ଭୁବନେଶ୍ୱର: ଓଡ଼ିଶାରେ ଅଦାନୀ ଝଡ଼। ସରକାରଙ୍କୁ ଘେରିଲେ ବିରୋଧୀ। କାଠଗଡ଼ାରେ ଅଦାନୀ-ବିଜେପି ସମ୍ପର୍କ। ରାଜରାସ୍ତାରେ ଗର୍ଜିଲା ଯୁବ କଂଗ୍ରେସ। ବିଶିଷ୍ଟ ଶିଳ୍ପପତି ଗୌତମ ଅଦାନୀଙ୍କୁ ନେଇ ଓଡ଼ିଶାରେ ତେଜିଲା ତାତି। ହଲଚଲ ରାଜ୍ୟ ରାଜନୀତି। ଗନ୍ଧମାର୍ଦ୍ଦନ ପାହାଡ଼ ଜମିରୁ ଆରମ୍ଭ କରି ଡ଼ବଲ ଇଂଜନି ସରକାରଙ୍କ ଅଦାନୀ ପ୍ରୀତି ନେଇ ବିଜେପିକୁ ଟାର୍ଗେଟ କରିଛି କଂଗ୍ରେସ। ବିରୋଧ କରି ରାଜରାସ୍ତାକୁ ଓହ୍ଲାଇଛି ଯୁବ କଂଗ୍ରେସ। ମାଷ୍ଟର କ୍ୟାଣ୍ଟିନ୍ ଛକରେ ଅଦାନୀ ଓ ବିଜେପି ବିରୋଧରେ ବିକ୍ଷୋଭ କରିଛି ଯୁବ କଂଗ୍ରେସ। କେନ୍ଦ୍ର ସରକାର ଓ ଅଦାନୀ ମିଶି ଦେଶକୁ ଲୁଟ କରିଥିବା ଅଭିଯୋଗ କରିଛି ଦଳ। ଘଟଣାର JPC ତଦନ୍ତ ଦାବି କରିଛି ଯୁବ କଂଗ୍ରେସ। ଆଗାମୀ ଦିନରେ ଆନ୍ଦୋଳନକୁ ଆହୁରି ତୀବ୍ରତର କରିବାକୁ ଚେତାବନୀ ଦେଇଛି। ଡ଼ବଲ ଇଂଜିନ ସରକାର ଓଡ଼ିଶାରେ ହେବା ପରେ ଅଦାନୀକୁ ଓଡ଼ିଶାର ଖଣି, ଜମି, ବନ୍ଦର ଟେକିଦେଇଛି ବିଜେପି। ଯାହାକୁ ନେଇ ବିଜେପି ବିରୋଧରେ ଅସନ୍ତୋଷର ସ୍ଵର ତୀବ୍ର ହୋଇଛି। ଗନ୍ଧମାର୍ଦ୍ଦନ ପାହାଡ଼କୁ ଅଦାନୀକୁ ଦିଆଯିବା ନେଇ ସରକାର ସ୍ପଷ୍ଟୀକରଣ ଦେବାକୁ କଂଗ୍ରେସ ନେତା ସାଲୁଜା ଦାବି କରିଛନ୍ତି।
ଗନ୍ଧମାର୍ଦ୍ଦନ ପାହାଡ଼ରୁ ଆରମ୍ଭ କରି ଅଦାନୀ ଓ ବିଜେପି ସମ୍ପର୍କ ନେଇ ରାଜନୀତି ଉଷ୍ମ ହେବା ପରେ ପ୍ରତିକ୍ରିୟା ରଖିଛି ବିଜେଡ଼ି। ଆଇନ ତା ବାଟରେ ଯାଉ ବୋଲି କହିଛନ୍ତି ବିଜେଡି ନେତା ପ୍ରଦୀପ ମାଝୀ। ସମସ୍ତେ ଜାଣିଛନ୍ତି ବିଜେପି ଓ ଅଦାନୀ ଗୋଟେ ସୂତାର ଖିଅ। ତାଙ୍କ ଭିତରେ କଣ ସମ୍ପର୍କ ସମସ୍ତଙ୍କୁ ଜଣା। ସେପଟେ ଅଦାନୀ ଓ ବିଜେପି ସମ୍ପର୍କ ନେଇ କଂଗ୍ରେସର ଟାର୍ଗେଟ ପରେ ଜବାବ ରଖିଛି ବିଜେପି। ଆଇନମନ୍ତ୍ରୀ କହିଛନ୍ତି, ଯଦି ସେଭଳି କିଛି ହୋଇଥିବ, ତାହାଲେ ତଦନ୍ତ ଯାହା ହେବା କଥା ହେବ। ଯାହାର ବି ସମ୍ପୃକ୍ତି ଥିବ ତଦନ୍ତ ପରେ ସ୍ପଷ୍ଟ ହେବ ବୋଲି କହିଛନ୍ତି ଆଇନମନ୍ତ୍ରୀ ।
