GST ପରିଷଦ ବୈଠକରେ ରାଜ୍ୟଙ୍କ ବକେୟା ଅର୍ଥକୁ ନେଇ ଆଲୋଚନା ଜାରି
ନୂଆଦିଲ୍ଲୀ: ଜିଏସଟିକୁ ନେଇ ରାଜ୍ୟ ଓ କେନ୍ଦ୍ର ମଧ୍ୟରେ ବିବାଦ ଜାରି ରହିଛି । ଏହାରି ଭିତରେ ଆଜି ୪୧ତମ ଜିଏସଟି କାଉନସିଲ ମିଟିଂ ବସିଛି । ବୈଠକରେ ରାଜ୍ୟକୁ ଗତ ୩ ମାସ ହେଲା ବକେୟା ଜିଏସଟି ଅର୍ଥ ଦେବାକୁ ନେଇ ଆଲୋଚନା ହୋଇଛି । ବୈଠକରେ ଅଧ୍ୟକ୍ଷତା କରୁଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ।
କେନ୍ଦ୍ର ସରକାର ଗୋଟିଏ ଦେଶ ଗୋଟିଏ ଟ୍ୟାକ୍ସକୁ ଲାଭ ଜନକ କହି, ୧ ଜୁଲାଇ ୨୦୧୭ରେ ସାରା ଦେଶରେ ଲାଗୁ କରିଥିଲେ । ଏହାକୁ ବିଭିନ୍ନ ରାଜ୍ୟ ବିରୋଧ କରିଥିଲେ ମଧ୍ୟ ସେମାନଙ୍କର ଯାହା କ୍ଷତି ହେବ ତାଙ୍କୁ କେନ୍ଦ୍ର ପୂରଣ କରିବ ବୋଲି କୁହାଯାଇଥିଲା । ଯାହାକୁ ନେଇ ବିଭିନ୍ନ ରାଜ୍ୟ ସମ୍ମତ୍ତି ପ୍ରଦାନ କରିଥିଲେ । ଜିଏସ୍ଟି ଆଇନ୍ ଅନୁସାରେ ପ୍ରଥମ ୫ ବର୍ଷ ପର୍ଯ୍ୟନ୍ତ ରାଜ୍ୟକୁ ରାଜସ୍ୱ ଆଦାୟରେ ଯାହା ବି କ୍ଷତି ହେବ ତାକୁ କେନ୍ଦ୍ର ପୂରଣ କରିବ ।
୨୦୧୭ରେ ଜିଏସ୍ଟି ଲାଗୁ ହେବା ପରେ ଗତ ଦୁଇ ବର୍ଷ ହେଲା ଏହାକୁ ନେଇ ବିବାଦ ଆରମ୍ଭ ହୋଇଛି । ଦେଶର ଆର୍ଥିକ ସ୍ଥିତି ଓ କରୋନା ଲକଡାଉନ ଯୋଗୁଁ ରାଜସ୍ୱ ସଂଗ୍ରହରେ ବାଧା ଉପୁଜିବାରୁ ରାଜ୍ୟ ମାନଙ୍କୁ ବକେୟା ଅର୍ଥ ଦେବାରେ କେନ୍ଦ୍ର ଏକ ପ୍ରକାର ଅସମର୍ଥ ହୋଇଛି ।
ତେବେ ଗତ ଜୁନ୍ ମାସରେ ଲକ୍ଡାଉନ୍ ପରେ ପ୍ରଥମ ଥର ପାଇଁ ଗୁଡସ୍ ଆଣ୍ଡ ସର୍ଭିସ ଟ୍ୟାକ୍ସ (ଜିଏସ୍ଟି) କାଉନସିଲର ବୈଠକ ଅନୁଷ୍ଠିତ ହୋଇଥିଲା । କାଉନସିଲ୍ର ଏହା ୪୦ ତମ ବୈଠକ ବସିଥିଲା । ଏଥିରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଭିଡିଓ କନ୍ଫରେନ୍ସିଂ ଜିରଆରେ ସାମିଲ ହୋଇଥିଲେ । ସେତେବେଳେ ଅର୍ଥମନ୍ତ୍ରୀ କହିଥିଲେ ଜୁଲାଇ ୨୦୧୭ ଜାନୁଆରୀଠାରୁ ୨୦୨୦ ଯାଏଁ ଯେଉଁମାନେ ଜିଏସ୍ଟିଆର୍ ୩ବି ରିଟର୍ଣ୍ଣ ଫାଇଲ କରିନାହାନ୍ତି । ସେମାନଙ୍କୁ ଲେଟ୍ ଫିସ୍ ଦେବାକୁ ପଡ଼ିବ ନାହିଁ । ସେହିଭଳି ମେ ଏବଂ ଜୁଲାଇ ମଧ୍ୟରେ ଜିଏସ୍ଟି ରିଟର୍ଣ୍ଣ ଦାଖଲ କରିବା ସମୟରେ ବିଳମ୍ୱ ଶୁଳ୍କ ଲାଗିବ ନାହିଁ ବୋଲି କୁହାଯାଇଥିଲା ।
