ଦଳୀୟ ବିଧାୟକଙ୍କ ସହ ଭିଡିଓ କନଫରେନ୍ସିଂ ଆଲୋଚନା, ନବୀନ କହିଲେ, ଲୋକଙ୍କ ପାଇଁ ପ୍ରେରଣା ହୁଅ

ଏବେ ମାନବ ଜାତି ଏକ ଅଭୂତପୂର୍ବ ସଂକଟ ମଧ୍ୟ ଦେଇ ଗତି କରୁଛି। ଏହି ସଂକଟକୁ ସଫଳ ଭାବରେ ମୁକାବିଲା କରିବା ପାଇଁ ମହାପ୍ରଭୁ ଆମକୁ ଆଶୀର୍ବାଦ ଦିଅନ୍ତୁ । ଏତିକି ପ୍ରାର୍ଥନା । ମହାପ୍ରଭୁଙ୍କ ଆଶୀର୍ବାଦ, ଜନସାଧାରଣଙ୍କ ସହଯୋଗ, ଲୋକ ପ୍ରତିନିଧି ଓ ସରକାରୀ କର୍ମଚାରୀ ମାନଙ୍କ କଠିନ ପରିଶ୍ରମ ଯୋଗୁ ଆମ ରାଜ୍ୟ ଓଡିଶା କୋଭିଡ ଯୁଦ୍ଧରେ ଅନ୍ୟ ମାନଙ୍କ ଠାରୁ ଭଲ ସ୍ଥିତିରେ ଅଛି । ସାରା ଦେଶରେ ଓଡିଶାର ସୁସ୍ଥତା ହାର ସବୁଠାରୁ ଭଲ ପ୍ରଦର୍ଶନ କରୁଥିବା ରାଜ୍ୟ ମାନଙ୍କ ମଧ୍ୟରୁ ଅନ୍ୟତମ । ସେହିପରି ମୃତ୍ୟୁହାର ମଧ୍ୟ ସବୁଠାରୁ କମ୍‌ ଅଛି। ବିଜୁ ଜନତା ଦଳର ବିଧାୟକମାନଙ୍କୁ ଭିଡିଓ କନଫରେନ୍ସ ମାଧ୍ୟମରେ ଏଭଳି କହି ସମ୍ୱୋଧିତ କରିଛନ୍ତି ଦଳର ମୁଖିଆ ତଥା ରାଜ୍ୟର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେ ବିଧାୟକମାନଙ୍କୁ ୮ଟି ବିନ୍ଦୁର ପରାମର୍ଶ ମଧ୍ୟ ଦେଇଛନ୍ତି ।

  କହିଛନ୍ତି ଯେ, ଲକ୍‌ଡାଉନ୍‌ ପରେ ପ୍ରାୟ ୭ ଲକ୍ଷ ଲୋକ ଓଡିଶା ଫେରିଛନ୍ତି। ଓଡିଶା ଫେରିଥିବା ପ୍ରବାସୀ ମାନଙ୍କର ଟ୍ରେନ ଭଡା ଏବଂ ସଫଳ ଭାବରେ କ୍ୱାରେଣ୍ଟାଇନ୍ ଶେଷ କରିଥିବା ଲୋକମାନଙ୍କୁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ୨ହଜାର ଟଙ୍କା ଲେଖାଏ ଦିଆଯାଇଛି। ଏହାସହିତ TMCରେ ୧୪ ଦିନ ପାଇଁ ଖାଦ୍ୟ ଏବଂ ଅନ୍ୟାନ୍ୟ ସୁବିଧା ମାଗଣାରେ ଯୋଗାଇ ଦିଆଯାଇଛି। ଦେଶର ଅଳ୍ପ କେତେକ ରାଜ୍ୟ ମଧ୍ୟରୁ ଓଡିଶା ହେଉଛି ଅନ୍ୟତମ ରାଜ୍ୟ, ଯିଏ କି Covid Careର ସମସ୍ତ ଖର୍ଚ୍ଚ ଯଥା – ପରୀକ୍ଷା, ଡାକ୍ତରଖାନାରେ ରହିବା, ଚିକିତ୍ସା ଖର୍ଚ୍ଚ, ଔଷଧ  ଖର୍ଚ୍ଚ ଓ ଯିବାଆସିବା ଖର୍ଚ୍ଚ ଆଦି ସବୁକିଛି ରାଜ୍ୟ ସରକାର ବହନ କରିଛନ୍ତି। ଏହି ସୁବିଧା ରାଜ୍ୟର ସବୁ ଜନସାଧାରଣ –  ବି.ପି.ଏଲ୍‌,  ଏ.ପି.ଏଲ୍, ଧନୀ ଅବା ଗରିବ, ଗାଁରେ ରୁହନ୍ତୁ ବା ସହରରେ – କୋଭିଡ ରୋଗରେ ପୀଡିତ ଭାଇଭଉଣୀ ମାନଙ୍କୁ ସମସ୍ତଙ୍କୁ, ମାଗଣା ଚିକିତ୍ସା ସୁବିଧା ଆମେ ଯୋଗାଇ ଦେଇଛୁ।ଏହାବ୍ୟତୀତ ସରକାର ସାମାଜିକ ଓ ଖାଦ୍ୟ ନିରାପତ୍ତା ପାଇଁ   ୪ ମାସର ରାସନ ଆଗୁଆ ଦେବା ସହିତ ବିଭିନ୍ନ ଭତ୍ତା ମଧ୍ୟ ଆଗୁଆ ପ୍ରଦାନ କରିଛନ୍ତି। ମିଶନ ଶକ୍ତିର ମା ମାନେ ଗରିବ ଲୋକ ମାନଙ୍କୁ, ଅସୁବିଧାରେ ଥିବା ଲୋକମାନଙ୍କୁ ଏହି ସମୟ ମଧ୍ୟରେ ୨.୫ କୋଟି ଖାଦ୍ୟ ଥାଳି ଯୋଗାଇ ଦେଇଛନ୍ତି ବୋଲି ମୁଖ୍ୟମନ୍ତ୍ରୀ କହିଛନ୍ତି ।