Cat Que Virus: କ୍ୟାଟ୍ କ୍ୟୁଟ୍ ଭାଇରସକୁ ନେଇ ICMRର ଚେତାବନୀ, ଭାରତରେ ମଚେଇ ପାରେ ହାହାକାର

ନୂଆଦିଲ୍ଲୀ: ଗୋଟେ ପଟେ ସମଗ୍ର ବିଶ୍ୱ କରୋନା ଭାଇରସ ସହ ଲଢ଼େଇ କରୁଥିବାବେଳେ ଅନ୍ୟପଟେ ଚୀନର ଆଉ ଏକ ଭାଇରସ ବିଶ୍ୱବ୍ୟାପୀ ନିଜର କାୟା ବିସ୍ତାର କରିବାରେ ଲାଗିଛି । ଚୀନର ଆଉ ଏକ ଭାଇରସ ( Cat Que Virus ) ଭାରତକୁ ଆକ୍ରମଣ କରିପାରେ ବୋଲି ଭାରତୀୟ ଆୟୁବିଜ୍ଞାନ ଅନୁସନ୍ଧାନ ପରିଷଦ (ICMR) ଭାରତ ସରକାରଙ୍କୁ ଚେତାଇ ଦେଇଛି । ରିପୋର୍ଟରେ କୁହାଯାଇଛି ଯେ, ଏହି ଭାଇରସ ଆପଣଙ୍କ ଶରୀରରେ ଜ୍ୱର ସହ  Febrile Illnesses, Meningitis ଏବଂ Paediatric Encephalitis ଭଳି ସମସ୍ୟା ସୃଷ୍ଟି କରିପାରେ ।

 Cat Que Virus ଉପସ୍ଥିତିର ମିଳିଲା ପ୍ରମାଣ

ICMR ର ଅଧିକାରୀଙ୍କ ସୂଚନା ଅନୁଯାୟୀ, ଚୀନ ଏବଂ ଭିଏତନାମାରେ Cat Que Virus ର ଉପସ୍ଥିତି ବିଷୟରେ ଜଣାପଡ଼ିଛି । ସେଠାରେ କ୍ୟୁଲେକ୍ସ ମଶା ଏବଂ ଘୁଷୁରୀଙ୍କ ଦେହରେ ଏହି ଭାଇରସ ଦେଖିବାକୁ ମିଳିଛି । ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ, ଭାରତରେ ମଧ୍ୟ କ୍ୟୁଲେକ୍ସ ମଶା ଦେହରେ Cat Que Virus ଭଳି କିଛି ଭାଇରସ ଦେଖିବାକୁ ମିଳିଛି । ସଂସ୍ଥା ପକ୍ଷରୁ କୁହାଯାଇଛି ଯେ, ସିକ୍ୟୁବି ମୂଳତଃ ଘୁଷୁରୀଙ୍କ ଦେହରେ ଦେଖିବାକୁ ମିଳିଥାଏ ଏବଂ ଚୀନରେ ଗୃହପାଳିତ ଘୁଷୁରୀଙ୍କ ଦେହରେ ଏହି ଜୀବାଣୁ ବିରୁଦ୍ଧରେ ଆଣ୍ଟିବଡି ଦେଖିବାକୁ ମିଳିଛି । ଏହାର ଅର୍ଥ Cat Que Virus ଚୀନର ସ୍ଥାନୀୟ ଅଞ୍ଚଳରେ ନିଜର ପ୍ରକୋପ ବିସ୍ତାର କରିବା ଆରମ୍ଭ କରିସାରିଛି ।

୮୮୩ଟି ନମୂନାରୁ ୨ଟି ପଜିଟିଭ ମାମଲା

ବୈଜ୍ଞାନିକମାନେ ବିଭିନ୍ନ ରାଜ୍ୟରୁ ୮୮୩ ଜଣଙ୍କ ନମୁନା ସଂଗ୍ରହ କରିଥିଲେ ଏବଂ ଦୁଇଟି ଭାଇରସ ବିରୁଦ୍ଧରେ ଆଣ୍ଟିବଡି ପାଇଥିଲେ। ଅନୁସନ୍ଧାନରୁ ଜଣାପଡିଛି ଯେ ଦୁଇଜଣ ବ୍ୟକ୍ତି ଗୋଟିଏ ସମୟରେ ଭାଇରସ ଦ୍ୱାରା ସଂକ୍ରମିତ ହୋଇଥିଲେ। ଜୁନ୍ ମାସରେ ଇଣ୍ଡିଆନ୍ ଜର୍ନାଲ୍ ଅଫ୍ ମେଡିକାଲ୍ ରିସର୍ଚ୍ଚରେ ପ୍ରକାଶିତ ଏକ ଅନୁସନ୍ଧାନରେ କୁହାଯାଇଛି ଯେ, ମଣିଷର ସେରମ୍ ନମୁନାରେ ଆଣ୍ଟି- CQV IgG ଆଣ୍ଟିବଡି ଚିହ୍ନଟ ଏବଂ ମଶାମାନଙ୍କରେ CQV ର ନକଲ ଦର୍ଶାଏ ଯେ ଏହି ରୋଗ ଭାରତରେ ନିଜ କାୟା ବିସ୍ତାର କରିବାର କ୍ଷମତା ରଖିଛି  । ଏଭଳି ପରିସ୍ଥିତିରେ ମଣିଷ ଏବଂ ଘୁଷୁରୀର ଅଧିକ ସେରମ୍ ନମୁନା ପରୀକ୍ଷା କରାଯିବା ଉଚିତ୍ ଯାହା ଦ୍ୱାରା ଏହା ଜାଣିହେବ ଯେ, ଏହି ଭାଇରସ ଆମ ଶରୀରେ ପୂର୍ବରୁ ରହିଛି ନା ନାହିଁ ।

ଜଣେ ବୈଜ୍ଞାନିକଙ୍କ କହିବା ଅନୁୟାୟୀ, ଭାରତ ପ୍ରସଙ୍ଗରେ ପରିସଂଖ୍ୟାନ ଦର୍ଶାଏ ଯେ କେତେକ ମଶା CQV ପ୍ରତି ସମ୍ବେଦନଶୀଳ । ଏହିପରି ଭାବରେ ମଶାମାନେ CQV ସଂକ୍ରମଣର କାରଣ ହୋଇପାରନ୍ତି ।