ଟଙ୍କା ନେଇ ଚମ୍ପଟ ମାରିଲା କମ୍ପାନୀ…

ସୋନପୁର: ମାତିଛନ୍ତି ଠକ କମ୍ପାନୀ । ଲୋକଙ୍କୁ ଦୁର୍ବଳତାର ସୁଯୋଗ ଲୁଟ୍ କରୁଛନ୍ତି । ଏମିତି ଅଭିଯୋଗ ଆସିଛି ସୁବର୍ଣ୍ଣପୁର ଜିଲ୍ଲାରୁ । ରଶ୍ମୀ ଇଣ୍ଟଷ୍ଟ୍ରିଜ୍ ଆଣ୍ଡ କନସଲଟେନ୍ସି ନାମକ ଏକ ଘରୋଇ କମ୍ପାନି ସ୍ଥାନୀୟ ମହିଳାଙ୍କୁ ବ୍ୟବସାୟର ବାଟ ଦେଖାଇବା ଆଳରେ ଅର୍ଥ ଲୁଟ୍ କରିଛି । ୧୦-୨୦ ହଜାର ଟଙ୍କା ବିନିମୟରେ ଘରେ ପେପରପ୍ଲେଟ୍, ଧୁପକାଠୀ, ହଳଦି ଓ ଫୁଡ ପୋସେସିଙ୍ଗ ମେସିନ ସହ କଞ୍ଚାମାଲ ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲା ।

ରୋଜଗାର ଆଶାରେ ଅନେକ ମହିଳା ଏହି କମ୍ପାନିକୁ ଟଙ୍କା ଦେଇଥିଲେ । ହେଲେ ଆଠମାସ ହେଲା ଲୋକଙ୍କୁ କୌଣସି ଜିନିଷ ଯୋଗାଇ ନଥିବା ଅଭିଯୋଗ ହୋଇଛି । କମ୍ପାନୀ ପକ୍ଷରୁ ଦିଆଯାଇଥିବା ଫୋନ୍ ନମ୍ୱରରେ ସମ୍ପର୍କ କରିବା ମଧ୍ୟ ସମ୍ଭବପର ହୋଇନଥିଲା ।

ଏହାପରେ ବାଧ୍ୟ ହୋଇ ମହିଳାମାନେ ଏକାଠି ହୋଇ ସୋନପୁର ଥାନାରେ ଲିଖିତ ଅଭିଯୋଗ କରିଛନ୍ତି । ତେବେ କମ୍ପାନୀ ବିରୋଧରେ କାର୍ଯ୍ୟାନୁଷ୍ଠାନ ନେଇ ଅତିରିକ୍ତ ଜିଲ୍ଲାପାଳ ପ୍ରତିଶ୍ରୁତି ଦେଇଛନ୍ତି । ମହିଳାମାନଙ୍କ ଆଶଙ୍କା ଏହା ଯେ, କମ୍ପାନୀ ଏମଡି ବିନୋଦ ଜେନା ଟଙ୍କା ନେଇ ଫେରାର ହୋଇ ଯାଇଛନ୍ତି ।