ଅସ୍ତ୍ରଶସ୍ତ୍ର ସହ LACରେ ଚୀନ୍ ସୈନିକ, ରେଜାଙ୍ଗ ଲାରେ କରିଥାନ୍ତେ ଗଲବାନ ଭଳି ପ୍ରତାରଣା

ନୂଆଦିଲ୍ଲୀ: ପୂର୍ବ ଲଦାଖରେ ଚୀନ ସୈନିକ ପଛକୁ ହଟୁନାହାଁନ୍ତି । ପୁଣିଥରେ ଚୀନ ସୈନିକ ଭାରତୀୟ ଯବାନଙ୍କୁ ଧୋକା ଦେଇ ଆକ୍ରମଣ ପାଇଁ ଚେଷ୍ଟା କରିଛନ୍ତି । ଯାହାକୁ ବିଫଳ କରିଛି ଭାରତୀୟ ସେନା । ରେଜାଙ୍ଗ ଲାର ଉତ୍ତରରେ ଥିବା ମୁଖପୁରୀରେ ଚୀନର ପ୍ରାୟ ୫୦ ଯବାନ ସୋମବାର ଧାରୁଆ ଅସ୍ତ୍ରଶସ୍ତ୍ର ନେଇ ଭାରତ କବଜାରେ ଥିବା ପାହାଡ଼ ଅଞ୍ଚଳକୁ ଆସିଥିଲେ । ଏହା ପୂର୍ବରୁ ଚୀନ ଜୁନ୍ ୧୫ରେ ଗଲବାନ ଘାଟିରେ ଭାରତୀୟ ସେନା ଉପରେ ଆକ୍ରମଣ କରିଥିଲା ।

ଏହାର ଫଟୋ ସାମ୍ନାକୁ ଆସିଛି । ଯେଉଁଥିରେ ସ୍ପଷ୍ଟ ଦେଖାଯାଛି ଲଦାଖର ରେଜାଙ୍ଗ ଲା ଅଞ୍ଚଳରେ ସୋମବାର ଚୀନ ସେନା ଭାରତୀୟ ସେନାକୁ ହଟାଇବାକୁ ପ୍ରୟାସ କରିଥିଲା । ଫଟୋରେ ଚୀନ ସେନା ଧାରୁଆ ଅସ୍ତ୍ରଶସ୍ତ୍ର ଧରିଥିବା ବେଳେ ପିଠିରେ ବନ୍ଧୁକ ମଧ୍ୟ ରହିଛି । ସୋମବାର ରାତିରେ ଚୀନ ସୈନିକ LAC ନିକଟରେ ଥିବା ଏକ ଫରୱର୍ଡ ପୋଷ୍ଟ କବଜା ପାଇଁ ପ୍ରୟାସ କରିଥିଲେ । ଯାହାକୁ ବିଫଳ କରିଥିଲେ ଭାରତୀୟ ଯବାନ ।

ସେନା ସୂତ୍ର ଅନୁସାରେ ଚୀନ ସୈନିକ ଅସ୍ତ୍ରଶସ୍ତ୍ର ସହିତ ଆସିଲେ । କିନ୍ତୁ ଭାରତୀୟ ସେନା ସେମାନଙ୍କୁ ପାଖକୁ ଆସିବାକୁ ଦେଇନଥିଲା । କାରଣ ଏହାଦ୍ୱାରା ହିଂସାତ୍ମକ ସଂଘର୍ଷ ହୁଏ ଏବଂ ଗଲବାନ ଘାଟି ପରି ଘଟଣା ଘଟେ ।

ସୋମବାର ସନ୍ଧ୍ୟାରେ ଚୀନ ପକ୍ଷରୁ ଲଦାଖ ସୀମାରେ ଅନୁପ୍ରବେଶ ଉଦ୍ୟମ କରାଯାଇଥିଲା । ଭାରତୀୟ ସେନା ଯେତେବେଳେ ତାଙ୍କୁ ଅଟକାଇଲା ତ ସେମାନେ PLA ଯବାନ ଫାୟାରିଂ ଆରମ୍ଭ କରିଥିଲେ । ଆକାଶ ମାର୍ଗରୁ ଫାୟାରିଂ କରି ଡରାଇବାକୁ ଚେଷ୍ଟା କରିଥିଲା ଚୀନ୍ ସେନା । କିନ୍ତୁ ଭାରତୀୟ ସେନା ଧୈର୍ଯ୍ୟର ସହ ମୁକାବିଲା କରିଥିଲା ଓ ଚୀନ ସୈନିକ ପଛକୁ ଫେରିବାକୁ ବାଧ୍ୟ ହୋଇଥିଲେ ।

ଅନ୍ୟପଟେ ଚୀନ ବିଦେଶ ମନ୍ତ୍ରାଳୟ କହିଛି- ସୋମବାର ରାତିରେ ଭାରତୀୟ ସେନା LAC କ୍ରସ୍ କରି ଗୁଳି କରିଛି । ଯାହାର ଜବାବ ଦେଇଛି ଚୀନ ସେନା । ଚୀନ ଅଭିଯୋଗ କରିଛି ବିଗତ ଦିନରେ ହୋଇଥିବା ବୁଝାମଣାକୁ ଭାରତ ଉଲ୍ଲଂଘନ କରିଛି । ଭାରତ ତା’ ସେନାକୁ ତୁରନ୍ତ ବର୍ଡରରୁ ହଟାଇବାକୁ ଚୀନ ଦାବି କରିଛି ।