ଗ୍ରାମବାସୀଙ୍କ ବିରୋଧ ଯୋଗୁଁ ଫେଲ୍ ମାରିଲା ଜନ ଶୁଣାଣି

ଚୌଦ୍ଵାର : ଚୌଦ୍ଵାର ବାଣିପଦା ପଞ୍ଚାୟତରେ ଥିବା ଇଡକୋ ଜମିରେ ବାୟୋ-ମେଡିକାଲ ବର୍ଜ୍ୟବସ୍ତୁ ପରିଚାଳନା ପ୍ରକଳ୍ପ ସ୍ଥାପନ କରାଯିବ । ଓଡ଼ିଶା ସରକାରଙ୍କ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ କାର୍ଯ୍ୟକ୍ରମ ହତକୁ ନିଆଯାଇଛି । ଏନେଇ ଆଜି ହେବାକୁ ଥିବା ଜନଶୁଣାଣିକୁ ସ୍ଥାନୀୟ ଗ୍ରାମବାସୀ ବିରୋଧ କରିଛନ୍ତି । ଆଗାମୀ ଦିନରେ ସରକାରଙ୍କ ପକ୍ଷରୁ ଅନ୍ୟ ଏକ ତାରିଖ ନିର୍ଦ୍ଧାରିତ କରାଯାଇ ଜନ ଶୁଣାଣି କରାଯିବ ବୋଲି ଅତିରିକ୍ତ ଜିଲ୍ଲାପାଳ କହିଛନ୍ତି । ଅନ୍ୟ ପକ୍ଷରେ ସ୍ଥାନୀୟ ଲୋକେ ଏହାକୁ ବିରୋଧ କରିଛନ୍ତି । କହିଛନ୍ତି ଏଠାରେ ପ୍ରକଳ୍ପ ନିର୍ମାଣ କରାଗଲେ ପରିବେଶ ପ୍ରଦୂଷଣ ହେବା ସହିତ ଏହାର ପ୍ରଭାବ ଜନବସତି ଉପରେ ପଡ଼ିବ । ତେଣୁ ଏହି ଅଞ୍ଚଳରେ ଏବେ କି ଆଗାମୀ ଭବିଷ୍ୟତରେ  ଏହି ପ୍ରକଳ୍ପ କଲେ ଏହାକୁ ବିରୋଧ କରାଯିବ । ଏନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇବା ଆଶଙ୍କାରେ ଚୌଦ୍ଵାର ଥାନା ଆଇଆଇସିଙ୍କ ସମେତ ଶହେରୁ ଅଧିକ ପୋଲିସ ନିୟୋଜିତ ହୋଇଥିଲେ । ତେବେ ସ୍ଥାନୀୟ ଲୋକଙ୍କ ବିରୋଧ ଯୋଗୁଁ ଉପସ୍ଥିତ ଅଧିକାରୀମାନେ ଫେରିଯାଇଥିଲେ ।