ପ୍ରଥମ ଥର କହିଲା ଚୀନ, ଗଲବାନ ଘାଟି ସଂଘର୍ଷରେ ମରିଥିଲେ କେତେ ଚୀନ ସୈନିକ

ପେଇଚିଙ୍ଗ: ପୂର୍ବ ଲଦାଖର ଗଲବାନ ଘାଟିରେ ଜୁନ୍ ୧୫ରେ ହୋଇଥିବା ହିଂସାତ୍ମକ ସଂଘର୍ଷରେ କେତେ ଜଣ ଚୀନ ସୈନିକ ମରିଥିଲେ । ଏହା ଉପରୁ ଏବେ ପରଦା ହଟୁଛି । ଚୀନ-ଭାରତ ମଧ୍ୟରେ ହୋଇଥିବା ବୈଠକରେ ଚୀନ ପ୍ରଥମଥର ପାଇଁ କେତେ ସୈନିକ ମରିଥିଲେ କହିଛି । ଗଲବାନ ଘାଟି ସଂଘର୍ଷରେ ଚୀନର ୫ ଜଣ ଯବାନଙ୍କ ମୃତ୍ୟୁ ହୋଇଥିଲା । ଏଥିରେ ଚୀନ ସେନାର ଜଣେ କମାଣ୍ଡିଂ ଅଫିସର ମଧ୍ୟ ରହିଛନ୍ତି । ଏହା ପୂର୍ବରୁ ଚୀନ କେବଳେ ଜଣେ ସୈନିକ ମରିଥିବା ନେଇ ମାନିଥିଲା । ଏହି ରକ୍ତାକ୍ତ ସଂଘର୍ଷରେ ଭାରତ ପକ୍ଷରୁ ୨୦ ଜଣ ଯବାନ ସହିଦ ହୋଇଥିଲେ ।

ଚୀନ ୫ ଜଣ ସୈନିକଙ୍କ ମୃତ୍ୟୁ କଥାକୁ ମାନଥିବା ବେଳେ ଆମେରିକା ଓ ଭାରତୀୟ ଗୁଇନ୍ଦାର ଅନୁମାନ ଅନୁଯାୟୀ ହିଂସାତ୍ମକ ସଂଘର୍ଷରେ ୪୦ ଜଣ ଚୀନ ସୈନିକ ମରିଛନ୍ତି । ଭାରତ ଓ ଚୀନ ବିବାଦୀୟ ଅଞ୍ଚଳରେ ରୋଟେସନ ବେସିସରେ ସାପ୍ତାହିକ ପାଟ୍ରୋଲିଂ କରୁଛନ୍ତି । କୁହାଯାଉଛି ପୂର୍ବ ଲଦାଖରେ ଏହାକୁ ଆପଣାଯିବ । ଏବେ ପୂର୍ବ ଲଦାଖର ଦେପସାଙ୍ଗ, ପ୍ୟାଙ୍ଗୋଗ୍ ଝିଲର ନର୍ଥ ଓ ସାଉଥ୍ ବ୍ୟାଙ୍କ, ପାଟ୍ରୋଲିଂ ପଏଣ୍ଟ ୧୭ଏ, ରେଜାଙ୍ଗ ଲା ଓ ରେଚିନ ଲାରେ ଦୁଇ ଦେଶର ସେନା ମୁହାଁମୁହିଁ ହେଉଛନ୍ତି ।

ଗଲବାନ ହିଂସା ପରେ ଭାରତ ଚୀନକୁ ସଫା ସଫା କରିଛି- ଆମ ସୈନିକ ନିଜର ସୁରକ୍ଷା ଓ ପୂର୍ବ ଲଦାଖରେ ସୀମା ସୁରକ୍ଷା ପାଇଁ କୌଣସି ବି ସ୍ତରକୁ ଯାଇପାରନ୍ତି । ଯଦି ସ୍ଥିତି ନିୟନ୍ତ୍ରଣ ବାହାରକୁ ଯାଏ ତ ଭାରତୀୟ ସେନା ଗୁଳି ମଧ୍ୟ ବର୍ଷଣ କରିବାରେ ପଛଘୁଞ୍ଚା ଦେବନାହିଁ ।

ଚୀନ ସୈନିକ ପାରମ୍ପରିକ ଅସ୍ତ୍ରଶସ୍ତ୍ର ବ୍ୟବହାର କରୁଛନ୍ତି । ତେଣୁ, ଭାରତୀୟ ସେନା ଗୁଳି ଚଳାଇବାରେ ଡେରି କରିବେ ନାହିଁ । କଥାବାର୍ତ୍ତା ବେଳେ ଚୀନ, ପ୍ୟାଙ୍ଗୋଗ୍ ଝିଲର ଉଚ୍ଚ ସ୍ଥାନରୁ ଭାରତୀୟ ସେନା ହଟାଇବାକୁ ଦାବି କରିଥିଲା । ତେବେ, ଭାରତ ପୂର୍ବ ଲଦାଖ ସ୍ଥିତି ସମାଧାନ ଉପରେ ଜୋର ଦେଇଥିଲା । ପ୍ରଥମେ ଏହି ସ୍ଥିତିକୁ ସୁଧାରିବା ଉପରେ ଜୋର ଦେଇଥିଲା ଭାରତ । ଗଲବାନ ହିଂସାରେ ଭାରତ ସହିଦ ହୋଇଥିବା ଯବାନଙ୍କ ସଂଖ୍ୟା କହିଥିଲା । ସେବେଠାରୁ ଚୀନ୍ ଚୁପ୍ ରହିଥିଲା ।