ଭୁବନେଶ୍ବରରେ ମିଶନ ଶକ୍ତି ବଜାର ଉଦଘାଟିତ

ଭୁବନେଶ୍ବର: ଭୁବନେଶ୍ବରରେ ଉଦଘାଟିତ ହୋଇଛି ମିଶନ ଶକ୍ତି ବଜାର। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବଜାରକୁ ଉଦଘାଟନ କରିଛନ୍ତି। ମାଆଙ୍କ ଉଦ୍ଯୋଗୀ ଆଶାକୁ ଆହୁରି ମଜଭୁତ କରିବ ମିଶନ ଶକ୍ତି ବଜାର। ଏହା ସମ୍ପୂର୍ଣ୍ଣ ଭାବେ ମହିଳାଙ୍କ ଦ୍ବାରା ପରିଚାଳିତ ହେଉଛି। ବଜାରକୁ ଲୋକାର୍ପଣ କରିବା ପରେ ଏହାକୁ ବୁଲି ଦେଖିଥିଲେ ମୁଖ୍ଯମନ୍ତ୍ରୀ।

ବଜାରରେ ପରିସରରେ ନିର୍ମିତ ମିଶନ ଶକ୍ତି କାଫେରେ କଫି ପିଇଥିଲେ ମୁଖ୍ଯମନ୍ତ୍ରୀ। ମିଶନ ଶକ୍ତି ବଜାରରୁ ଏକ କଂସାର ବେଲା କିଣିଥିଲେ ମୁଖ୍ଯମନ୍ତ୍ରୀ। ମହିଳା ସ୍ବୟଂ ସହାୟକ ଗୋଷ୍ଠୀଙ୍କ ମୌଳିକ ଉତ୍ପାଦ ବିକ୍ରିବଟା ପାଇଁ ମିଶନ ଶକ୍ତି ବିଭାଗ ୧୦ ହଜାର ବର୍ଗଫୁଟ ଅଞ୍ଚଳରେ ନିର୍ମାଣ ହୋଇଛି ଏହି ବଜାର। ଏହାର ପରିଚାଳନା ଦାୟିତ୍ବ ପାଇଛି ଖୋର୍ଦ୍ଧା ମାତୃଶକ୍ତି ଫାର୍ମର୍ସ ପ୍ରଡ୍ୟୁସ୍ କମ୍ପାନୀ ଲିମିଟେଡ୍।

ଲୋକଙ୍କ ପାଇଁ ଏହି ବଜାର ସକାଳ ୧୦ଟାରୁ ରାତି ୯ଟା ପର୍ଯ୍ୟନ୍ତ ଖୋଲା ରହିବ। ଏହି ବଜାରରେ ଲୋକେ ଝାଡ଼ୁଠାରୁ ପାଟଶାଢ଼ୀ, ବେତ ସୋଫା, ସବାଇ ଘାସରେ ନିର୍ମିତ ସାମଗ୍ରୀ, ମାଟି ବାସନ, ଡୋକରା ସାମଗ୍ରୀ, ଘରକରଣା ଜିନିଷ, ମିଲେଟ୍ସ୍ ଉତ୍ପାଦ, ପଟ୍ଟଚିତ୍ର, ପେଣ୍ଟିଂ, କନ୍ଧମାଳ ହଳଦି, ମାଣ୍ଡିଆ, କୋରାପୁଟ କପି, ମହୁ, ସମେତ ପ୍ରାୟ ପ୍ରାୟ ୨୮ ପ୍ରକାର ଉତ୍ପାଦ କିଣିବାର ସୁବିଧା ପାଇବେ। ୩୦ ଜିଲ୍ଲାରେ ମାଆମାନେ ପ୍ରସ୍ତୁତ କରୁଥିବା ହାତ ତିଆରି ସାମଗ୍ରୀ ଏହି ବଜାରରେ ୩୬୫ ଦିନ ମିଳିବ। ଏବେ ବଜାର ସୁବିଧା ଦେଇ ମାଆଙ୍କ ଉତ୍ପାଦ କିପରି ବିଦେଶରେ ପହଞ୍ଚି ପାରିବ ସେଥିପାଇଁ ମୁଖ୍ୟମନ୍ତ୍ରୀ ନେଇଛନ୍ତି ଏହି ବଳିଷ୍ଠ ପଦକ୍ଷେପ।