ବଦଳିବ କଳାହାଣ୍ଡିର ନକ୍ସା, ଖୁବଶୀଘ୍ର ବିକାଶ ଧାରାରେ ଯୋଡ଼ି ହେବ ଆଉ ଏକ ଫର୍ଦ୍ଧ

କଳାହାଣ୍ଡି: ବଦଳିବ କଳାହାଣ୍ଡି ଜିଲ୍ଲାର ନକ୍ସା । ଖୁବଶୀଘ୍ର ବିକାଶର ଧାରାରେ ଯୋଡ଼ି ହେବ ଆଉ ଏକ ଫର୍ଦ୍ଧ । ମୁଖ୍ୟମନ୍ତ୍ରୀଙ୍କ କରକମଳରେ ଇନ୍ଦ୍ରାବତୀ ଉଠା ଜଳସେଚନ ପ୍ରକଳ୍ପ ହେବ ଲୋକାର୍ପିତ । ଦୀର୍ଘ ଦିନର ଜଳସେଚନ ସମସ୍ୟା ହେବ ଦୂରୀଭୂତ ।

ଇନ୍ଦ୍ରାବତୀରୁ ସିଧାସଳଖ କ୍ଷେତକୁ ମାଡିବ ପାଣି । ଦୂର ହେବ ଜଳସେଚନ ସମସ୍ୟା । କାରଣ କଳାହାଣ୍ଡି ଜିଲ୍ଲାରେ ଲୋକାର୍ପିତ ହେବାକୁ ଯାଉଛି ଇନ୍ଦ୍ରାବତୀ ମେଗା ଉଠା ଜଳସେଚନ ପ୍ରକଳ୍ପ । ପ୍ରକଳ୍ପ ଉଦଘାଟନ ହେବା ପରେ ଇନ୍ଦ୍ରବତୀରୁ ଚାଷୀଙ୍କ କ୍ଷେତକୁ ସିଧାସଳଖ ଜଳସେଚିତ ହେବ । ଫଳରେ କୋଲସରା, ଜୟପାଟଣା, ଧର୍ମଗଡ଼ ବ୍ଲକରେ ପାଣି ସମସ୍ୟା ଦୂର ହେବା ସହ ସୁନାର ଫସଲ ଖେଳିବ ।

୨୦୧୩ ମସିହାରେ ଉଠା ଜଳସେଚନ ପ୍ରକଳ୍ପର ଶିଳାନ୍ୟାସ କରିଥିଲେ ମୁଖ୍ୟମନ୍ତ୍ରୀ । ଉଦ୍ଦେଶ୍ୟ ଥିଲା, ଅଣ ଜଳ ସେଚିତ ଅଂଚଳର ଚାଷୀଙ୍କୁ ସ୍ୱାବଲମ୍ବୀ କରିବା । ଏଥିପାଇଁ ୭୫୬ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ ଦୀର୍ଘ ୪୩ କିଲୋମିଟର କେନାଲ ଦ୍ୱାରା ୨୬ ହଜାର ୨୬୪ ହେକ୍ଟର ଜମିରେ ଜଳ ସେଚିତ ହେବ ।