ଦୁବାଇକୁ ବିମାନ ଉଡାଣ ପାଇଁ ଟିକେଟ ବିକ୍ରିର ଶୁଭାରମ୍ଭ କଲେ ମୁଖ୍ୟମନ୍ତ୍ରୀ

ଭୁବନେଶ୍ବର: ଆକାଶ ପଥରେ ଆରମ୍ଭ ହେବ ଓଡ଼ିଶାର ସ୍ବର୍ଣ୍ଣିମ ଅଧ୍ୟାୟ । ଭୁବନେଶ୍ବରରୁ ଦୁବାଇକୁ ସିଧା ଉଡ଼ିବ ବିମାନ । ଏଥିପାଇଁ ଟିକେଟ ବିକ୍ରିର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଥମ ୮ଟି ଟିକେଟ ମିଶନଶକ୍ତି ମହିଳା, କ୍ରୀଡ଼ାବିତ, ଆଦିବାସୀ ନେତା ଓ ଦକ୍ଷ କଳାକାରଙ୍କୁ ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ । ସୁନ୍ଦରଗଡ ଏସଡିସି ଚେୟାରମ୍ୟାନ୍ ବିନୟ କୁମାର ଟପ୍ପୋ, କେନ୍ଦୁଝର ଏସଡିସି ଚେୟାରମ୍ୟାନ୍ ଲକ୍ଷ୍ମୀ ନାୟକ, କୋରାପୁଟ ଡିଏଲଏଫ ସଭାପତି ଜ୍ୟୋତିରେଖା ଚେତୀ, ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ, ଫୁଟବଲ ତାରକା ଅନୁରାଧା ବିଶ୍ବାଳ, ସୁଟର ଶ୍ରୀୟାନକା ସାଦାଙ୍ଗୀ ପ୍ରମୁଖଙ୍କୁ ଟିକେଟ ହସ୍ତାନ୍ତର କରିଛନ୍ତି ମୁଖ୍ୟମନ୍ତ୍ରୀ ।

ମୁଖ୍ୟମନ୍ତ୍ରୀ କହିଛନ୍ତି, ‘ସଂଯୋଗୀକରଣ ହେଉଛି ବିକାଶର ଚାବିକାଠି । ଦୁବାଇ ସହିତ ସିଧାସଳଖ ସଂଯୋଗ ବିଶ୍ବକୁ ବିକାଶର ଗେଟ ଓ୍ବେ ସାଜିବ । ଆଇଟି, ଉତ୍ପାଦନ, ପର୍ଯ୍ୟଟନରେ ଓଡ଼ିଶାର ବିକାଶରେ ଏହା ପ୍ରଭାବ ପକାଇବ । ଦୁବାଇ ସବୁଠୁ ବଡ ଟ୍ରାଭେଲ ହବ୍ ମଧ୍ୟରୁ ଅନ୍ୟତମ । ସିଧାସଳଖ ବିମାନ ସଂଯୋଗ ଦ୍ବାରା ପୁଞ୍ଜି ବିନିଯୋଗ, ବାଣିଜ୍ୟ ଓ ପର୍ଯ୍ୟଟନ ପାଇଁ ନୂତନ ରାସ୍ତା ଖୋଲିବ । ଓଡ଼ିଶାକୁ ଆସିବାକୁ ଚାହୁଁଥିବା ପର୍ଯ୍ୟଟକଙ୍କ ପାଇଁ ମଧ୍ୟ ସୁବିଧା ହେବ ।’

ଏବେ ସବସିଡି ରାଶିରେ ଟିକେଟ୍ ମୂଲ୍ୟ ୧୦ ହଜାର ଟଙ୍କା ରହିଛି । ମେ’ ୧୫ରୁ ଭୁବନେଶ୍ୱରରୁ ଡାଇରେକ୍ଟ ଦୁବାଇକୁ ଉଡ଼ିବ ବିମାନ । ଏହାର ଦୁଇ ସପ୍ତାହ ମଧ୍ୟରେ ସିଙ୍ଗାପୁର ଏବଂ ବ୍ୟାଙ୍କକକୁ ଅନ୍ତର୍ଜାତୀୟ ବିମାନ ଉଡାଣ ଆଣମ୍ଭ ହେବ ।