କେନ୍ଦ୍ରାପଡ଼ାରେ ସ୍ମାର୍ଟ ହେଲଥ କାର୍ଡ ବଣ୍ଟନର ଶୁଭାରମ୍ଭ କଲେ ମୁଖ୍ୟମନ୍ତ୍ରୀ, ଉଦୟ ହେଲା ବିକାଶର ନୂଆ ସୂର୍ଯ୍ୟ

କେନ୍ଦ୍ରାପଡ଼ା: କେନ୍ଦ୍ରାପଡ଼ାରେ ଆରମ୍ଭ ହେଲା ବିକାଶର ନୂଆ ଧାରା । ଲେଖାହେଲା ବିକାଶର ନୂଆ କାହାଣୀ । ସ୍ବାସ୍ଥ୍ୟ ସେବାରେ ଓଡ଼ିଶାର ସ୍ବର୍ଣ୍ଣିମ ଅଧ୍ୟାୟରେ ଯୋଡ଼ି ହେଲା କେନ୍ଦ୍ରାପଡ଼ା । କେନ୍ଦ୍ରାପଡ଼ାବାସୀ ପାଇଲେ ସ୍ମାର୍ଟ ହେଲଥ୍ ସେବାର ଚାବିକାଠି ।

ବିଏସକେଓ୍ବାଇ ଯୋଜନାରେ କେନ୍ଦ୍ରାପଡ଼ାବାସୀଙ୍କୁ ସ୍ମାର୍ଟ ହେଲଥ କାର୍ଡ ବଣ୍ଟନର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହାଦ୍ବାରା ଜିଲ୍ଲାର ସାଢ଼େ ୧୧ଲକ୍ଷ ଲୋକ ଉପକୃତ ହେବେ ।

କେନ୍ଦ୍ରାପଡ଼ା ବିଜୁବାବୁଙ୍କ କର୍ମଭୂମି ଥିଲା । କେନ୍ଦ୍ରାପଡ଼ାବାସୀଙ୍କ ସୁଖ ଦୁଃଖରେ ବିଜୁବାବୁ ସାଥୀରେ ଥିଲେ। ଆଜି ବି କେନ୍ଦ୍ରାପଡ଼ାର ମାଟି, ପାଣି, ପବନରେ ବିଜୁବାବୁ ରହିଛନ୍ତି ।

ଜିଲ୍ଲାରେ ୧୫ ଶହ କୋଟିରୁ ଅଧିକ ଟଙ୍କାର ବିଭିନ୍ନ ବିକାଶମୂଳକ ପ୍ରକଳ୍ପର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ । ଏସବୁ ପ୍ରକଳ୍ପ କେନ୍ଦ୍ରାପଡ଼ା ବିକାଶକୁ ଆହୁରି ଆଗକୁ ନେବ । ଦେଶରେ ଶିଳ୍ପ ମାନଚିତ୍ରରେ ଯୋଡ଼ି ହେବାକୁ ଯାଉଛି କେନ୍ଦ୍ରାପଡ଼ା । ଏଥିପାଇଁ ଆର୍ସେଲର ମିତ୍ତଲ ସହ ବୁଝାମଣା କରିଛନ୍ତି ରାଜ୍ୟ ସରକାର । କେନ୍ଦ୍ରାପଡ଼ାର ବିକାଶ କ୍ଷେତ୍ରରେ ଏହା ଏକ ନୂଆ ଯୁଗ ଆଣିବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ସେହିପରି ଭୂମିହୀନ ଚାଷୀଙ୍କ ପାଇଁ ବଳରାମ ଯୋଜନାରେ ୨୧ ହଜାର ଚାଷୀଙ୍କୁ ୪୩ କୋଟି ଟଙ୍କାର ସହାୟତା ଯୋଗାଇ ଦିଆଯାଉଛି । ଭୂମିହୀନ ଚାଷୀଙ୍କୁ ସହାୟତା ଦେବାରେ ଓଡ଼ିଶା ସାରା ଦେଶରେ ପ୍ରଥମ ।