ଟେନିସ୍ କୋର୍ଟରେ ଗବେଷଣା, ବିଦେଶରୁ ବି ସାଉଣ୍ଟୁଛନ୍ତି ପ୍ରଶଂସା

ଚିନ୍ମୟ ପ୍ରଧାନ ଏମିତି ଜଣେ ଓଡ଼ିଆ ଟେନିସ୍ ଖେଳାଳି ଯିଏ ଖେଳୁ ଖେଳୁ ଖେଳ ଉପରେ ଗବେଷଣା ଆରମ୍ଭ କରିଛନ୍ତି । ନିଜସ୍ୱ ଖର୍ଚ୍ଚରେ ଆଜି ସେ ଗଢ଼ିଛନ୍ତି ଗୁରୁକୁଳ ଟେନିସ୍ ରିସୋର୍ଟସ ସେଣ୍ଟର ।

ଚିନ୍ମୟ ହେଉଛନ୍ତି ରାଜ୍ୟର ପ୍ରଥମ ଆଇଟା ମାନ୍ୟତାପ୍ରାପ୍ତ ଲନ୍‌ ଟେନିସ ଖେଳାଳି। ଦେଶ ବିଦେଶର ବଡ଼ ବଡ଼ ପ୍ରତିଯ଼ୋଗିତାରେ ଅଂଶଗ୍ରହଣ କରି ଅନେକ ସଫଳତା ହାସଲ କରିଛନ୍ତି। ନିଜର ସ୍ୱତନ୍ତ୍ର କୌଶଳ ବଳରେ କୋର୍ଟକୁ କବଜା  କରିବାର କଳା ତାଙ୍କୁ ବେଶ ଭଲଭାବେ ଜଣା। ପ୍ରତିପକ୍ଷ ଖେଳାଳିଙ୍କୁ ଚକମା ଦେବାରେ ସେ ସିଦ୍ଧହସ୍ତ। ଅନେକ ହୁଏତ ଜାଣି ନଥିବେ ରାଜ୍ୟର ଏହି ତାରକା ଖେଳାଳି ସାମ୍ବାଦିକତାରେ ପୋଷ୍ଟ ଗ୍ରାଜୁଏସନ ମଧ୍ୟ କରିଛନ୍ତି। ହେଲେ ଟେନିସ ଖେଳ ପ୍ରତି ଥିବା ତାଙ୍କ ନିଷ୍ଠା ଓ ଭଲପାଇବା ଆଜି ତାଙ୍କୁ ସଫଳତାର ଶୀର୍ଷରେ ପହଞ୍ଚାଇଛି।

 ଗ୍ରାସ୍‌ ହେଉ କି ସିନ୍ଥେଟିକ୍, ସବୁ କୋର୍ଟରେ ସେ ହେଉଛନ୍ତି କିଙ୍ଗ୍ ମାଷ୍ଟର। ତାଙ୍କର କ୍ରୀଡା ନୈପୁଣ୍ୟକୁ ନେଇ ସେ ବେଶ୍‌ ଚର୍ଚ୍ଚାରେ। ସରକାରୀ ଭିତ୍ତିଭୂମି କିମ୍ବା ଆର୍ଥିକ ସହାୟତା ନଥାଇ ବି ଚିନ୍ମୟ ବହୁ ଜାତୀୟ ତଥା ଅନ୍ତର୍ଜାତୀୟ ଟେନିସ୍‌ ଇଭେଣ୍ଟରେ ଅଂଶଗ୍ରହଣ କରି ରାଜ୍ୟ ପାଇଁ ଗୌରବ ଆଣିଛନ୍ତି। ଅନ୍ୟମାନଙ୍କ ପାଇଁ ଆଜି ଉଦାହରଣ ସୃଷ୍ଟି କରିଛନ୍ତି ଚିନ୍ମୟ। ଚିନ୍ମୟ ନିଜସ୍ୱ ଚେଷ୍ଟାରେ 2018ରେ ଦେଶର ପ୍ରଥମ ଓ ଏକମାତ୍ର ଗୁରୁକୁଳ ଟେନିସ୍‌ ରିସୋର୍ଟସ ନିର୍ମାଣ କରି ରାଜ୍ୟ ପାଇଁ ଏକ ନୂଆ ପରିଚୟ ସୃଷ୍ଟି କରିଥିଲେ। ଗୋଟିଏ ସ୍ଥାନରେ କୋର୍ଟ, ସୁଇମିଂ ପୁଲ୍‌, ଜିମ୍‌ ସହିତ ରହିବା ପାଇଁ ହୋଟେଲ ଓ ଖାଇବା ପାଇଁ ରେଷ୍ଟୁରାଣ୍ଟ ରହିଛି ଏହି ଗୁରୁକୁଳ ଟେନିସ ରିସୋର୍ଟରେ। ଏହି ଗୁରୁକୁଳ ରିସୋର୍ଟ ସେଣ୍ଟରରେ ଏବେସୁଦ୍ଧା ପାଖାପାଖି 10ଟି ସର୍ବଭାରତୀୟ ପ୍ରତିଯ଼ୋଗିତା ଖେଳାଯାଇସାରିଛି। ଯେଉଁଠି ଭାରତର ବଡ଼ ବଡ଼ ଟେନିସ ତାରକା ନିଜର ଖୁସି ଜାହିର କରି ଯାଇଛନ୍ତି।

