ଭୁବନେଶ୍ୱର: ରାତିରେ ଜମୁଛି ମଦର ଆସର । ବାର୍ ପାଲଟୁଛି ନିଶାଡ଼ିଙ୍କ ହବ୍ । ବାରରେ ନିଶା ସେବନ ଲାଗି ଲାଇସେନ୍ସ ନାହିଁ । କିନ୍ତୁ, ଆଇନକୁ ଆଖିଠାର ମାରି ରାଜଧାନୀର ଛାତି ଉପରେ ଚାଲିଛି ନିୟମ ଉଲ୍ଲଂଘନ । ରାଜଧାନୀର ବିଭିନ୍ନ ବାରରେ ରେଡ୍ କରିଛି କମିଶନରେଟ୍ ପୋଲିସ । ରେଡ୍ ବେଳେ ବାରରେ ନିଶା ସେବନ କରୁଥିବା ୫୦ରୁ ଅଧିକ ଜଣଙ୍କ ଠାରୁ ପୋଲିସ ଜରିମାନା ଆଦାୟ କରିଥିବା ବେଳେ ବାର ମ୍ୟାନେଜରଙ୍କୁ କରାଯାଇଛି ଫାଇନ୍ ।
କମିଶନରେଟ୍ ପୋଲିସର ସ୍ୱତନ୍ତ୍ର ଟିମ୍ କ୍ୟାପିଟାଲ ଥାନା, ଖାରବେଳ ନଗର ଥାନା, ଲକ୍ଷ୍ମୀ ସାଗର ଥାନା, ଖଣ୍ଡଗିରି ଥାନା, ସହିଦନଗର ଥାନା, ଚନ୍ଦ୍ରଶେଖରପୁର ଥାନା, ଇନଫୋସିଟି ଥାନା ଅଞ୍ଚଳରେ ଥିବା ବିଭିନ୍ନ ବାରରେ ରେଡ୍ କରିଥିଲା । ଏକାଧିକ ବାରରେ ରେଡ୍ ହୋଇଥିବା ବେଳେ ଖାରବେଳ ଥାନା ଅନ୍ତର୍ଗତ ମ୍ୟାଡ୍ ମୁଲ ଓ କ୍ୟାପିଟାଲ ଥାନା ଅଞ୍ଚଳ ୟୁନିଟ-୮ ଅଜିତ ବାର ନିୟମ ଉଲଂଘନ କରିଥିବା ଜଣା ପଡ଼ିଥିଲା । ଆଇନ୍ ଉଲ୍ଲଂଘନ କରିଥିବା ବାର୍ ସିଲ୍ ଲାଗି ଅବକାରୀ ବିଭାଗକୁ କମିଶନରେଟ୍ ପୋଲିସ ଚିଠି ଲେଖିବ ବୋଲି ଜଣାପଡ଼ିଛି ।
