ପାର୍ବଣ ପୂର୍ବରୁ ମହଙ୍ଗା ମାଡ଼: ୨୦୯ ଟଙ୍କା ବଢ଼ିଲା କମର୍ସିଆଲ ଗ୍ୟାସ ସିଲିଣ୍ଡର ମୂଲ୍ୟ
ନୂଆଦିଲ୍ଲୀ: ପାର୍ବଣ ପୂର୍ବରୁ ଖାଉଟିଙ୍କୁ ଜୋରଦାର ଝଟକା । ବଢ଼ିଲା ଗ୍ୟାସ ସିଲିଣ୍ଡର ମୂଲ୍ୟ । କମର୍ସିଆଲ ଗ୍ୟାସ ସିଲିଣ୍ଡର ମୂଲ୍ୟ ବୃଦ୍ଧି କରିଛନ୍ତି ରାଷ୍ଟ୍ରାୟତ୍ତ ତୈଳ କମ୍ପାନୀ । ୧୯ କେଜିର କମର୍ସିଆଲ ସିଲିଣ୍ଡର ମୂଲ୍ୟ ୨୦୯ ଟଙ୍କା ବୃଦ୍ଧି ହୋଇଛି । ଆଜିଠୁ ଲାଗୁ ହେବ ଏହି ନୂଆ ଦର ।
ମୂଲ୍ୟ ବୃଦ୍ଧି ସହ ଦିଲ୍ଲୀରେ ୧୯ କେଜି ସିଲିଣ୍ଡର ମୂଲ୍ୟ ୧୭୩୧ ଟଙ୍କା ୫୦ ପଇସାରେ ପହଞ୍ଚିଛି । ସେପ୍ଟେମ୍ବର ୧ ତାରିଖରେ ତୈଳ କମ୍ପାନୀ କମର୍ସିଆଲ ଗ୍ୟାସ ସିଲିଣ୍ଡର ମୂଲ୍ୟ ୧୫୮ ଟଙ୍କା ହ୍ରାସ କରିଥିଲେ । ମୂଲ୍ୟ ହ୍ରାସ ପରେ ମୂଲ୍ୟ ୧,୫୨୨ ଟଙ୍କା ହୋଇଥିଲା । ଏହାପୂର୍ବରୁ ଅଗଷ୍ଟରେ ମଧ୍ୟ ତୈଳ କମ୍ପାନୀ ସିଲିଣ୍ଡର ମୂଲ୍ୟ ୯୯ ଟଙ୍କା ୭୫ ପଇସା କମାଇଥିଲେ ।
ଏମିତି ଦୁଇ ମାସରେ କମର୍ସିଆଲ ଗ୍ୟାସ ସିଲିଣ୍ଡରର ମୂଲ୍ୟ ପ୍ରାୟ ୨୫୮ ଟଙ୍କା କମିଥିଲା । ଏହା ଖାଉଟିଙ୍କୁ ସାମାନ୍ୟ ଆଶ୍ବସ୍ତି ଦେଇଥିଲା । ହେଲେ ସେପ୍ଟେମ୍ବର ପ୍ରଥମ ଦିନରୁ ଦର ବୃଦ୍ଧି ପୁଣି ଖାଉଟିଙ୍କ ଚିନ୍ତା ବଢ଼ାଇ ଦେଇଛି ।
ଏହି ଦର ବୃଦ୍ଧି ବିଭିନ୍ନ ସାମଗ୍ରୀ ଦର ବଢ଼ିବାର କାରଣ ପାଲଟିବ । ଯାହା ପାର୍ବଣରେ ପକେଟ ଉପରେ ଭାରି ପଡ଼ିବ । ବିଶେଷ କରି ଖାଦ୍ୟପେୟ ଉପରେ ଏହାର ଅଧିକ ପ୍ରଭାବ ପଢ଼ିବ । ରେଣ୍ଟୁରାଣ୍ଟରେ ଖାଇବାରେ ଲୋକଙ୍କୁ ଅଧିକ ଖର୍ଚ୍ଚ କରିବାକୁ ପଡ଼ିବ ।
