀଙ୍କ ନେତୃତ୍ବରେ କଂଗ୍ରେସର ଏହି ଯାତ୍ରା ଓଡ଼ିଶାରେ ପହଞ୍ଚିଛି । ଜାତୀୟ ଓ ରାଜ୍ୟ ସ୍ତରର ବହୁ କଂଗ୍ରେସ ନେତା ଯାତ୍ରାରେ ସାମିଲ ହୋଇଛନ୍ତି । ଦେଶବାସୀଙ୍କୁ ରାଜନୈତିକ ନ୍ୟାୟ ପ୍ରଦାନ କରିବା, ଅର୍ଥନୈତିକ ନ୍ୟାୟ ପ୍ରଦାନ କରିବା ଓ ସାମାଜିକ ନ୍ୟାୟ ପ୍ରଦାନ କରିବା ପାଇଁ ରାହୁଲ ଗାନ୍ଧୀ ଏହି ଯାତ୍ରା କରୁଛନ୍ତି ।
ରାହୁଲ ବୀରମିତ୍ରପୁରରେ ସାଧାରଣ ସଭାରେ ଜନସାଧାରଣଙ୍କୁ ଉଦବୋଧନ ଦେଇଥିଲେ । ବିଜେପି ଆଚ୍ଛା ଦିନର ସ୍ଲୋଗାନ ନେଇ କେନ୍ଦ୍ରରେ କ୍ଷମତାକୁ ଆସିଥିବା ବେଳେ ଆଚ୍ଛାଦିନ ବଦଳରେ ବୁରାଦିନ ଆସିଥିବା କଂଗ୍ରେସର ପକ୍ଷରୁ ଅଭିଯୋଗ କରାଯାଇଛି । ରାହୁଲ ଗାନ୍ଧୀ ଆଜି ରାତିରେ ବିଜାବାହାଲ ରାମପାଲରେ ରାତ୍ରି ଯାପନ କରିବେ । ଆସନ୍ତାକାଲି ସକାଳେ ରାଉରକେଲା ସହରର ଉଦିତନଗରରୁ ପାନପୋଷ ଛକ ପର୍ଯ୍ୟନ୍ତ ପଦଯାତ୍ରା କରିବେ ।
ରାଉରକେଲା ସହରର ପାନପୋଷ ଛକରେ ରାହୁଲ ସାଧାରଣ ସଭାରେ ଯୋଗଦେବାର କାର୍ଯ୍ୟକ୍ରମ ରହିଛି । ଆସନ୍ତାକାଲି ରାଉରକେଲା ସହରରୁ ରାଜଗାଙ୍ଗପୁର, କୁତ୍ରା ଦେଇ ସୁନ୍ଦରଗଡ଼ ଯାତ୍ରା କରିବେ । ରାହୁଲ ଗାନ୍ଧୀ ଆସନ୍ତାକାଲି ରାତିରେ ଝାରସୁଗୁଡ଼ା ଅମଲିପାଲି ପଡ଼ିଆରେ ରାତ୍ରୀ ଯାପନ କରିବେ । ୮ ତାରିଖରେ ଝାରସୁଗୁଡ଼ା ପୁରୁଣା ବସଷ୍ଟାଣ୍ଡ ମହାତ୍ମା ଗାନ୍ଧି ଛକ ନିକଟରୁ ଯାତ୍ରା ଆରମ୍ଭ କରିବେ । ସାହିଦିନ ଅପରାହ୍ନରେ ଛତିଶଗଡ ଅଭିମୁଖେ ଯାତ୍ରା କରିବାର କାର୍ଯକ୍ରମ ରହିଛି ।
