ଜଗତସିଂହପୁରରେ ଆଜି ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦଘାଟନ କରିବେ ମୁଖ୍ୟମନ୍ତ୍ରୀ

ଜଗତସିଂହପୁର: ଆଜି ଅପରାହ୍ନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜଗତସିଂହପୁରରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିବେ। ଜଗତସିଂହପୁର ଜିଲ୍ଲାରେ ୨ଶହ ୧୩ କୋଟି ୮୪ ଲକ୍ଷ ଟଙ୍କାର ୪୮ଟି ଉନୟନ ମୂଳକ ପ୍ରକଳ୍ପର ଉଦଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିବାର କାର୍ଯ୍ୟକ୍ରମ ରହିଛି।

ମୁଖ୍ୟମନ୍ତ୍ରୀ ଜଗତସିଂହପୁର ଜିଲ୍ଲାର ବିକାଶ କଥା ସବୁବେଳେ ଚିନ୍ତା କରି ଆସିଛନ୍ତି। ଆଜିର ଉଦଘାଟନୀ କାର୍ଯ୍ୟକ୍ରମରେ ୪ ଟି ମିଶନ୍ ଶକ୍ତି ଭବନ ରହିଥିବା ବେଳେ ୧୦ ଶଯ୍ୟା ବିଶିଷ୍ଟ ଆଇସିୟୁ ରହିଛି । ଆଉ ଦୁଇଟି ସ୍ବାସ୍ଥ୍ୟ ଭିତ୍ତିଭୂମି ପ୍ରକଳ୍ପ ରହିଛି। ଜଗତସିଂହପୁର ଆଳିପିଙ୍ଗଳ ଠାରେ ଦେବୀ ନଦୀ ଉପରେ ହାଇଲେବଲ ସେତୁ ନିର୍ମାଣ ନିମନ୍ତେ ଭିତ୍ତିପ୍ରସ୍ତର କରାଯିବ।

ଖାଲି ଏତିକି ନୁହେଁ ଶିକ୍ଷାର ଭିତ୍ତିଭୂମିର ବିକାଶ ନିମନ୍ତେ ଆଠଟି ଆଦର୍ଶ ବିଦ୍ୟାଳୟରେ ଛାତ୍ରୀ ନିବାସ ନିର୍ମାଣ କରାଯିବ। ବୈଷୟିକ ଶିକ୍ଷାର ଭିତ୍ତିଭୂମି ବିକାଶ, ଜିଲ୍ଲା ମୁଖ୍ୟାଳୟ ଭିତ୍ତିଭୂମିର ବିକାଶ, ଆଦର୍ଶ ବସଷ୍ଟାଣ୍ଡ ନିର୍ମାଣ କରାଯିବ। ରାସ୍ତା ନିର୍ମାଣ ଓ ସହରାଞ୍ଚଳ ଉନ୍ନୟନ ପ୍ରକଳ୍ପ ଉପରେ ମୁଖ୍ୟମନ୍ତ୍ରୀ ଗୁରୁତ୍ୱ ଦେଉଛନ୍ତି।