କୋଷ୍ଟାଲ ହାଇୱେକୁ ନେଇ ତୀବ୍ର ହୋଇଛି ରାଜନୀତି, ମୁଖ୍ୟମନ୍ତ୍ରୀଙ୍କ ଆଲୋଚନା ପରେ ଆଶା ସଞ୍ଚାର

ଭୁବନେଶ୍ୱର: କୋଷ୍ଟାଲ ହାଇୱେକୁ ନେଇ ତୀବ୍ର ହୋଇଛି ରାଜନୀତି । ରାଜ୍ୟ ସରକାରଙ୍କୁ ଅବଗତ ନ କରାଇ କୋଷ୍ଟାଲ ହାଇୱେ ନକ୍ସା ପରିବର୍ତ୍ତନ କରିଥିଲା କେନ୍ଦ୍ର । କେନ୍ଦ୍ର ସଡ଼କ ପରିବହନ ମନ୍ତ୍ରୀ ମୁଖ୍ୟମନ୍ତ୍ରୀଙ୍କ ମଧ୍ୟରେ ଏ ସଂପର୍କରେ ଆଲୋଚନା ପରେ ପୁଣି ଏହାକୁ ନେଇ ରାଜନୈତିକ ଲଢେଇ ଆରମ୍ଭ ହୋଇଛି ।

ଓଡିଶାରେ ହେବାକୁ ଥିବା ଉପକୂଳ ରାଜପଥକୁ ନେଇ ଚାଲିଥିବା ବିବାଦ ଭିନ୍ନ ମୋଡ ନେଇଛି । ରାଜ୍ୟ ସରକାରଙ୍କ ସହ ଆଲୋଚନା ନ କରି କୋଷ୍ଟାଲ ହାଇୱେର ନକ୍ସା ପରିବର୍ତ୍ତନ କରିଥିବା ଅଭିଯୋଗରେ କେନ୍ଦ୍ର ଉପରେ ରାଜ୍ୟ ସରକାର ବର୍ଷି ଥିବାବେଳେ ମଙ୍ଗଳବାର କେନ୍ଦ୍ର ସଡକ ପରିବହନ ମନ୍ତ୍ରୀ ନୀତିନ ଗଡକରୀଙ୍କ ସହ ମୁଖ୍ୟମନ୍ତ୍ରୀଙ୍କ ଆଲୋଚନା ପରେ ବାହାରିଛି ସମାଧାନର ସୂତ୍ର । ପୁଣି ଜାତୀୟ ରାଜପଥ ନେଇ ଆଶା ସଂଚାର ହୋଇଛି ।

ଗୋପାଳପୁର ଦୀଘା କୋଷ୍ଟାଲ ହାଇୱେକୁ ଯୋଜନା ବୋର୍ଡ ଉପାଧ୍ୟକ୍ଷ ଗୋପାଳପୁର ସାତପଡା ସଂପର୍କରେ ଯେଉଁ ଅଭିଯୋଗ ଆଣିଥିଲେ ସେ ସଂପର୍କରେ ମଧ୍ୟ ବୈଠକରେ ଆଲୋଚନା ହୋଇଛି । ତେଣୁ କୋଷ୍ଟାଲ ହାଇୱେର ନକ୍ସା ପରିବର୍ତ୍ତନ ହୋଇନାହିଁ ବୋଲି ଯୁକ୍ତି ବଢିଛି ବିଜେପି ।

ଅନ୍ୟପକ୍ଷରେ କୋଷ୍ଟାଲ ହାଇୱେ ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କ ଆଲୋଚନା ପରେ ସୁଫଳ ମିଳିବା ନେଇ ଆଶା କରାଯାଉଛି । କିନ୍ତୁ କେନ୍ଦ୍ରର ବିଜେପି ସରକାରଙ୍କଠାରୁ ପ୍ରତିଶ୍ରୁତିର ବାସ୍ତବ ପ୍ରତିଫଳନ ଉପରେ ପ୍ରଶ୍ନ ଉଠାଇଛି ବିଜେଡି । ଉପକୂଳ ରାଜପଥ ନିଶ୍ଚିତ ଭାବେ ଅର୍ଥନୈତିକ ଅଭିବୃଦ୍ଧିରେ ସହାୟକ ହେବ । କିନ୍ତୁ ଏହାର ବାସ୍ତବ ରୂପାୟନକୁ ନେଇ ସନ୍ଦେହ ପ୍ରକାଶ କରିଛି ବିଜେଡି ।