ଜଳସମ୍ପଦ ବିଭାଗର ନବନିଯୁକ୍ତ ୨୫୭ କନିଷ୍ଠ ଯନ୍ତ୍ରୀଙ୍କୁ ମୁଖ୍ୟମନ୍ତ୍ରୀଙ୍କ ଦିଗଦର୍ଶନ

ଭୁବନେଶ୍ବର: ନବନିଯୁକ୍ତ ଜଳସମ୍ପଦ ବିଭାଗର କନିଷ୍ଠ ଯନ୍ତ୍ରୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦିଗଦର୍ଶନ । ଆଜି ଜଳସମ୍ପଦ ବିଭାଗରେ ୨୫୭ ଜଣ କନିଷ୍ଠ ଯନ୍ତ୍ରୀ ଯୋଗଦାନ କରିଛନ୍ତି । ସେମାନଙ୍କ ମଧ୍ୟରେ ଅଛନ୍ତି ୮୭ ଜଣ ମହିଳା । ଲୋକସେବା ଭବନରେ ସେମାନଙ୍କୁ ଦିଗଦର୍ଶନ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ଭର୍ଚୁଆଲରେ ସେମାନଙ୍କୁ ଶୁଭେଚ୍ଛା ଜଣାଇବା ସହ ନିଜର କର୍ତ୍ତବ୍ୟ ପ୍ରତି ସଚେତନ ରହି ରାଜ୍ୟବାସୀଙ୍କ ଉନ୍ନତି ଉଦ୍ଦେଶ୍ୟରେ ଉତ୍ସର୍ଗୀକୃତ ଭାବେ କାମ କରିବାକୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ । କୃଷିକୁ ଜଳ ଯୋଗାଣ ସହ ଜଳ ସମ୍ପଦ ବିଭାଗ ବନ୍ୟା ମୁକାବିଲା କରି ଲୋକଙ୍କ ଜୀବନ ବଞ୍ଚାଇବାରେ ସହାୟତା ଦେଇଥାଏ । ରାଜ୍ୟରେ ୨ ହଜାର ୫ ଶହ ଡ୍ୟାମ ରହିଛି । ଲୋୟର ସୁକତେଲ, କାନପୁର ଓ ଘଟକେଶ୍ବର ପରି ଡ୍ୟାମର କାର୍ଯ୍ୟ ଜାରି ରହିଛି । ରାଜ୍ୟ ସରକାର ୩୦ଟି ଜଳ ସଂରକ୍ଷଣ ବ୍ୟବସ୍ଥା ଓ ୧୬ଟି ପାଇପ ଲାଇନ ପ୍ରୋଜେକ୍ଟ ପାଇଁ ୧୨ ହଜାର କୋଟି ଟଙ୍କା ଖର୍ଚ୍ଚ କରିଛନ୍ତି । ନବନିଯୁକ୍ତ କନିଷ୍ଠ ଯନ୍ତ୍ରୀଙ୍କ ଉପରେ ଏହାର ରକ୍ଷଣାବେକ୍ଷଣ ଓ ଉପଯୋଗର ଭାର ରହିଛି । ଏହି ଅବସରରେ ଫାଇଭ-ଟି ଉପଯୋଗ ସମ୍ପର୍କରେ ମଧ୍ୟ ଆଲୋକପାତ କରିଥିଲେ ମୁଖ୍ୟମନ୍ତ୍ରୀ । ଫାଇଭ-ଟି ଆଧାରରେ କାମ କରିବାକୁ ସେ ନବନିଯୁକ୍ତ କନିଷ୍ଠ ଯନ୍ତ୍ରୀଙ୍କୁ ପରାମର୍ଶ ଦେଇଛନ୍ତି ।