ବୋନସରେ ୪ ବର୍ଷର ଦରମା ଦେଉଛି କମ୍ପାନୀ, ଏକାଥରକେ ମିଳୁଛି ୫୩ଲକ୍ଷ ଟଙ୍କା !
ତାଇବାନ : କର୍ମଚାରୀଙ୍କୁ ମିଳୁଛି ବମ୍ବର ବୋନସ । ମାସେ କିମ୍ବା ଦୁଇମାସର ନୁହେଁ ଏକାଥରେ ୪ବର୍ଷର ଦରମା ବୋନସ ରୂପେ ପାଉଛନ୍ତି କର୍ମଚାରୀ । ବିଶ୍ବାସ ନହେଲେ ବି ଏହା ସତ । ଏ କମ୍ପାନୀ ହେଉଛି ତାଇବାନର ଏଭରଗ୍ରୀନ୍ ମରୀନ୍ କର୍ପୋରେସନ୍ । ଏହା ଏକ କଣ୍ଟେନର ଟ୍ରାନ୍ସପୋର୍ଟ ସିପିଙ୍ଗ କମ୍ପାନୀ । ଯେଉଁଠି କମ୍ପାନୀର କର୍ମଚାରୀ ମାନଙ୍କୁ ୫୦ମାସର ଦରମା ଏହାସହିତ ବୋନସ ରୂପରେ ଦିଆଯାଇଛି ।
ବ୍ଲୁମବର୍ଗଙ୍କ ରିପୋର୍ଟ ଅନୁସାରେ, ଏହି କମ୍ପାନୀ ନିଜର କିଛି ବଛା ବଛା କର୍ମଚାରୀଙ୍କୁ ଏହି ବମ୍ପର ବୋନସ ଦେଇଛି । ଏହି ବୋନସ ଟଙ୍କା କର୍ମଚାରୀଙ୍କ କାମ ଏବଂ ଗ୍ରେଡ୍ ଅନୁସାରେ ଦିଆଯାଇଛି । ଏହା ସହିତ ଏହି ମେଗା ବୋନସ କେବଳ ସେହି କର୍ମଚାରୀଙ୍କ ପାଇଁ ଉଦ୍ଦିଷ୍ଟ କରାଯାଇଥିଲା ଯେଉଁ ମାନେ ତାଇବାନରେ ରହି କମ୍ପାନୀ ପାଇଁ କାମ କରୁଛନ୍ତି ।
ବୋନସରେ ୫୦ ମାସର ଦରମା ଦେବା ନେଇ ଏ ପର୍ଯ୍ୟନ୍ତ କମ୍ପାନୀ ତରଫରୁ ଅଫିସିଆଲ ବିବୃତ୍ତି ଆସିନାହିଁ । କିନ୍ତୁ କମ୍ପାନୀ ପକ୍ଷରୁ କୁହାଯାଇଛି ଯେ ବର୍ଷ ଶେଷରେ ଦିଆଯାଇଥିବା ବୋନସ ବର୍ଷସାରା କମ୍ପାନୀର କାର୍ଯ୍ୟ ଉପରେ ନିର୍ଭର କରେ। କମ୍ପାନୀରେ କାର୍ଯ୍ୟ କରୁଥିବା କର୍ମଚାରୀଙ୍କ କାର୍ଯ୍ୟ ଅନୁଯାୟୀ ବୋନସ୍ ସ୍ଥିର କରାଯାଇଛି । କିନ୍ତୁ ବୋନସ ଉପରେ ଅଧିକ ବିବରଣୀ ଦେବାକୁ କମ୍ପାନୀ ମନା କରିଦେଇଛି।
