ପାକିସ୍ତାନକୁ ପଇସା ଦେଇ ଚୀନ୍ କାଙ୍ଗାଳ

ନନ୍ଦିଘୋଷ ବ୍ୟୁରୋ: ଚାଇନା, ଯିଏ ନିଜର ଅର୍ଥବ୍ୟବସ୍ଥାକୁ ନେଇ ସବୁବେଳେ ଚର୍ଚ୍ଚାରେ ରହିଥାଏ । ଚୀନର ଅର୍ଥବ୍ୟବସ୍ଥା ସବୁଠୁ ସ୍ବଚ୍ଛ ଏବଂ ସମ୍ବଳ ବୋଲି ପ୍ରାୟ ସମସ୍ତେ ଜାଣନ୍ତି । କିନ୍ତୁ ଏବେ ଚୀନର ସ୍ଥିତି ପୁରା ଓଲଟା । ଏବେ ଚୀନ୍ ଅର୍ଥନୈତିକ ମାନ୍ଦାବସ୍ଥା ଏବଂ ବଜେଟ୍ ଚାପ ସହ ସଂଘର୍ଷ କରୁଛି । ରାଷ୍ଟ୍ରପତି ସି ଜିନପିଙ୍ଗ୍ ଦେଶର ସରକାରୀ ଅଧିକାରୀମାନଙ୍କୁ ସେମାନଙ୍କର ଯାତ୍ରା, ଖାଦ୍ୟ ଏବଂ ଅଫିସ୍ ଖର୍ଚ୍ଚ ହ୍ରାସ କରିବାକୁ ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି । ରାଷ୍ଟ୍ରପତିଙ୍କ ଏହି ନିର୍ଦ୍ଦେଶ କେବଳ ସରକାରୀ ଖର୍ଚ୍ଚକୁ କଣ୍ଟ୍ରୋଲ୍ କରିବା ନୁହେଁ ବରଂ ଚୀନ୍ ଗୁରୁତର ଅର୍ଥନୈତିକ ମାନ୍ଦାବସ୍ଥାକୁ ବି ଦର୍ଶାଉଛି । ସରକାରଙ୍କର ଏଭଳି ଆଦେଶ ପରେ ସରକାରୀ କର୍ମଚାରୀଙ୍କୁ  ନିଜର ମଦ ଏବଂ ସିଗାରେଟ୍ ଖର୍ଚ୍ଚ ପାଇଁ ଚିନ୍ତା କରିବାକୁ ପଡିବ । ଚୀନ୍  ହେଉଛି ସେହି  ଦେଶ, ଯିଏ ପାକିସ୍ତାନକୁ ତାର ପକେଟ୍ ଖର୍ଚ୍ଚ ଉଠାଇବାରେ ସାହାର୍ଯ୍ୟ କରିଥାଏ । କିନ୍ତୁ ଆଜି ପରିସ୍ଥିତି ଏପରି ଯେ, ଚୀନକୁ ନିଜର ଖର୍ଚ୍ଚ ନିୟନ୍ତ୍ରଣ କରିବା ଜରୁରୀ ହୋଇପଡିଛି ।

