୩ ଦିନ ପରେ ଉଡ଼ାଣ ଭରିଲା ଜରୁରୀକାଳୀନ ଲ୍ୟାଣ୍ଡିଂ କରିଥିବା ‘ଚିନୁକ’
ବକ୍ସର: ବକ୍ସରର ରାଜପୁର ମାନିକପୁର ଗାଁ ହାଇସ୍କୁଲ ନିକଟରେ ଲ୍ୟାଣ୍ଡିଂ କରିଥିବା ବାୟୁସେନାର ଚିନୁକ ହେଲିକପ୍ଟର ଚତୁର୍ଥ ଦିନ ଉଡ଼ାଣ ଭରିଛି । ଚିନୁକ ଆକାଶର ଉଚ୍ଚକୁ ଉଠିବା ସହ ସ୍ଥାନୀୟ ଅଞ୍ଚଳ ଭାରତ ମାତା କି ଜୟରେ ପ୍ରକମ୍ପିତ ହୋଇଥିଲା । ଲୋକ ତ୍ରିରଙ୍ଗା ପତାକା ଦେଖାଇ ଚିନୁକକୁ ବିଦାୟ ଦେଇଥିଲେ । ଗତ ୩ ଦିନ ହେଲା ଚିନୁକ ହେଲିକପ୍ଟରକୁ ଦେଖିବା ପାଇଁ ଲୋକଙ୍କ ଭିଡ଼ ଜମିଥିଲା । ଆଉ ଭିଡ଼କୁ ଦେଖି ସେଠାରେ ଚାଟଠୁ ନେଇ ପକୁଡ଼ି, ସିଙ୍ଗଡ଼ା ଓ ଜଲେବିର ପସରା ମେଲିଥିଲା ।
ଚିନୁକ ହେଲିକପ୍ଟର ଅଚାନକ ଲ୍ୟାଣ୍ଡିଂ କରିବା ପରେ ଦେଖିବା ପାଇଁ ଲୋକଙ୍କ ଭିଡ଼ ତିନିଦିନ ହେଲା ଲାଗି ରହିଥିଲା । ଉତ୍ତରପ୍ରଦେଶରୁ ମଧ୍ୟ ଲୋକ ଚିନୁକ ହେଲକପ୍ଟରକୁ ଦେଖିବା ଲାଗି ମାଣିକପୁର ଆସୁଥିଲେ । ଲୋକଙ୍କ ଭିଡ଼ ପାଇଁ ମାଣିକପୁରରେ ମେଳା ଭଳି ମାହୋଲ ସୃଷ୍ଟି ହୋଇଥିଲା ।
ବାୟୁସେନାର ଚିନୁକ ହେଲିକପ୍ଟର ବୁଧବାର ସନ୍ଧ୍ୟା ପ୍ରାୟ ୫ଟା ବେଳେ ଜରୁରୀକାଳୀନ ଅବତରଣ କରିଥିଲା । ଆହ୍ଲାବାଦରୁ ବିହଟା ଏୟାରଫୋର୍ସ ଷ୍ଟେସନକୁ ଯିବା ବାଟରେ ଚିନୁକ ଇଞ୍ଜିନରେ ସମସ୍ୟା ଦେଖା ଦେଇଥିଲା । ଫଳରେ ବକ୍ସରରେ ଏହାର ଜରୁରୀକାଳୀନ ଅବତରଣ କରିବାକୁ ପଡ଼ିଥିଲା । ଇଞ୍ଜିନକୁ ସଜାଡ଼ିବା ଲାଗି ୩ ଦିନ ମଧ୍ୟରେ ମାଣିକପୁରକୁ ୫୦ରୁ ଅଧିକ ବାୟୁସେନା ସୈନିକ ଆସିଥିଲେ ।
