ପୁରୀ ଜିଲ୍ଲା କୃଷି ଅଧିକାରୀଙ୍କ କାର୍ଯ୍ୟାଳୟରେ ଷ୍ଟାଫ ମରୁଡି଼ । ଖାଲି ପଡିଛି ଅନେକ ପଦପଦବୀ । ଜଣେ ଅଧିକାରୀ ଓ ଜଣେ କିରାଣୀଙ୍କୁ ନେଇ ଚାଲୁଛି କାର୍ଯ୍ୟାଳୟ । ହୀନସ୍ତା ଭୋଗୁଛନ୍ତି ଚାଷୀ । ସବୁ ଜାଣି ଚୁପ ବସିଛି ପ୍ରଶାସନ । ପୁରୀ ଜିଲ୍ଲା ସତ୍ୟବାଦୀ ବ୍ଲକରେ ଚାଷୀଙ୍କ ଉନ୍ନତି ନିମନ୍ତେ ଲକ୍ଷାଧିକ ଟଙ୍କା ବ୍ୟୟରେ ଏହି କାର୍ଯ୍ୟାଳୟ ନିର୍ମାଣ ହୋଇଥିଲା । ହେଲେ ଏଠାରେ ଆବଶ୍ୟକ ସଂଖ୍ୟକ ଅଧିକାରୀ ନାହାନ୍ତି । ଦାଇତ୍ୱରେ ଥିବା ଅଧିକାରୀ ମାନେ ଅନେକ ସମୟରେ କାର୍ଯ୍ୟାଳୟକୁ ଆସୁନାହାନ୍ତି । କିରାଣୀଙ୍କ ଉପରେ ସମସ୍ତ ଦାୟିତ୍ଵ ନ୍ୟସ୍ତ କରାଯାଇଛି । ଫଳରେ ଅନେକ ଚାଷୀ କାର୍ଯ୍ୟାଳୟକୁ ଆସି ନିରାଶ ହୋଇ ଫେରୁଥିବା ଅଭିଯୋଗ ହୋଇଛି ।
ଜିଲ୍ଲା କୃଷି ଅଧିକାରୀଙ୍କ କାର୍ଯ୍ୟାଳୟରେ ଆବଶ୍ୟକୀୟ ଷ୍ଟାଫ ନଥିବାରୁ ଅଫିସ ଖାଁ ଖାଁ ରହୁଛି । ଷ୍ଟାଫଙ୍କ ପାଇଁ ନିର୍ମିତ କ୍ବାର୍ଟର ଗୁଡିକ ବ୍ୟବହାର ନହେବାରୁ ଭୂତକୋଠି ପାଲଟିଗଲାଣି । ମରାମତି ନହେଲେ ତାହା କେବେ ଭୁଶୁଡି ପଡିବ ତାହା କହିବା ମୁସ୍କିଲ । ସେପଟେ ଚାଷୀଙ୍କ ସମସ୍ୟା ଦିନକୁ ଦିନ ବଢ଼ିବାରେ ଲାଗିଛି । କୃଷି କ୍ଷେତ୍ର ଅଧିକାରୀଙ୍କ ଦେଖା ନମିଳିବାରୁ ପିଏମ କିଷାନ, ସିଏମ କିଷାନ, ଡିଜିଟାଲାଇଜେସନ, ଚାଷୀ ପଞ୍ଜୀକରଣ ଆଦି କାର୍ଯ୍ୟ ବାଧାପ୍ରାପ୍ତ ହେଉଛି । ଅନ୍ୟପଟେ ଜିଲ୍ଲା କୃଷି ଅଧିକାରୀଙ୍କ କହିବା କଥା ହେଲା, ୪ଟି ବ୍ଲକରେ ୨୦ ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟ କରୁଛୁ । କର୍ମଚାରୀଙ୍କ ଅଭାବ ସତ୍ତ୍ୱେ ଚାଷୀଙ୍କ ସମସ୍ୟା ସମାଧାନ ପାଇଁ ଉଦ୍ୟମ ଜାରି ରହିଛି ।
