ଗୋପାଳପୁର ବେଳାଭୂମିରେ ଆଡଭେଞ୍ଚର ପାର୍କ

ଗଞ୍ଜାମ: ଗୋପାଳପୁର ବେଳାଭୂମିରେ ଉଦଘାଟିତ ହେଲା ଆଡଭେଞ୍ଚର ପାର୍କ । ଆଜି ଏହାକୁ ଲୋକାର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଓଡ଼ିଶାର ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ନାମରେ ନାମିତ ଏହି ପାର୍କ ପର୍ଯ୍ୟଟନ ବିକାଶରେ ସହାୟକ ହେବା ସହ ଯୁବପୀଢିଙ୍କୁ ଆକର୍ଷିତ କରିବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ୨ କୋଟି ୫୦ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି ଆଡଭେଞ୍ଚର ପାର୍କରେ ଅନେକ ଦୁଃସାହସିକ କ୍ରିଡ଼ାର ମଜା ଉଠାଇ ପାରିବେ ପର୍ଯ୍ୟଟକ ।

ପ୍ରଥମ କରି ଏଠାରେ ୨୫୦ ମିଟର ଲମ୍ବର ରିଭର କ୍ରସିଂ ଜିପ୍ ବିକଶିତ କରାଯାଇଛି । ଏହାସହ ଗନ୍ ସୁଟ୍, ବିଶାଳ ଝୁଲା, ବଗି ଟ୍ରମ୍ପଲିନ୍, ବୁଲ୍ ରାଇଡର, ନେଟ୍ କ୍ରିକେଟର ମଜା ଲୁଟିପାରିବେ ଲୋକେ । ଏହାଛଡା ରକ୍ କ୍ଲାଇମ୍ବିଂ, ରୋପ ଓ୍ବେ, ଡାନ୍ସିଂ କାର୍, ଜୋରବିଙ୍ଗ୍ ପରି ଅନେକ ଦୁଃସାହସିକ କ୍ରୀଡାର ସୁବିଧା ରହିଛି । ଛୋଟ ପିଲାଙ୍କ ଠାରୁ ଆରମ୍ଭ କରି ବୟସ୍କ ପର୍ଯ୍ୟନ୍ତ ସବୁ ବର୍ଗର ଲୋକଙ୍କ ପାଇଁ ରହିଛି ଭଳିକି ଭଳି ସୁବିଧା । ଉଦଘାଟନ ଅବସରରେ 5-T ସଚିବଙ୍କ ସହ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ, ବିଧାୟକ, ଗୋପାଳପୁର ଏନଏସି ଅଧ୍ୟକ୍ଷ ଓ ଗଞ୍ଜାମ ଜିଲ୍ଲାପାଳ ଉପସ୍ଥିତ ଥିଲେ ।