ସିନହୁଆ ସମାଚାର ଏଜେନ୍ସିର ରିପୋର୍ଟ ଅନୁସାରେ, ଏହି ଆଦେଶ ସ୍ପଷ୍ଟ ଭାବରେ ପ୍ରମାଣ କରୁଛି ଯେ ସି ଜିନପିଙ୍ଗ ପ୍ରଶାସନ ଏବେ ଅପବ୍ୟୟ ଖର୍ଚ୍ଚ ବିରୁଦ୍ଧରେ ଏକ ନିର୍ଣ୍ଣାୟକ ମନୋଭାବ ଗ୍ରହଣ କରିବାକୁ ବାଧ୍ୟ । ଚୀନର, ସ୍ଥାନୀୟ ସରକାର ପୂର୍ବରୁ ଜମି କ୍ରୟ ଏବଂ ବିକ୍ରୟରୁ ମୁଖ୍ୟତଃ ରାଜସ୍ୱ ଆଦାୟ କରୁଥିଲେ, କିନ୍ତୁ ସାମ୍ପ୍ରତିକ ବର୍ଷଗୁଡ଼ିକରେ ଜମି ବିକ୍ରୟ ଦ୍ରୁତ ଭାବରେ ହ୍ରାସ ପାଇଛି, ଯାହା ଫଳରେ ବଜେଟ୍ ନିଅଣ୍ଟ ବୃଦ୍ଧି ପାଉଛି ଏବଂ ଋଣ ବୋଝ ଅଧିକ ବୃଦ୍ଧି ପାଇଛି । ଏହି କାରଣରୁ, 2023 ଶେଷରେ, ସି ଜିନପିଙ୍ଗ ଏକ ସ୍ପଷ୍ଟ ବାର୍ତ୍ତା ଦେଇଥିଲେ ଯେ ଆମକୁ ‘ବେଲ୍ଟ-ଟାଇଟିଂ’ କରିବାର ଅଭ୍ୟାସ ବିକଶିତ କରିବାକୁ ପଡିବ, ଅର୍ଥାତ୍, ଆମକୁ ପ୍ରତ୍ୟେକ ସ୍ତରରେ ଖର୍ଚ୍ଚ ନିୟନ୍ତ୍ରଣ କରିବାକୁ ପଡିବ। ଏବେ 2025 ମସିହାରେ ଏହି ନୀତିକୁ କାର୍ଯ୍ୟକାରୀ କରାଯାଇଛି ।

ସରକାରୀ ଖର୍ଚ୍ଚ ହ୍ରାସ ନିଷ୍ପତ୍ତି ସିଧାସଳଖ ଚୀନ୍ ଷ୍ଟକ୍ ବଜାରରେ ବି ପ୍ରତିଫଳିତ ହୋଇଛି । ଉପଭୋକ୍ତା ମୁଖ୍ୟ ସାମଗ୍ରୀ ଷ୍ଟକ୍ ସୂଚକାଙ୍କ ୧.୪% ହ୍ରାସ ପାଇଛି । ଏବଂ ପ୍ରିମିୟମ୍ ମଦ ନିର୍ମାତା କ୍ୱେଇଚୋ ମଉଟାଇ କୋ.ର ସେୟାର ୨.୨% ହ୍ରାସ ପାଇଛି । ଏହା ଛଅ ସପ୍ତାହ ମଧ୍ୟରେ ସବୁଠାରୁ ବଡ଼ ହ୍ରାସ। ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଏହି ହ୍ରାସ ଦର୍ଶାଉଛି ଯେ ସରକାରୀ ପ୍ରତିଷ୍ଠାନଗୁଡ଼ିକ ଦ୍ୱାରା ବ୍ୟବହାର ହ୍ରାସ ପାଇବାର ଭୟ ଯୋଗୁଁ ବଜାରରେ ଏପରି ପରିସ୍ଥିତି ଦେଖିବାକୁ ମିଳିଛି  ।

ସି ଜିନପିଙ୍ଗ ସାମ୍ପ୍ରତିକ ବର୍ଷଗୁଡ଼ିକରେ ଦୁର୍ନୀତି ବିରୋଧୀ ଅଭିଯାନକୁ ତୀବ୍ର କରିଛନ୍ତି । ଶହ ଶହ ଅଧିକାରୀଙ୍କୁ ଦଣ୍ଡ ଦେଇଛନ୍ତି। ଏବେ, ଅପବ୍ୟୟ ଖର୍ଚ୍ଚକୁ ରୋକିବା ପାଇଁ, ନିୟନ୍ତ୍ରଣ ବ୍ୟବସ୍ଥାକୁ ଅଧିକ କଠୋର କରାଯାଉଛି। ବେଜିଂ ପ୍ରଶାସନ ସ୍ଥାନୀୟ ସରକାରଙ୍କୁ ବଜେଟ ସମୀକ୍ଷା, ଋଣ ବିପଦ ପରିଚାଳନା ଏବଂ ଉପଯୋଗୀତା ଖର୍ଚ୍ଚ ହ୍ରାସକୁ ପ୍ରାଥମିକତା ଦେବାକୁ କହିଛି।