2010ରେ ଚିନ୍ମୟ ମେଣ୍ଢାଶାଳରେ ନିଜସ୍ୱ ଖର୍ଚ୍ଚରେ ସିନ୍ଥେଟିକ୍‌ କୋର୍ଟ ତିଆରି କରି ଅଭ୍ୟାସ ଆରମ୍ଭ କରିଥିଲେ। ସେହି ସମୟରେ ପାଖାପାଖି 50 ଲକ୍ଷ ଟଙ୍କା ଖର୍ଚ୍ଚରେ ପ୍ରସ୍ତୁତ ହୋଇଥିବା ଏ କୋର୍ଟରୁ ଟେନିସ୍‌ ଖେଳି ସେ ଜାତୀୟ ସ୍ତରରେ ଖୁବ୍‌ ମାନ୍ୟତା ପାଇପାରିଲେ। ଅନେକ ପ୍ରତିଭା ଖେଳାଳି ଏଇଠୁ ପ୍ରଶିକ୍ଷଣ ନେଇ ଏବେ ଦେଶ ତଥା ଦେଶ ବାହାରରେ ଖେଳି ଅନେକ ନାଁ କମାଇଛନ୍ତି। 10 ବର୍ଷ ପୂର୍ବେ ରାଜ୍ୟରେ ଜଣେ ବି ପ୍ରଫେସନାଲ ଖେଳାଳି ନଥିବା ବେଳେ ଏବେ ପୁରୁଷ ବର୍ଗରେ ପାଖାପାଖି 15 ଜଣ ଓ ମହିଳା ବର୍ଗରେ 10 ଜଣ ଖେଳାଳି ପ୍ରଫେସନାଲ ଟେନିସ ଖେଳୁଛନ୍ତି। ଏବେ ରାଜ୍ୟରେ ଟେନିସ ପ୍ରତି ବହୁ ପ୍ରତିଭାଧାରୀ ଖେଳାଳିଙ୍କର ଆଗ୍ରହ ବଢ଼ିବାରେ ଲାଗିଛି। ଶତାଧିକ ଖେଳାଳି ଏଠାରୁ ଟ୍ରେନିଂ ନେଇ ରାଜ୍ୟ ତଥା ଜାତୀୟ ସ୍ତରରେ ସୁନାମ ଅର୍ଜୁଛନ୍ତି।

ବିଶ୍ୱ ଟେନିସରେ ଭାରତରୁ ଲିଆଣ୍ଡର ପେସ, ମହେଶ ଭୂପତି, ରୋହନ ବୋପାନ୍ନା, ସାନିଆ ମିର୍ଜା ଓ ସୋମଦେବଙ୍କ ଭଳି ଖେଳାଳି ଖୁବ କୀର୍ତ୍ତି ଅର୍ଜିଛନ୍ତି। ଫୁଟବଲ୍‌ ପରେ ବିଶ୍ୱକ୍ରୀଡ଼ାରେ ଟେନିସର ମଧ୍ୟ ବେଶ୍‌ ଆଦର ରହିଛି। ଅଲିମ୍ପିକ୍ସରେ ଏହାର ଗୁରୁତ୍ୱକୁ ସବୁ ଦେଶ ଅନୁଭବ କରି ଭଲ ଖେଳାଳି ପ୍ରସ୍ତୁତ କଲେଣି। ଏଭଳି ସ୍ଥିତିରେ ଟେନିସ୍‌ ପ୍ରତି କେବଳ ବ୍ୟକ୍ତିଗତ ନୁହେଁ ସରକାରୀ ଉଦ୍ୟମ ଓ ତାଲିମର ଆବଶ୍ୟକତାକୁ ସୁନ୍ଦର ଭାବେ ଉପସ୍ଥାପନ କରିଛନ୍ତି ଚିନ୍ମୟ। । ଏହା ସମ୍ଭବ ହେଲେ ହିଁ ଜାତୀୟ ସ୍ତରରେ ଓଡ଼ିଆ ଖେଳାଳି ଖୁବ୍‌ ନାଁ କମାଇ ପାରିବେ।

(ଦେବୀପ୍ରସନ୍ନ ପାଣିଗ୍ରାହୀ) ')}