ମାନୁନାହାଁନ୍ତି ଅମାନିଆ, ପରିବା କିଣିବାକୁ ଆସିଥିବା ବେଳେ ୧୦୦ରୁ ଊର୍ଦ୍ଧ୍ୱ ବାଇକ୍ ଜବତ

ଭୁବନେଶ୍ୱର: ରାଜ୍ୟରେ ଦ୍ୱିତୀୟ ପର୍ଯ୍ୟାୟ ଲକଡାଉନ୍ ଆରମ୍ଭ ହୋଇଛି । ଜୁନ୍ ୧ ସକାଳ ୫ଟା ଯାଏ କଟକଣା ବଳବତ୍ତର ରହିବ । ଏହି ସମୟରେ ସକାଳ ୭ଟାରୁ ଦିନ ୧୧ଟା ମଧ୍ୟରେ ଅତ୍ୟାବଶ୍ୟକୀୟ ସାମଗ୍ରୀ କିଣିବା ପାଇଁ ଦୋକାନ ବଜାର ଖୋଲା ରହିବ । ଚାଲି ଚାଲି ପରିବା ଓ ଗ୍ରସରୀ କିଣିବାକୁ ପ୍ରଶାସନ ନିୟମ କରିଛି । ହେଲେ ଅଧିକାଂଶ ଲୋକ ବାଇକ୍ ଧରି ପରିବା କିଣିବାକୁ ଆସି ଘୁରି ବୁଲୁଛନ୍ତି ।

ଏସବୁକୁ ଦୃଷ୍ଟିରେ ରଖି କମିଶନରେଟ୍ ପୋଲିସ ପକ୍ଷରୁ ଏନଫୋର୍ସମେଣ୍ଟକୁ କଡ଼ାକଡ଼ି କରାଯାଇଛି । ବାଇକ୍ ନେଇ ପରିବା କିଣିବା ପାଇଁ ଆସିଥିବା ବେଳେ କାର୍ଯ୍ୟାନୁଷ୍ଠାନ ଗ୍ରହଣ କରିଛି କମିଶନରେଟ୍ ପୋଲିସ । ଆଜି ଗୋଟିଏ ଦିନରେ ଶହେରୁ ଅଧିକ ବାଇକ୍ ଜବତ ହୋଇଛି । କେବଳ ମେଡିକାଲ କାମ କିମ୍ବା ସରକାର ଅନୁମତି ଦେଇଥିବା କମ୍ପାନୀର କର୍ମଚାରୀ ଡକ୍ୟୁମେଣ୍ଟ ଓ ପରିଚୟ ପତ୍ର ପୋଲିସକୁ ଦେଖାଇ ଯାଇପାରିବେ ।

ସେହିଭଳି ଆଇଟି ଓ କଲ୍ ସେଣ୍ଟର କର୍ମଚାରୀଙ୍କ ପାଇଁ ଇ-ପରମିଶନ ବ୍ୟବସ୍ଥା କମିଶନରେଟ ପୋଲିସ ପକ୍ଷରୁ କରାଯାଇଛି । ୱେବ ସାଇଟ୍ ଜରିଆରେ ୨୦ ପ୍ରତିଶତ କର୍ମଚାରୀଙ୍କୁ ଅନଲାଇନ୍ ପାସ୍ ମିଳିବ । ଦ୍ୱିତୀୟ ପର୍ଯ୍ୟାୟ ଲକଡାଉନରେ ବାହାଘରରେ ସର୍ବାଧିକ ୨୫ ଜଣ ସାମିଲ୍ ହୋଇ ପାରିବେ । ବାହାଘର ଓ ଶୁଦ୍ଧିକ୍ରିୟା ପାଇଁ ୩ ଦିନ ଆଗରୁ ଅନଲାଇନରେ ପାସ୍ ପାଇଁ ଆବେଦନ କରି ପାରିବେ ।

ବାହାଘରରେ ସାମିଲ୍ ହେଉଥିବା ୨୫ ଜଣଙ୍କ ତଥ୍ୟ ପୋଲିସକୁ ଦେବାକୁ ପଡ଼ିବ । ସାମିଲ୍ ହେବାକୁ ଥିବା ଲୋକଙ୍କୁ ପୋଲିସ ମେସେଜ ପଠାଇବ । ପୋଲିସ ଚେକିଂ ବେଳେ ମେସେଜ ଦେଖାଇଲେ ବାହାଘର ସ୍ଥାନକୁ ଯାଇପାରିବେ । ନିୟମ ପାଳନ ସହ ପୋଲିସକୁ ସହଯୋଗ କରିବାକୁ ଜନସାଧାରଣଙ୍କୁ ଅପିଲ୍ କରିଛନ୍ତି ଭୁବନେଶ୍ୱର ଡିସିପି ଉମାଶଙ୍କର ଦାସ ।