ପାଇକ ବିଦ୍ରୋହୀଙ୍କୁ ପ୍ରଥମ ସ୍ୱାଧିନତା ସଂଗ୍ରାମୀ ମାନ୍ୟତା ଦାବିରେ ୨୭ରେ ହେବ ବିଶାଳ ପାଇକ ସମାବେଶ

ଭୁବନେଶ୍ୱର: ପୁଣି ତେଜିବ ପାଇକ ବିଦ୍ରୋହୀଙ୍କୁ ପ୍ରଥମ ସ୍ୱାଧିନତା ସଂଗ୍ରାମୀ ମାନ୍ୟତା ଦାବି । ଏପ୍ରିଲ୍‌ ୨୭ରେ ଭୁବନେଶ୍ୱରରେ ରାଜ୍ୟସ୍ତରୀୟ ବିଶାଳ ପାଇକ ଆଖଡ଼ା ଜନଗର୍ଜନ ସମାବେଶ ଅନୁଷ୍ଠିତ ହେବ । ସମାନ ଦାବିରେ ପୁଣି ବିରୋଧ ହେବ ବୋଲି ସାମ୍ବାଦିକ ସମ୍ମିଳନୀ କରି ସୁଚନା ଦେଇଛି ମହାସଂଘ ।

ବରୁଣେଇ ଠାରୁ ବାହାରି ଖୋର୍ଦ୍ଧା ସହର ପରିକ୍ରମା କରି ମାଷ୍ଟରକ୍ୟାଣ୍ଟିନ୍ ଠାରୁ ରାମ ମନ୍ଦିର ରାଲି ପରେ ପ୍ରଦର୍ଶନୀ ପଡ଼ିଆ ଠାରେ ହେବ ସମାବେଶ। ପାଇକ ବିଦ୍ରୋହକୁ ଭାରତର ପ୍ରଥମ ସ୍ୱାଧିନତା ସଂଗ୍ରାମ ମାନ୍ୟତା, ଖୋର୍ଦ୍ଧା ବରୁଣେକ ପାହାଡ଼ ପାଦଦେଶରେ ପାଇକ ସ୍ମୃତି ସ୍ମାରକୀ ନିର୍ମାଣ ପାଇଁ ଜମି ଯୋଗାଇଦେବା ଦାବୀରେ ହେବ ସମାବେଶ। ଏହା ସହ ଓଡ଼ିଶା ପାଇକ ରେଜିମେଣ୍ଟ ଗଠନ କରିବାକୁ ମଧ୍ୟ ଦାବି। ତେବେ ଦୀର୍ଘ ଦିନ ଧରି ଏହି ଦାବି ରହିଛି। ମହାମାରୀ ପାଇଁ ଦିଲ୍ଲୀରେ ସମାବେଶ ପାଇଁ ଅନୁମତି ମିଳିଲାନି କିନ୍ତୁ ଆଗାମୀ ଦିନରେ ପାଇକ ମହାସଂଘ ନିଶ୍ଚିତ ଭାବେ ଦିଲ୍ଳୀ ଯାଇ ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତିଙ୍କୁ ଦାବିପତ୍ର ଦେବ।

୧୮୧୭ ମସିହାର ପାଇକ ବିଦ୍ରୋହକୁ ପ୍ରଥମ ସ୍ବାଧୀନତା ସଂଗ୍ରାମର ମାନ୍ୟତା ଦାବି ହୋଇଛି । ଆସନ୍ତା ୨୭ରେ ଭୁବନେଶ୍ବରରେ ବିଶାଳ ପାଇକ ସମାବେଶ ପାଇଁ ଡାକରା ଦେଇଛି ବୀର ମହାସଂଘ । ବାରମ୍ବାର କେନ୍ଦ୍ର ସରକାର ସେମାନଙ୍କ ଦାବିକୁ ଉପେକ୍ଷା କରୁଥିବାରୁ ପାଇକମାନେ ମେଳି ବାନ୍ଧୁଛନ୍ତି । ୧୦ ହଜାରରୁ ଅଧିକ ପାଇକ ପ୍ରଥମ ସ୍ବାଧୀନତାର ମାନ୍ୟତା ଦାବି ନେଇ କେନ୍ଦ୍ର ବିରୋଧରେ ଗର୍ଜିବେ । ଦାବି ପୂରଣ ନ ହେବା ଯାଏ ଆନ୍ଦୋଳନ ଜାରି ରହିବ ବୋଲି ସଂଘ କହିଛି । ପାଇକମାନଙ୍କ ଦାବିକୁ ସମର୍ଥନ କରିଛି କଂଗ୍ରେସ ।
ବରୁଣେଇରେ ପାଇକ ସ୍ମାରକୀ ପ୍ରତିଷ୍ଠା ପାଇଁ ରାଜ୍ୟ ସରକାର ଜମି ଯୋଗାଇ ଦେଇଛନ୍ତି । ପାଇକ ବିଦ୍ରୋହକୁ ପ୍ରଥମ ସ୍ବାଧୀନତା ସଂଗ୍ରାମର ମାନ୍ୟତା ଦେବା ପାଇଁ ବିଜେଡି ସାଂସଦମାନେ ତଥ୍ୟ ସହ ସଂସଦର ଉଭୟ ଗୃହରେ ଦାବି ଉପସ୍ଥାପନ କରିଛନ୍ତି । ଏ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ କେନ୍ଦ୍ରକୁ ଚିଠି ଲେଖିଛନ୍ତି । ପାଇକମାନଙ୍କ ବଳିଦାନ ପାଇଁ ଏହି ଲଢେଇ ଜାରି ରହିବ ବୋଲି ଶାସକ ଦଳ କହିଛି ।
ଜୟୀ ରାଜଗୁରୁ, ବକ୍ସି ଜଗବନ୍ଧୁ ପରି ବୀରମାନେ ଅପୂର୍ବ ବୀରତ୍ବର ସହ ଇଂରେଜମାନଙ୍କ ବିରୋଧରେ ଲଢିଥିଲେ । ସେମାନଙ୍କ ବଂଶଜ ପାଇକମାନେ ଆଜି ନିଜର ବୀରତ୍ବ ଓ ବଳିଦାନକୁ ମାନ୍ୟତା ଦାବିରେ ରାଜରାସ୍ତାରେ ଲଢେଇ କରୁଛନ୍ତି । କେନ୍ଦ୍ର ସରକାର ତୁରନ୍ତ ଏ ନେଇ ଉଚିତ ପଦକ୍ଷପ ନ ନେଲେ ଆଗାମୀ ଦିନରେ ପଲ୍ଲୀରୁ ଦିଲ୍ଲୀ ଯାଏ ଲଢେଇ ଜୋରଦାର କରାଯିବ ବୋଲି ଓଡ଼ିଶା ବୀର ମହାସଂଘ ପକ୍ଷରୁ କୁହାଯାଇଛି ।