ତାଇୱାନ ଉପରେ ଯୁଦ୍ଧ ଯୋଜନା କରୁଛି ଚୀନ୍, PLAର ସମରାଭ୍ୟାସ…
1 min read
ନୂଆଦିଲ୍ଲୀ: ତାଇୱାନ-ଚୀନ ବିବାଦ ପୁଣି ମୁଣ୍ଡ ଟେକିଛି । ଯଦିଓ ତାଇୱାନ ସଂଯୁକ୍ତ ରାଷ୍ଟ୍ରର ଅଂଶ ନୁହେଁ, ତଥାପି ବିଶ୍ୱର ପ୍ରାୟ ସମସ୍ତ ଦେଶ ଏହାକୁ ଏକ ସ୍ୱତନ୍ତ୍ର ଦେଶ ଭାବେ ଦେଖନ୍ତି । ମାତ୍ର ଚୀନର କ୍ରମାଗତ ଭାବେ ତାଇୱାନ ବିରୋଧୀ ଆଭିମୁଖ୍ୟ ଏହି ଛୋଟିଆ ଦ୍ୱୀପ ପାଇଁ ସମସ୍ୟା ହୋଇ ଠିଆ ହୋଇଛି । ତେବେ ଚୀନର ପ୍ରମୁଖ ଗଣମାଧ୍ୟମ ସଂସ୍ଥା ଗ୍ଲୋବାଲ ଟାଇମ୍ସ ରିପୋର୍ଟ ଅନୁଯାୟୀ, ଚୀନ ତାଇୱାନ ଉପରେ ଆକ୍ରମଣ କରିବା ପାଇଁ ସବୁ ପ୍ରକାର ପ୍ରସ୍ତୁତି ଚଳାଇଛି ।
ବିଗତ ଦିନରେ ଏହି ଗଣମାଧ୍ୟମ ତାଇୱାନ ଉପରେ ଯୁଦ୍ଧ ହେବା ନେଇ ଆଲୋଚନା କରିଥିଲେ । ତେବେ ଏହା ଠିକ ପରେ ଅର୍ଥାତ୍ ନିକଟ ଅତୀତରେ ଚୀନ ସେନା ଏକ ଦ୍ୱୀପ ଦଖଲ କରିବା ପାଇଁ ସମରାଭ୍ୟାସ କରୁଥିବା ଦେଖିବାକୁ ମିଳିଛି । ଏହାର ଏକ ଭିଡିଓ ମଧ୍ୟ ଅନ୍ତର୍ଜାତୀୟ ସ୍ତରର ବିଭିନ୍ନ ମିଡିଆରେ ଘୂରି ବୁଲୁଛି । ଏଣୁ ଅନୁମାନ କରାଯାଉଛି ଯେ, ଚୀନ ସେନା, ପିପୁଲ୍ସ ଲିବରେସନ ଆର୍ମି ତାଇୱାନ ଉପରେ ଯୁଦ୍ଧ ଘୋଷଣା କରିପାରେ । ସବୁଠାରୁ ବଡ କଥା ଚୀନ ସେନାର ସମରାଭ୍ୟାସ ଉପକୂଳବର୍ତ୍ତୀ ଅଞ୍ଚଳରେ ହେଉଛି । ତାଇୱାନ ଏକ ଦ୍ୱୀପ ହୋଇଥିବା ହେତୁ ଏଭଳି ସମରାଭ୍ୟାସ ଉକ୍ତ ଦେଶ ପାଇଁ ସମସ୍ୟା ବଢାଇଛି । ତେବେ ସମରାଭ୍ୟାସ ସମୟରେ ଚୀନ ସେନା ମିସାଇଲ୍, ଯୁଦ୍ଧ ବିମାନର ବ୍ୟବହାର କରୁଛି । ପିପୁଲ୍ସ ଲିବରେସନ ଆର୍ମିର ୭୩ ତମ ଶ୍ରେଣୀକୁ ଏହି ଦାୟିତ୍ୱ ମିଳିଥିବା ରିପୋର୍ଟ ପ୍ରକାଶ କରିଛି ।
ଚୀନ ସରକାର ତାଇୱାନକୁ କେବେ ମଧ୍ୟ ଏକ ଦେଶ ଭାବେ ଗ୍ରହଣ କରିନାହାନ୍ତି । ଚୀନ ଏହି ଦ୍ୱୀପକୁ ନିଜ ଦେଶ ଅନ୍ତର୍ଗତ ଏକ ସ୍ୱୟଂଶାସିତ ପ୍ରଦେଶର ମାନ୍ୟତା ଦେବାକୁ ପ୍ରସ୍ତୁତ । ମାତ୍ର ସାମରିକ, ବ୍ୟାପାର ଭଳି ଅନେର ପ୍ରମୁଖ କ୍ଷେତ୍ରରେ ନିଜର ପ୍ରଭୁତ୍ୱ ରଖିବା ଚାହୁଁଛି । ଅର୍ଥାତ୍ ସ୍ୱଂୟ ସମ୍ପୂର୍ଣ୍ଣ ତାଇୱାନ କଥା ଉଠିଲେ ଏହାକୁ ଗ୍ରହଣ କରିବାକୁ ଚୀନ ଆଦୌ ପ୍ରସ୍ତୁତ ନୁହେଁ । ତାଇୱାନ ସାଉଥ୍ ଚାଇନା ସମୁଦ୍ରରେ ମଧ୍ୟରେ ଏକ ଦ୍ୱୀପ ହୋଇଥିବା ହେତୁ ଚୀନ ସେଠାରେ ନିଜ ପ୍ରଭାବ କମାଇବାକୁ ଚାହୁଁନାହିଁ । ତାଇୱାନ ଏକ ସ୍ୱତନ୍ତ୍ର ଦେଶ ହେଲେ, ଅନ୍ତର୍ଜାତୀୟ ସ୍ତରରେ ତାଇୱାନ ସହ ଅନ୍ୟ ଦେଶର ବାଣିଜ୍ୟିକ, କୁଟନୈତିକ ଓ ସାମରିକ ସମ୍ପର୍କ ଚୀନ ପାଇଁ ସମସ୍ୟା ବଢାଇପାରେ ।
